ئەنگلىيىدە چىقىدىغان ۋاقىت گېزىتى، مۇھاپىزەت گېزىتى «The Guardian» شۇنداقلا س ن ن، ب ب س ئاگېنتلىقى، ئامېرىكا ئاۋازى، گېرمانىيە ئاۋازى ھەم ئەركىن ئاسىيا رادىئوسى قاتارلىق خەلقئارا مەتبۇئاتلاردا ئېلان قىلىنغان ماقالىلەردە، خىتاي ھۆكۈمىتىنىڭ يېقىندىن بۇيان ئەڭ زور كۈچىنى دۆلەت ئىچىدىكى نارازىلىق ھەرىكەتلىرىنى باستۇرۇشقا قاراتقانلىقى ئىلگىرى سۈرۈلمەكتە.
ۋاقىت گېزىتى ماقالىسىدە، خىتاي ۋەزىيىتىنى تەھلىل قىلىپ، خىتاي ئەمەلدارلىرىدا پارىخورلۇقنىڭ ئەۋج ئېلىشى، مىللىي سىياسەتتىكى باراۋەرسىزلىك قاتارلىق ئامىللار سەۋەبىدىن پۇقرالارنىڭ نارازىلىق نامايىشلىرى ئەۋج ئېلىۋاتقانلىقىنى ئوتتۇرىغا قويدى. مۇھاپىزەت گېزىتىدە خىتاي ھۆكۈمەت دائىرىلىرىنىڭ، خىتاي ۋەزىيىتىنىڭ مۇقىملىقىغا كاپالەتلىك قىلىش ئۈچۈن، پۇقرالارنىڭ قارشىلىق ھەرىكەتلىرىنى زور كۆلەمدىكى قوراللىق ساقچى، ئەسكەرلەر ۋە تانكا، برونىۋېك قاتارلىق ئېغىر قوراللار بىلەن باستۇرۇۋاتقانلىقى، ئىنتېرنېت ھەم تېلېفون ئالاقىسىنى كونترول قىلىش ئارقىلىق، پۇقرالارنىڭ پىكىر ئەركىنلىكىنى بوغۇۋاتقانلىقى، ئۆز ھۆكۈمرانلىقىنى ساقلاپ قېلىش ئۈچۈن، دۆلەت ئىچىدە خىتاي پۇقرالىرىغا قاراتقان باستۇرۇش سىياسىتىنى يەنىمۇ كۈچەيتىۋاتقانلىقى تەكىتلەندى.