Арзугул турсун 16 ‏- ноябир кәчтә йәнә бир қетим хитай қолидин қачқан

Ғулҗа шәһиридики су дәрваза дохтурханисида бала чүшүрүш оператсийисини күтүп ятқан арзугүл турсун йәкшәнбә күни кәчтә йәнә бир қетим батурлуқ көрсәтти.
Мухбиримиз шөһрәт һошур
2008.11.17
Congress-Joe-Pitts-305.jpg Америка авам палата әзалиридин йәнә бири Joe Pitts әпәнди арзугүл турсун мәсилиси һәққидә хитай һөкүмитигә наразилиқ билдүргән болуп, сүрәт, Joe Pitts әпәндиниң хитай һөкүмитини арзугүл турсунға қарита елип берилмақчи болған бала чүшүрүш оператсийисидин ваз кечишкә вә уни қойуп беришкә чақирған байанатиниң өз тор бетидики көрүнүши.
www.house.gov

Арзугүл турсун шу күни кәчтә йәни оператсийидин бир кечә аввал дохтурханидин қачти. Әмма бир күндин кейин йәни дүшәнбә чүштин кейин хитай сақчилири уни йошурунуп турған йеридин тутуп кәлди. Бу қетим арзугүл су дәрваза дохтурханисиға әмәс, или областлиқ ана - балилар дохтурханисиға орунлаштурулди.

Арзугул турсун бу қетимқи батурлуқи билән һамилисини дүшәнбә күнидики оператсийидин сақлап қалди. Әмма һамилиниң һаяти йәнила тәһдит астида.

Арзугул турсун дохтурханиға елип келингәндин кейин, дадиси турсунҗан һәсәнму дохтурханиға чақиртилған вә опиратсийә тохтамнамисигә қол қоюшқа қисталған. Турсунҗан һәсән қол қоюшни рәт қилған.

Областлиқ сиясий кеңәшниң башлиқи абдувайит һаҗи турсунҗан һәсәнгә хизмәт ишлигән вә тохтамға қол қойсиду - қоймисиду балиниң оператсийә қилинидиғанлиқини, шуңа қол қоюши керәкликини өгәткән. Турсунҗан һәсән узунға созулған талаш - тартиш вә тәһдитләрдин кейин мақулнамиға қол қойған.

Игилишимизчә, арзугүлниң ениқ қайси чағда опиратсийә қилинидиғанлиқи мәлум әмәс, сестиралардин бириниң билдүрүшичә, әтә йәни сәйшәнбә күни әтигән 8 дә; йәнә бириниң билдүрүшичә йәнә саламәтлик тәкшүрүшидин кейин йәни әң балдур болғанда чаршәнбә күни опиратсийә қилинмақчи.

Хитай дохтурлири 6 айлиқ һамилә үчүн пичиқини биләп турған мушу минутларда, муһаҗирәттики уйғур паалийәтчилири һамилини қутқузушниң йоллирини издимәктә.

Америка уйғур бирләшмисиниң баш катиби алим сейтоф әпәнди бу һәқтә қарашлирини билдүрди.

Бүгүнки программимизда, арзугул турсунниң йәкшәнбә күнидики қечиш вә қандақ тутулуп қалғанлиқи тоғрисидики әһваллар һәққидә игилигән мәлуматимиз, арзугүлниң йолдиши нурмәмәтниң ейтқанлири, вә назарәтчи хадим бумәрйәмниң ейтқанлирини силәргә сунимиз.

Һөрмәтлик оқурмәнләр, арзугул турсун вә униң һамилисиниң әһвали һәққидә әтики программимизда йәнә мәлумат беримиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.