Хитай торға һуҗум қилиш вәқәлиридә қоли барлиқини рәт қилди
2011.08.05
Америка McAfee тор бихәтәрлик ширкити доклат елан қилип, йеқинқи бәш йилдин буян йүз бәргән кәң көләмлик тор һуҗумлириниң пәқәт бир нуқтидин елип берилғанлиқини елан қилған. Доклатта тор һуҗуми елип барған дөләтниң исми тилға елинмиған болсиму, бирақ анализчилар бирдәк буниң хитай икәнликини илгири сүргән иди.
Хитай компартийисиниң “хәлқ” гезити җүмә күни доклатни тәнқидләп, “тор бузарларни хитай билән алақидар қилип көрситиш мәсулийәтсизлик” дегән вә буниң “пут тирәп туралмайдиғанлиқини” ни илгири сүргән.
McAfee Доклатта, тор бузарларниң һуҗумиға учриған орган вә ширкәтләр ичидә америка һөкүмәт органлири, б д т, хәлқара олимпик комитети вә америка дөләт мудапиә министирлиқи иш беридиған һөддигәр ширкәтләрниң барлиқини билдүргән.
Бу хитайниң “хәлқ” гезити арқилиқ америка тор бихәтәрлик доклатиға қайтурған тунҗи инкаси. Бирақ, бу хитайниң тунҗи қетим тор бузарлиқ қилиш билән әйиблиниши әмәс. Бу йил 6-айда Google ширкити хитай тор бузарлириниң америка һөкүмәт әмәлдарлири, һәрбий хадимлири, мухбирлар вә хитай сиясий өктичилириниң Gmail хәт сандуқиға һуҗум қилғанлиқини илгири сүргән.