Qelbinur sidiq xanim qatarlilar guwahliq bérip, bélgiye da'irilirini "Uyghur qirghinchiliqi" ni étirap qilishqa chaqirdi

Ixtiyariy muxbirimiz Uyghur'ay
2021-05-19
Share
Qelbinur sidiq xanim qatarlilar guwahliq bérip, bélgiye da'irilirini Lagér shahiti qelbinur sidiq xanim bélgiye parlaméntida guwahliq berdi. 2021-Yili 18-may, biryussél, bélgiye.
RFA/Uyghur'ay

Bélgiyediki mezkur guwahliq bérish yéghinini esli 5-ayning 4-küni ‍ötküzüsh pilan qilin'ghan bolsimu, emma tor hujumi seweblik kéchiktürülgen idi. Eyni chaghdiki xewerlerde bu xakkérliq hujumining xitaydin kelgenliki perez qilin'ghan idi.

Guwahliq bérish yighinida gollandiye emgekchiler partiyesining bir qisim wekilliri Uyghurlargha qarshi bir qisim sözlerni qilghan bolsimu, emma bashqa partiyelerning küchlük reddiyesige uchrighan. 5 Sa'et dawamlashqan guwahliq bérish yighinidin kéyin, her qaysi partiye wekilliri qelbinur sidiq xanimgha rehmet éytqan we uni qollaydighanliqini bildürgen.

Korona wirus seweblik köpinche parlamént ezaliri tor arqiliq yighin'gha qatqashqan.

Qelbinur sidiq xanim bélgiye parlaméntida bergen guwahliqida özining jaza lagérida körgen-anglighanlirini, shundaqla lagérda özi mejburlan'ghan bir qisim tepsilatlar heqqide melumat bergen.

Bu yéghin'gha yene dunya Uyghur qurultiyining bélgiyediki wekili konsitop ependi we béryussél hörriyet uniwérsitétining piroféssori wenissa fijanggiwil xanim qatarliqlar qatnashqan bulup, ularmu xitayning Uyghurlargha qarshi yürgüziwatqan basturush siyasetlirini qattiq eyiblep, pikir bayan qilghan. Ular sözide Uyghurlar nöwette duch kéliwatqan irqiy qirghinchiliq heqqidiki delil-pakitlarni körsitip, xitay hökümitining rezil jinayetlirini pash qilghan.

Lagér shahiti qelbinur sidiq xanim bélgiye parlaméntida guwahliq berdi. 2021-Yili 18-may, biryussél, bélgiye.

Bu heqte radiyoyimiz ziyaritini qobul qilghan qelbinur sidiq xanim bélgiye parlaméntida özi otturigha qoyghan melumatlar heqqide uchur berdi.

Biz yene bu pa'aliyetning orunlashturulushigha küch chiqarghan bélgiye Uyghur jem'iyitining wekili ekber tursun ependidin guwahliq yighini heqqide qisqiche melumat bérishni telep qkilduq. U bu yighinning nahayiti yaxshi ötkenlikini, qelbinur sidiq xanim bergen guwahliqning parlamént ezalirini chongqur tesirlendürgenlikini tilgha aldi.

Bélgiye Uyghur jem'iyiti özining tor bétide qelbinur sidiq xanimgha, bir nechche ‍aydin béri bügünki yighin'gha herqaysi tereptin teyyarliq qilghan teshkilat ‍ezalirigha, dunya ‍uyghur qurultiyining bélgiyediki wekili konstop ‍ependige, ‍uyghurlarni qollap kelgen herqaysi partiyening wekillirige, sherqi ‍asiya tetqiqatchisi wenissa xanimgha, shundaqla yehudi we yerlik ‍uqughuchilar guruplirigha rehmet éytidighanliqini bildürgen.

Bélgiyede melum sanda Uyghur jama'iti yashawatqan hemde bélgiye xelqi Uyghurlarni qollap kéliwatqan bolsimu, emma hazirgha qeder bélgiye parlaméntida xitayning Uyghurlargha yürgüziwatqan zulumlirini "Irqiy qirghinchiliq" dep étirap qilghan bir qarar élinmighan idi.

Bélgiye Uyghur jem'iyitining teshwiqat médiya yardemchisi esma gün xanimning bildürüshiche, mushundaq shara'itta bélgiye parlamétnida Uyghurlar heqqide bundaq bir guwahliq bérish yighinining chaqirilishi, kelgüside bélgiye parlaméntiningmu "Uyghur irqiy qirghinchiliqi" ni étirap qilidighan bir qararni élish mumkinchilikini körsitidiken.

U bu heqtiki qarashlirini bayan qilip mundaq dédi: "Amérika, kanada Uyghurlarning irqiy qirghinchiliqini étirap qilghandin kéyin, gollandiyemu bu heqte oxshash qararni berdi. Buning netijiside yawropa ittipaqining merkizi bolghan bélgiyede hökümet terep Uyghurlarning nöwette chékiwatqan azab-oqibetlirini, téximu chüshen'gendek boldi. Buningdin kéyin bélgiyede Uyghurlar toghrisidiki ishlar bir qeder tézrek bolushi mumkin."

Bu yil kirgendin buyan amérika, kanada, en'gliye, gollandiye, awstraliye qatarliq döletler we ularning parlaméntliri xitayning Uyghurlargha yürgüziwatqan zulumlirini "Irqiy qirghinchiliq" dep tonughan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet