Amérika-xitay-pakistan munasiwetliri we talibanlarning hujumi

Roytrs agéntliqining bayan qilishiche, talibanlar yekshenbe küni pakistanning karachidiki mihran hawa armiye bazisigha ushtumtut hujum qozghighan. Pakistanning mihran hawa armiye bazisida postta turghan we közetchilik qiliwatqan 100 neper eskiri, shu küni kech sa'et 11din kéyin, hujum qozghighan 6 neper taliban bilen 10 nechche sa'et étishqan. Pakistan qisimliri axirqi hésabta, talibanlar görüge éliwalghan 17 neper chet'ellikni qutquzuwalghan. Talibanlar bu hujumni, amérikining osama bin ladénni mexpiy öltürgenlikige qarshi élip barghan öch élish dep jakarlighan.

Pakistan ichki ishlar ministiri raxman malikning éytishiche, térrorchilar pakistanning mihran hawa armiye bazisigha hujum qilghan weqede, pakistan tereptin 16 adem ölgen (buning 10i esker), 20 adem yarilan'ghan. Pakistan hawa armiyisining mexsus térrorchiliqqa qarshi urush üchün teyyarlighan urushchi ayropilanliridin P-3C belgilik su asti paraxotlarni charlashta qollinidighan, amérikidin sétiliwalghan ikki ayropilani pachaqlan'ghan. Talibanlardin 3 i étip öltürülgen, yene biri özini partlitip ölgen, ikki térrorchi neq meydandin qéchip ketken.

Uning éytishiche, bu weqede térrorchilar teripidin görüge éliwélin'ghan 17 neper chet'ellikning 11i xitay, pakistan hawa qisimliri üchün uchquchi terbiyiligüchiler, 6 si amérikiliq ayropilan mixayniki. Pakistan qisimliri bu 17 neper chet'ellikning aran birini qutquzalmighan.

Pakistan bash ministiri yüsüp gilani düshenbe küni, pakistanning mihran hawa armiye bazisigha qilin'ghan térrorluq hujumda hayatidin ayrilghanlarni qehriman dep jakarlighan. Bu weqede térrorchilar bilen élishqan pakistan eskerlirini pakistanning pexri dep medhiyiligen.

Amérika awazining bayan qilishiche, 6 neper taliban pakistanning karachidiki mihran hawa armiye bazisigha hujum qilip, pakistanning urush ayropilanlirini pachaqlap, bu herbiy bazida heriket qiliwatqan 17 neper chet'ellikni görüge éliwalghanliqi we yüzligen pakistan eskiri bilen 10 nechche sa'et étishqanliqi, bu shiddetlik étishishta talibanlardin yene bir nechchisi saq qélip, hetta neq meydandin qéchip chiqip ketkenliki élan qilin'ghandin kéyin, xelq'arada bir munche döletlerde, pakistan qisimlirining iqtidarigha nisbeten chong guman peyda bolghan.

Xewerde éytilishiche yene, axbarat yighinigha qatnashqan muxbirlar xitay tashqi ishlar ministirliqining bayanatchisi jang yüning, talibanlar pakistanning karachidiki hawa armiye bazisida görüge éliwalghanlarning ichide xitay puqrasi barliqi, shundaqla pakistanning, xitayni karachida déngiz armiye bazisi qurushqa alliqachan teklip qilghanliqidin ibaret xelqi -alemge ashkara ishlarnimu étirap qilmighanliqidin hezer eyligen.

Shinxu'a agéntliqining kabuldin bayan qilishiche, bügün amérika, pakistan, afghanistan diplomatliri kabulda ötküzgen üch terep söhbitide, pakistan diplomatliri, afghanistanning talibanlar bilen kéliship, döletni birlikke keltürüshige yardem qilidighanliqini jakarlighan.

Amérika prézidénti obama yekshenbe küni yawropa ziyaritini bashlash aldida b b s agéntliqigha, amérika pakistanning igilik hoquqigha hörmet qilidighanliqini, emma pakistanda dawamlishiwatqan amérikigha qarshi heriketlerge süküt qilip turmaydighanliqini, buningdin kéyin, amérikining bixeterlikige kapaletlik qilish üchün, xuddi amérika alahide qisimliri osama bin ladén'gha qarshi qozghighan mexpiy heriketke oxshash hujumlarni pakistanda we her qandaq bashqa jayda yene qozghaydighanliqini eskertken. Obama sözide, afghanistan bilen talibanlar söhbet arqiliq tinchliq imzalap, döletni birlikke keltürüshi, talibanlar özi aldi bilen elqa'idichilerdin alaqisini üzüshi kéreklikini tekitligen.