Уйғур деһқанлири сәпәр қилиш үчүн «4 хил испат» көрситип йол хети елишқа мәҗбур болмақта

Мухбиримиз қутлан
2014-05-13
Елхәт
Пикир
Share
Принт
Уйғур елиниң җәнубий вилайәтлиридики уйғур деһқанлири башқа юртқа сәпәр қилиш үчүн мәҗбурий беҗиридиған йол хети. 2014-Йили май.
Уйғур елиниң җәнубий вилайәтлиридики уйғур деһқанлири башқа юртқа сәпәр қилиш үчүн мәҗбурий беҗиридиған йол хети. 2014-Йили май.
Oqurmen teminligen

Игилишимизчә, уйғур елиниң җәнубий вилайәтлиридики уйғур деһқанлири башқа юртқа сәпәр қилиш үчүн «4 хил испат» тәйярлиши вә шу асаста йол хети беҗириши тәләп қилинмақтикән.

Йеқинда шаяр наһийәсиниң мәлум йезисидин үрүмчигә кесәл көрситиш үчүн чиққан бир деһқан йәрлик даириләрниң тәлипи бойичә йол хети беҗиргән. Униңда сәпәр қилғучиниң исми, кимлик номури, сәпәргә чиқиш сәвәби, алақилишиш телефони, бармақчи болған җайдики адреси, ким билән көрүшидиғанлиқи, көрүшмәкчи болған туғқини яки мунасивәтлик кишиниң исми һәмдә телефон номури қатарлиқ учурлар толдурулған. Йол хетиниң ахириға кәнт партийә ячейкисиниң тамғиси, кәнт секретариниң имзаси вә телефон номури йезилған.

Биз бу ишниң тәпсилати һәққидә ениқ учурға еришиш үчүн мәзкур йол хетигә имза қойған кәнт партийә секритариға телефон қилдуқ.

У телефонимизни қобул қилған болсиму, лекин телефонниң «әркин асия радиоси» ниң мухбиридин кәлгәнликини уққандин кейин, бундақ иш йоқ дәп инкар қилди.

Биз радиомиз тапшурувалған йол хетидә униң имзаси вә телефон номури барлиқини, униң кәнт секретари болуш сүпити билән реаллиққа көз юммаслиқини тәләп қилдуқ. У ахирида бу ишниң растлиқини етирап қилди.

Униң билдүрүшичә, кәнттин сиртқа чиқмақчи болған һәрқандақ кишиниң алди билән «4 хил испат» тәйярлап йол хети беҗириши керәккән. У буниң кәнт яки йезиниң қарари әмәс, бәлки юқири орунлардин кәлгән буйруқ икәнликини тәкитлиди.

У соалимизға җаваб берип мундақ деди:
«Бу бизниң кәнт яки йезиниң өз алдиға чиқарған қарари әмәс, бәлки юқиридин кәлгән буйруқ. Биз пәқәт шу буйруқни иҗра қиливатимиз. Бизниң кәнт яки йеза тәвәсидин сиртқа чиқмақчи болғанлар яки башқа юртлардин бизниң бу йәргә келип турмақчи болғанлар алди билән ‹4 хил испат' тәйярлиши керәк. Андин шу асаста уларға йол хети кесилиду яки вақитлиқ туруш кинишкиси беҗирип берилиду.»

У бизниң йол хети кесиштики мәқсәт зади немә дегән соалимизға «қанунсиз қилмишларниң алдини елиш, һәрқандақ кишиниң из-дерикини алалайдиған болуш» дәп җаваб бәрди.

У бизниң «4 хил испат» һәққидики соалимизға мундақ җаваб бәрди:
«4 Хил испат дегәндә чәкләнгән ишларни қилмиған яки бәлгилимиләрни бузмиған болуш (мәсилән, диний түстики кийим-кечәкләрни киймигән яки сақал қоймиған дегәндәк); җазаға учримиған, тутуп турулмиған яки түрмигә кирип қалмиған болуш һәмдә пиланлиқ туғут сияситигә хилаплиқ қилип артуқ балилиқ болмиған болуш дегәндәк шәртләр асасида кәнттин, пиланлиқ туғутни башқуруш ишханисидин, сақчиханидин вә йезилиқ һөкүмәттин алған испатларни көрситиду.»

У йәнә бизниң «навада сақал қойғучилар яки узун кийим кийип йүзини ориғучилар болуп қалса, уларға йол хети бериләмду?» дегән соалимизға мундақ җаваб бәрди:
«Уларға сақал қойма, чүшүрүвәт дәп идийиви хизмәт ишләймиз. Аялларғиму диний түстики кийим-кечәкләрни киймәсликкә нәсиһәт қилимиз. Уларни өзгәртип андин йол хети кесип беримиз.»

У зияритимиз ахирида йәнә мунуларни тәкитлиди:
«Һазир вәзийәт җиддий, биз давамлиқ чарлап тәкшүрүп туримиз. Әлвәттә, ишләпчиқиришни яхши елип бериш үчүн муқимлиқни сақлимисақ яки өзимизни өзимиз қоғдимисақ болмайду-дә! һазир кечә-күндүз кәнтимиздә хәлқ сақчилири билән ярдәмчи сақчилар чарлаш елип бариду, бәзидә кәнт аммисиниму сәпәрвәр қилимиз. Йеза вә наһийәдин келип чарлайдиған сақчиларму бар. Әһвалимиз шу.»

Тәпсилатини аваз улиништин аңлиғайсиз.

Пикирләр (0)
Share
Толуқ бәт