D u q rehberliri yawrupa parlaméntida pa'aliyet élip barmaqta

Sürette, rabiye xanim we d u q rehberliri yawrupa parlaméntining muwain resi libor roujek bilen birge.

Chet'ellerdiki Uyghur siyasiy teshkilatlirining wekillik orgini bolghan d u q bu weqege qarita jiddiy inkaslar bildürüp, xitayning Uyghurlar üstidin élip bériwatqan ölüm jazalirini derhal toxtitish toghrisida xelq'arada bir qisim diplomatik pa'aliyetlerni qanat yaydurmaqta.

9 - Noyabir küni bélgiye paytexti béryussélgha bérip, yawrupa parlaméntida naraziliq pa'aliyetlirini qanat yayduruwatqan d u q rehberliridin dolqun eysa ependi ziyaritimizni qobul qilip, aldi bilen gherb démokratik döletliri, jümlidin yawrupa parlaméntining xitaydiki ölüm jazalirigha süküt qilishining xitayning qanliq qirghinchiliqigha shérik bolghan bilen barawer ikenlikini, bu mesilini dunya jama'etchilikige yenimu ochuq anglitish üchün d u q ning bir qatar teshwiqat pa'aliyetliri bilen shughullan'ghanliqini tilgha aldi.

Dolqun eysa ependi, bu yil 9 - ayda rabiye xanim bashliq d u q rehberliri yawrupa parlaméntini ziyaret qilghanda, yawrupa parlaménti rehberlirining xitayning qanliq qirghinchiliqigha qarita choqum inkas bildüridighanliqigha wede bergen bolsimu, bu wedining emelge ashmighanliqini, shu sewebtin bu qétim yawrupa parlaméntini qaytidin ziyaret qilip, yawrupa parlaméntining yuqiri derijilik rehberliri bilen uchrishish ötküzgenlikini eskertti.

Dolqun eysa ependi, bu qétimqi ziyariti jeryanida yawrupa parlaméntining mu'awin re'isi edward mk.Mili'an ependi qatarliqlar bilen körüshüp, yawrupa parlaméntini derhal bir qarar qobul qildurup, sherqiy türkistanda dawam qiliwatqan qanliq qirghinchiliqqa xatime bergüzüsh üchün térishchanliq körsitiwatqanliqini bildürdi.

Dolqun eysa ependi, yawrupa parlaméntining mu'awin re'isi edward ependining ijabiy pozitsiye bildürgenlikini we qisqa muddet ichide yawrupa parlaméntining choqum bir qarar qobul qilishi üchün küch chiqiridighanliqini tilgha alghanliqini eskertti.

Yuqiridiki awaz ulinishidin, bu heqtiki melumatimizning tepsilatini anglaysiler.