Д у қ 4-нөвәтлик вәкилләр қурултийиға сайлинидиған вәкилләрниң салаһийити һәққидә уқтуруш елан қилди

Дуня уйғур қурултийиниң учур тарқитишичә, дуня уйғур қурултийи даимий комитети музакирә қилиш арқилиқ, д у қ ниң 4-нөвәтлик вәкилләр қурултийи вә 6-нөвәтлик уйғур рәһбәрләрни тәрбийиләш программисини 2012-йили 5-айниң 14-күнидин 20-күнигичә японийиниң пайтәхти токйода ечишни қарар қилғандин кейин, мәхсус “қурултай тәйярлиқ комитети” қуруп , тәйярлиқ хизмәтлирини җиддий шәкилдә елип беришқа башлиған.

Тәйярлиқ комитети 15 күндә бир қетим телефон йиғини чақирип тәйярлиқ хизмитини чиң тутуп ишлимәктә. 1-Айниң 22-күни чақирилған 4-нөвәтлик телефон йиғинида қурултайға сайлинидиған вәкилләрниң салаһийити вә дуняниң һәрқайси җайлирида паалийәт елип бериватқан шәрқий түркистан аммиви тәшкилатлириниң вәкилләрниң тизимликини 2-айниң 15-күнигичә дуня уйғур қурултийиниң мәркизигә әвәтишкә охшаш бир йүрүш қарарлар мақуллинип елан қилинди. Булардин башқа қурултайниң рәһбәрликигә намзат болушниң шәртлириму бекитилди. Бу қарарлар дуняниң һәрқайси җайлиридики тәшкилатларғиму әвәтилди.

Биз игилигән мәлуматларға асасланғанда, бу қетимқи қурултайда, муһаҗирәттә паалийәт елип бериватқан барлиқ шәрқий түркистан тәшкилатлириниң вәкиллири, җамаәт әрбаблири, вәтәнпәрвәр затлар, зиялийлар вә яшлар вәкиллириниң қатнишиши билән шәрқий түркистан дәвасини техиму күчләндүрүшниң чарә-тәдбирлири, пилан-программилири музакирә қилинип муһим қарарлар мақуллинидикән. Д у қ баш катипи долқун әйсаниң ейтишичә юқиридики сәвәбләр түпәйлидин бу қетимқи қурултайға қатнишидиған вәкилләрниң сүпәт, салаһийитигә алаһидә етибар бериш қурултайниң көзлигән мәқситини мувәппәқийәтлик ишқа ашуруш үчүн зөрүр икән.

Бу һәқтә техиму тәпсилий мәлумат елиш үчүн қурултайниң тәйярлиқ комитети мәсуллиридин бири долқун әйса билән сөһбәт елип бардуқ.