Бейҗиңдики әрздарлар намайиш қилип җу йүңкаңдин шәхси мүлкини ашкарилашни тәләп қилди

Мәлум болушичә, өткән җүмә күнидин башлап һәрқайси җайлардин бейҗиңға топланған әрздарлар намайиш қилип җу юңкаң қатарлиқ хитай әмәлдарлиридин шәхси мүлкини ашкарилашни тәләп қилған.

20 - Декабир күни хитайниң һәрқайси җайлиридин бейҗиңға йиғилған әрздарлар, айрим - айрим һалда бейҗиң университети, чиңхуа университети, бейҗиң җәнубий пойиз вогзали, хитай дөләтлик әрзийәт идариси қатарлиқ җайлар алдида қоллирида, хитайниң юқири дәриҗилик әмәлдарлиридин шәхси мүлкини аммиға ашкарилашни тәләп қилған хәтләр йезилған тахтиларни көтүрүп намайиш қилған.

Хитайниң бошүн торидики хәвәрдин мәлум болушичә, әрздарларниң намайиш қилиши, һәтта бир йәргә топлинишиниму үзлүксиз тосуп келиватқан бейҗиң сақчилири бу қетим, қоллириға “җу йүңкаң қатарлиқ парихор әмәлдарлар шәхси мүлкини аммиға ашкарилисун” дегән хәт бар тахтиларни көтүрүвалған әрздарларниң намайишини тосмиған.

Бошүн торидики намайиш һәққидики сүрәтлик хәвәрдин мәлум болушичә, бейҗиң җәнубий вогзалида намайиш қилған әрздарлар қолиға көтүрүвалған тахтиға: җу юңкаңға йезилған хәт дегән мавзу қоюлуп, “аңлишимизчә, җуңгода муқимлиқни сақлаш үчүн аҗритилған пул һәрбий хираҗәттин ешип кетипту. Пуқралар буниңдин һәйран болуватимиз. Сиз өзиңизниң пак әмәлдар икәнликиңизни испатлап, әрздарларниң һөрмитигә еришимән десиңиз, шәхси мүлкиңизни һәм муқимлиқни сақлаш үчүн аҗритилған хираҗәтни ашкарилаң. Сиздин сәмимилик билән үмид күтүватқан әрздарлардин” дегән җүмлиләр йезилған.

Бошүн тор бекитидики хәвәрдә йәнә, бейҗиңда әрздарларниң җу йүңкаңниң шәхси мүлкини ашкарилашни тәләп қилип намайиш қилишиға ниспәтән бейҗиң сақчилириниң сүкүттә туруши хитай тор бекәтлиридики җу йүңкаңниң парихорлуқ қилмишлири һәққидики пакитларниң һөкүмәт даирилириниму амалсиз һаләттә қоюватқанлиқи сәвәбидин икәнлики илгири сүрүлгән.

Намайиш һәққидики бир инкаста мундақ йезилған: нөвәттә тор бекәтлиридә паш болуватқан әмәлдарларниң парихорлуқ, чириклик қилмишиға аит хәвәрләр хәлқни ғәзәпләндүргән болса, һөкүмәт даирилирини амалсиз һаләттә қалдурмақта. Җу йүңкаң хәлқ арисида үзлүксиз һалда парихорлуқ вә чириклик билән әйиблинип келиватқан болсиму, әмма у муқимлиқни сақлашта хизмәт көрсәткән дәп қарилип, һазирғичә йиқилмай кәлгән иди. Ши җиңпиң өз һакимийитини мустәһкәмләш үчүн “әмәлдарлар ичидики чирикликкә зәрбә беридиғанлиқини елан қилди. Җу йүңкаңниң йеқини болған сичүән өлкисиниң муавин партком секритари ли чүнчең вәзиписидин елип ташлинип, тәкшүрүлүватиду. Әмди нөвәт парихор әмәлдар җу йүңкаңға кәлди.”

Хитайниң һөкүмәт ахбарати болған шинхуа агентлиқи қатарлиқлар 13 - декабирдики хәвәрлиридә, 18 - қурултайдин кейин мәркизи комитетниң кандидат әзаси болуп сайланған сичүән өлкисиниң муавин партком секритари ли чүнчеңниң еғир дәриҗидики интизамсизлиқ қилмиши сәвәблик вәзиписидин елип ташлинип, тәкшүрүлүватқанлиқи елан қилинип, у, 18 - қурултайдин кейин тунҗи қетим вәзиписидин елип ташлинип, тәкшүрүшкә буйрулған өлкә дәриҗилик әмәлдар дейилгән. Бошүн ториниң бүгүнки бир хәвиридә парихорлуқ билән әйиблиниватқан ли чүнчеңниң илгири бо шиләй, ваң лиҗүн қатарлиқлар билән бирликтә хитай мәркизи сияси бюрусиниң 9 әзасиниң бири болған җу йүңкаңниң йеқин адәмлиридин бири дәп қарилип келиватқанлиқи илгири сүрүлүп,ли чүнчеңниң җу йүңкаң җәмәтиниң байлиқ топлишидики йеқин һәмкарлашқучиси икәнлики пакитлири билән оттуриға қоюлған.

Йеңи ира гезитиниң бүгүнки хәвиридиму бейҗиңдики әрздарларниң намайиши һәм хитай әмәлдарлириниң чириклик қилмиши һәққидә хәвәрләр бесилған. Бу хәвәрләрдә нөвәттә ши җиңпиң қатарлиқ хитайниң йеңи рәһбәрлик гуруһиниң өз һакимийитини мустәһкәмләш үчүн хәлқ арисида чириклик қилмишлири ашкарилинип кәткән ли чүнчең қатарлиқ бир қисим әмәлдарларни җазалаш арқилиқ, хәлқниң барғанчә күчийиватқан наразилиқини бесишқа урунса, йәнә бир тәрәптин интернеткә қаритилған назарәтни техиму күчәйтип, әмәлдарларниң сәтчиликигә аит хәвәрләрни контрол қилишқа урунуватқанлиқи оттуриға қоюлди.

Нөвәттә хитай пуқралири арисида әмәлдарларниң чириклишиши, парихорлуқ қилмишлириға қарши садалар күчәйгән болуп,9 - декабир хәлқара парихорлуққа қарши туруш күнидә, ху җя қатарлиқ хитай зиялийлири, имза топлаш паалийити елип берип, министирдин юқири дәриҗилик 205 нәпәр хитай әмәлдарини өзи, аилә тавабиатлири вә уруқ - туғқанлириниң мал - мүлкини ашкарилашқа чақирған иди.

Хитайда тәсири күчлүк болған 100 нәччә зиялий имза қойған очуқ хәттә, йеқинқи йиллардин буян хитайда барғанчә әвҗ еливатқан һөкүмәт әмәлдарлиридики парихорлуқ, чириклик қилмишиниң хитай дөлитини вәйран болушқа башлап баридиғанлиқи агаһландурулған. Имзалиқ хәттә, хитай һөкүмитидики министирдин юқири дәриҗилик 205 нәпәр хитай әмәлдаридин 2013 - йили ечилидиған хитай хәлқ қурултийидин илгири шәхси мал - мүлкини аммиға ашкарилаш тәләп қилинған болуп, имзалиқ хәттә, хитай мәркизи һөкүмити тәрипидин уйғур елигә тәйинләнгән әмәлдарлардин һазир вәзипә өтәватқан уйғур аптоном районлуқ партком секретари җаң чүншйән вә уйғур аптоном райониниң рәиси нурбәкри қатарлиқ икки әмәлдарниңму исми тилға елинған иди. Имзалиқ хәттә, һөкүмәт әмәлдарлиридин өзиниң, җөрисиниң, пәрзәнтлириниң һөкүмәт хизмитигә тәйинлиништин илгирики вә вәзипә өтәватқан мәзгилидики турақлиқ вә турақсиз мал - мүлкини аммиға ашкарилаш тәләп қилинған иди.