Istanbulda "Sherqi türkistan shé'ir kéchiliki" ötküzüldi

Ixtiyariy muxbirimiz azigh
2020-11-16
Share
sherqi-turkistan-sheir-kechiliki.jpg Türkiye yazghuchilar birliki we Uyghur yash qelemkeshler birlikining orunlashturushi bilen istanbulda ötküzülgen "Sherqi türkistan shé'ir kéchiliki" de xatire süret. 2020-Yili 14-noyabir, türkiye.
RFA/Azigh

14-Noyabir türkiye yazghuchilar birliki we Uyghur yash qelemkeshler birlikining orunlashturushi bilen istanbulda "Sherqi türkistan shé'ir kéchiliki" ötküzüldi.

Pa'aliyetke türkiyede yashawatqan Uyghur sha'irliri, edibliri, oqughuchilar we her sahediki Uyghur ziyaliyliri qedem teshrip qildi.

Pa'aliyetke yash sha'ir imran sada'iy riyasetchilik qildi. Türkiye yazghuchilar birlikining istanbul shöbisining bashliqi mahmut béyikli mezkur kéchilikning ichilish murasimigha qatnashti we söz qildi. Mehmut béyikli bashqa pa'aliyetlerge sélishturghanda sherqi türkistan dawasi bilen munasiwetlik pa'aliyetlerning kishini téximu hayajanlanduridighanliqini tekitlep, mundaq dédi: "Bizning sherqi türkistan bilen chongqur rishtimiz bar. Bu rishtini yoqitish üchün herxil urunushlar ilip bériliwatqan, siyasiy chüshenchiler tingiliwatqan bolsimu, emma biz ularning héchqaysisigha ishenmeymiz. Hemmisini ret qilimiz. Bizning sherqiy türkistan bilen bolghan rishtimiz chongqur rishtidur, bu rishte qiyametkiche dawamlishidu."

Pa'aliyette yene teklipke bina'en qatnashqan qibris 15-noyabir uniwérsitétining oqutquchisi proféssor shewket nasiri ependim we doktor perhat qurban tengritaghli ependimler sherqiy türkistan dawasi we sherqiy türkistandiki medeniy miraslar toghrisida söz qildi.

Uyghur yash qelemkeshler birlikidin sha'ir abduxebir qadir erkan ziyaritimizni qobul qilip, mezkur pa'aliyetning teshkillinish jeryani we meqsiti heqqide tepsiliy toxtaldi.

Bu kéchilikte Uyghur sha'irlardin imran sada'i, alimjan sayrami, abduxebir qadir erkan, abdurehim parach, medine bawudun qatarliqlar weten heqqidiki shé'ir we nesirlirini déklamatsiye qilish arqiliq pa'aliyetke qatnashquchilarni intayin tesirlendürdi.

Mezkur pa'aliyetke amérikadin kélip qatnashqan Uyghur ziyaliysi medine'ay bawudun xanim ziyaritimiz qobul qilip, mundaq dédi: "Bügün türkiye yazghuchilar birliki teripidin orunlashturulghan shé'ir kéchilikige ishtirak qilghanliqim üchün nahayiti xursen boldum. Kéchilikte yash sha'irlirimiz özlirining weten'ge bolghan séghinishi heqqidiki tesirlik shé'irliri bilen kichilikni zilzilige saldi. Men bu shé'ir kichilikige qatniship intayin tesirlendim. Dawamliq bu xil medeniyet kéchiliklirining köplep uyushturulushini, bu arqiliq sherqiy türkistan dawasigha töhpe qoshulushini ümid qilimen."

Pa'aliyetke qatnashqan ziyaliylar we edibler birdek sherqiy türkistan dawasi heqqide muhim söz qildi we bu xil medeniyet pa'aliyetlirining sherqiy türkistan dawasini türk xelqige anglitishta muhim wasite ikenlikini tekitleshti. Bu heqte türkiye yazghuchilar jem'iyiti istanbul shöbisining bashliqi mehmut biyikli ependim ziyaritimizni qobul qilip mundaq dédi: "Sherqiy türkistan dawasini türk xelqige téximu yaxshi anglitish üchün medeniyet pa'aliyetlirini teshkillesh intayin muhim dep oylaymiz. Bu seweb bilen bügün bir shé'iriyet kéchiliki ötküzduq. Buningdin kiyin sherqiy türkistanni we sherqi türkistanning medeniyet bayliqlirini yéngi nesillerge tonutush we yetküzüsh üchün her xil yighinlar, kéchilikler we söhbetlerge oxshash medeniyet pa'aliyetlirini teshkilleymiz. Meqsitimiz sherqiy türkistan bilen türkiye otturisidiki küchlük munasiwetning edebiy jehettin dawamlishishini saqlash we öz'ara edebiy tonushqa ige bolushni ilgiri sürüshtin ibaret. Men bügün mezkur pa'aliyetke qatnashqan yazghuchilar, sha'irlar we ediblerge köp rehmet éytimen. Medeniyet alaqisini téximu kücheytish üchün türkiye yazghuchilar birliki bolush süpitimiz bilen qilishqa tégishlik wezipimizni téximu yaxshi orundashqa ishench we söygü bilen tirishimiz."

Pa'aliyet intayin qizghin keypiyatta ilip bérildi. Pa'aliyetning axirida Uyghur yash qelemkeshler birliki türkiye yazghuchilar birlikige xatire buyumi sowgha qildi. Tonulghan xitay tetqiqati mutexessisi perhat qurban tengritaghli bilen sha'ir mutellip seydullaning yéngi kitabliri pa'aliyetke qatnashquchilargha xatire buyumi süpitide sowgha qilindi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet