Қәлбинур сидиқ ханим қатарлилар гуваһлиқ берип, белгийә даирилирини "уйғур қирғинчилиқи" ни етирап қилишқа чақирди

Ихтиярий мухбиримиз уйғурай
2021-05-19
Share
Қәлбинур сидиқ ханим қатарлилар гуваһлиқ берип, белгийә даирилирини Лагер шаһити қәлбинур сидиқ ханим белгийә парламентида гуваһлиқ бәрди. 2021-Йили 18-май, бирюссел, белгийә.
RFA/Uyghur'ay

Белгийәдики мәзкур гуваһлиқ бериш йеғинини әсли 5-айниң 4-күни ‍өткүзүш пилан қилинған болсиму, әмма тор һуҗуми сәвәблик кечиктүрүлгән иди. Әйни чағдики хәвәрләрдә бу хаккерлиқ һуҗуминиң хитайдин кәлгәнлики пәрәз қилинған иди.

Гуваһлиқ бериш йиғинида голландийә әмгәкчиләр партийәсиниң бир қисим вәкиллири уйғурларға қарши бир қисим сөзләрни қилған болсиму, әмма башқа партийәләрниң күчлүк рәддийәсигә учриған. 5 Саәт давамлашқан гуваһлиқ бериш йиғинидин кейин, һәр қайси партийә вәкиллири қәлбинур сидиқ ханимға рәһмәт ейтқан вә уни қоллайдиғанлиқини билдүргән.

Корона вирус сәвәблик көпинчә парламент әзалири тор арқилиқ йиғинға қатқашқан.

Қәлбинур сидиқ ханим белгийә парламентида бәргән гуваһлиқида өзиниң җаза лагерида көргән-аңлиғанлирини, шундақла лагерда өзи мәҗбурланған бир қисим тәпсилатлар һәққидә мәлумат бәргән.

Бу йеғинға йәнә дуня уйғур қурултийиниң белгийәдики вәкили конситоп әпәнди вә берюссел һөррийәт университетиниң пирофессори вәнисса фиҗаңгивил ханим қатарлиқлар қатнашқан булуп, уларму хитайниң уйғурларға қарши йүргүзиватқан бастуруш сиясәтлирини қаттиқ әйибләп, пикир баян қилған. Улар сөзидә уйғурлар нөвәттә дуч келиватқан ирқий қирғинчилиқ һәққидики дәлил-пакитларни көрситип, хитай һөкүмитиниң рәзил җинайәтлирини паш қилған.

Лагер шаһити қәлбинур сидиқ ханим белгийә парламентида гуваһлиқ бәрди. 2021-Йили 18-май, бирюссел, белгийә.

Бу һәқтә радийойимиз зияритини қобул қилған қәлбинур сидиқ ханим белгийә парламентида өзи оттуриға қойған мәлуматлар һәққидә учур бәрди.

Биз йәнә бу паалийәтниң орунлаштурулушиға күч чиқарған белгийә уйғур җәмийитиниң вәкили әкбәр турсун әпәндидин гуваһлиқ йиғини һәққидә қисқичә мәлумат беришни тәләп қкилдуқ. У бу йиғинниң наһайити яхши өткәнликини, қәлбинур сидиқ ханим бәргән гуваһлиқниң парламент әзалирини чоңқур тәсирләндүргәнликини тилға алди.

Белгийә уйғур җәмийити өзиниң тор бетидә қәлбинур сидиқ ханимға, бир нәччә ‍айдин бери бүгүнки йиғинға һәрқайси тәрәптин тәйярлиқ қилған тәшкилат ‍әзалириға, дуня ‍уйғур қурултийиниң белгийәдики вәкили констоп ‍әпәндигә, ‍уйғурларни қоллап кәлгән һәрқайси партийәниң вәкиллиригә, шәрқи ‍асия тәтқиқатчиси вәнисса ханимға, шундақла йәһуди вә йәрлик ‍уқуғучилар гуруплириға рәһмәт ейтидиғанлиқини билдүргән.

Белгийәдә мәлум санда уйғур җамаити яшаватқан һәмдә белгийә хәлқи уйғурларни қоллап келиватқан болсиму, әмма һазирға қәдәр белгийә парламентида хитайниң уйғурларға йүргүзиватқан зулумлирини "ирқий қирғинчилиқ" дәп етирап қилған бир қарар елинмиған иди.

Белгийә уйғур җәмийитиниң тәшвиқат медия ярдәмчиси әсма гүн ханимниң билдүрүшичә, мушундақ шараитта белгийә парламетнида уйғурлар һәққидә бундақ бир гуваһлиқ бериш йиғининиң чақирилиши, кәлгүсидә белгийә парламентиниңму "уйғур ирқий қирғинчилиқи" ни етирап қилидиған бир қарарни елиш мумкинчиликини көрситидикән.

У бу һәқтики қарашлирини баян қилип мундақ деди: "америка, канада уйғурларниң ирқий қирғинчилиқини етирап қилғандин кейин, голландийәму бу һәқтә охшаш қарарни бәрди. Буниң нәтиҗисидә явропа иттипақиниң мәркизи болған белгийәдә һөкүмәт тәрәп уйғурларниң нөвәттә чекиватқан азаб-оқибәтлирини, техиму чүшәнгәндәк болди. Буниңдин кейин белгийәдә уйғурлар тоғрисидики ишлар бир қәдәр тезрәк болуши мумкин."

Бу йил киргәндин буян америка, канада, әнглийә, голландийә, австралийә қатарлиқ дөләтләр вә уларниң парламентлири хитайниң уйғурларға йүргүзиватқан зулумлирини "ирқий қирғинчилиқ" дәп тонуған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт