Нурул исламниң дадиси 'оғлум гунаһсиз' деди

Хитай әдилийә тармақлири өткән йили 7 ‏- айниң 27 ‏- күни, 17 яшлиқ нурул ислам шербазини 5 ‏- июл күни үрүмчидә йүз бәргән вәқәгә четишлиқ дәп қолға алған. Нурул исламниң дадиси шербазхан (Sherbazkhan) пакистанлиқ болуп, у үрүмчидә ушшақ тиҗарәт билән шуғуллиниш арқилиқ турмушини қамдап кәлгән, нурул исламниң аниси пашаайим болса, хизмәттин бошитиветилгән.
Мухбиримиз әқидә
2010-04-22
Share
7-iyul-kuni-at-beyge-mehellisida-tutulghan-yash-Uyghur-osmur-305.jpg Сүрәт, 7 - ийул күнидики айаллар вә балилар намайишида тутқун қилинған йаш өсмүрләрдин бириниң хитай сақчилири тәрипидин тутуп елип кетиливатқан көрүнүш.
RFA Муштирилиримиз әвәткән сүрәт.

Әр ‏- аял иккәйлән, үрүмчи шәһәрлик 3 ‏- оттура мәктәп толуқ оттура иккинчи йиллиқида оқуватқан ялғуз оғли нурул исламни университетта оқутуш үчүн, мәйли иқтисадий җәһәттин вә башқа тәрәпләрдин болсун көп бәдәл төлигән, йәни шербазхан өз вәтинини вә уруқ - туғқанлирини ташлап үрүмчидә яшашқа мәҗбур болған.

Нурул ислам, 1992 ‏- йили 1 ‏- айниң 16 ‏- күни туғулған. Ақсу вилайәтлик оттура хәлқ сот мәһкимиси бу йил 13 ‏- април күни нурул исламни "қатиллиққа урунуш, қалаймиқанчилиққа күшкүрткүчилик қилиш җинайити садир қилған" дәп, мүддәтсиз қамақ җазасиға һөкүм қилған иди, бирақ униң аниси пашаайимниң билдүрүшичә, нурул ислам балилиқ дәвридин тартип һазирға қәдәр бирәр киши билән җидәллишип маҗра садир қилип бақмиған, қулиқи юмшақ, юваш вә мәктәп бойичә әла оқуған оқуғучи икән. Оғлиға берилгән җазаниң еғир болуп кәткәнликини ейтқан пашаайим аптоном районлуқ алий сот мәһкимисгә әрз сунуш үчүн тәйярлиниватқанлиқини билдүрмәктә.

Нурул ислам қолға елинғандин кейин, өз дөлитигә қайтип кәткән шербазхан һазир еғир кесәлгә гириптар болған, у дохтурханида туруп бизниң телефун зияритимизни қобул қилди вә оғлиниң гунаһсиз икәнликини билдүрди" :мениң балам хитай һөкүмити тәрипидин биһудә җазаға тартилди, әгәр ундақ болмиса, немә үчүн хитай даирилири икки күндә бир қетим маңа телефун уруп, " әгәр сән балаңниң мәсилисини ташқи дуняға тарқитишқа урунсаң, оғлуң техиму еғир әһвалға қалиду" дәп тәһдит қилиду? чүнки улар өзлириниң рәзил әпти - бәширисини йошурмақчи" деди.

Шербазхан хитай әдилийә даирилириниң, нурул исламни садир қилған җинайитини иқрар қилди дәп өлүм җазасиниң орниға мүддәтсиз қамақ җазаси һөкүм қилғанлиқи һәққидә тохтилип, "5 - июл күни, балам өйдин толуқ оттура 3 ‏- йиллиқ синипиға қобул қилиш емтиһаниға қатнишиш үчүн өйдин чиқип кәткән иди, у емтиһанни аяқлаштуруп қайтип келиш йолида, кочида намайиш йүз бериватқан пәйт болуп, немә вәқә йүз бәргәнликигә қизиққан оғлум кочида син алғу лентисиға чүшүп қалған, әһвал мушу. Мән өниңдин сән намайишқа қатнаштиңму дәп сориғинимда у маңа: 'яқ дада, мән бәк қорқуп кәттим вә дәрһал өйгә қайтип кәлдим' дәп җаваб бәргән иди. Мениңчә оғлум қаттиқ қейин - қистақ вә еғир қийнашларға бәрдашлиқ берәлмәй өзи үстидин чиқирилған сахта җинайәт хатирисигә қол қойди" дәйду.

Шербазхан йәнә мундақ дәйду: "гунаһсиз оғлумни қутулдуруш үчүн пүтүн дуняға илтиҗа қилимән, хитай түрмисидә ялғуз бир мениң оғлумла әмәс, миңлиған, онмиңлиған гунаһсиз уйғур пәрзәнтлири соланди, хитай һөкүмити бу хил рәзил қилмишлирини тохтитиши керәк, мениң пулум йоқ, бичарә йоқсиулмән, әмма ишинимәнки, адаләт алдида оғлум ақлиниду. У техи яш өсмүр, униң яшлиқи вә һаятиниң хитайниң қара зиндан түрмисидә набут болушиға адаләтпәрвәр инсанийәт дуняси һәргиз йол қоймайду."

Өмриниң ахириға қәдәр оғлини қутулдурушқа бәл бағлиғанлиқини билдүргән шербазхан, "мән бирләшкән дөләтләр тәшкилати, дунядики барлиқ кишилик һоқуқ тәшкилатлириға оғлумниң бешиға кәлгән трагидийини аңлитимән. Хитайниң бесимидин һәргизму қорқмаймән, әгәр улар аялимдин өч елишқа урунса, өзлириниң қанчилик дәриҗидики рәзил бир һакимйәт икәнликини испатлайду," деди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт