Арзигүл турсунниң дадиси турсунҗан һәсән қолға елинған

Уйғур кочилириниң биридә кетип барған уйғур бовай.

Турсунҗан һәсән бултур қизи арзигүл турсунниң һамилисини планлиқ туғут опиратсийәсидин қутулдуруш үчүн һөкүмәткә қарши мәйданда турған вә сақчилар билән бир қанчә қетим тиркәшкән иди.

Муһаҗирәттики уйғур тәшкилатлириниң вә америка парламент әзалириниң вәқәгә арилишиши билән турсунҗан һәсән шу қетимқи күришидә ғәлибә қилған. Йәни қизи арзигүл турсунниң опиратсийәси әмәлдин қалдурулуп, нәвриси сақ - саламәт дуняға көз ачқан иди.

Әмма шуниңдин кейин хитайниң йәрлик һөкүмәт тармақлири турсунҗан һәсәнгә өчмәнлик нәзиридә қарашқа вә уни назарәт қилишқа башлиған. Алди билән сақчи тармақлири уни изчил һалда сорақ қилип, арзигүл турсун мәсилисини чәтәлгә ашкарилиған кишини тепип беришкә қистиған, йәнә бир тәрәптин, йезилиқ һөкүмәт тармақлири униңға өч елиш шәклидә муамилә қилип, нормал деһқанчилиқ паалийәтлирини дәхлигә учратқан. Болупму униң йәр - мөлүк һоқуқиға дәхли - тәрүз қилишқа башлиған.

Бу йил язда, дадамту йезисиниң арададамту кәнтидә йәр маҗираси йүз берип, арададамту аяллири һөкүмәт даирилиригә колликтип қаршилиқ көрсәткәндә, даириләр, турсунҗан һәсәнни мәзкур вәқәни қутратти дәп гуман қилған.

Игилишимизчә, турсунҗан һәсән қолға елиништин аввал аилисигә, униң дөләтни парчилашқа урунуш җинайити билән гуманлиқ икәнлики һәққидә уқтуруш берилгән. Мәлум болушичә, у нөвәттә йеңиһаят түрмисидә қамақта, у, 11 ‏- ай ичидә ечилидиған сот һөкүмини күтмәктә.

Турсунҗан һәсәнниң конкрет нимә вәқә сәвәблик қолға елинғанлиқи һәққидә нөвәттә һөкүмәт тармақлириму, аилә - тавабатиму җаваб беришни рәт қилмақта.

Юқиридики аваз улинишидин, бу һәқтики мәлуматимизниң тәпсилатини аңлайсиләр.