Ekberjan jamal sumrugh téléwiziyisi we erkin asiya radiyosigha uchur yetküzgini üchün 10 yilliq késilgen

Turpan shehiride olturushluq yash ekberjan jamal, 2007 - yili, sumrugh téliwiziyisi we erkin asiya radiyosigha uchur yetküzgini üchün ötken yilning béshida döletni parchilashqa urunush we dölet mexpiyetlikini ashkarilash jinayiti bilen eyiblinip 10 yilliq késilgen.
Muxbirimiz shöhret hoshur
2009-04-13
Élxet
Pikir
Share
Print
Shendung uniwérsitétida oquwatqan bir nechche Uyghur oqughuchilarning, chingdaw shehiridiki melum xitay saqchi da'iriliri teripidin qattiq urulup arqidin tutqun qilin'ghan körünüsh.
Shendung uniwérsitétida oquwatqan bir nechche Uyghur oqughuchilarning, chingdaw shehiridiki melum xitay saqchi da'iriliri teripidin qattiq urulup arqidin tutqun qilin'ghan körünüsh.
Süret boxun.com Tor bétidin élindi. Neshriyat hoquqi boxun.com Ning.

Ekberjan jamal nöwette ürümchidiki 4 - türmide jaza mudditini ötimekte. A'ilisi bolsa, ekberjannning naheq hem éghir jazalan'ghanliqini bayan qilip, alaqidar orunlarning ekberjannning délosigha qayta qarap chiqishini ümid qilidighanliqini bildürmekte.

Ekberjan jamal bu yil 24 yash, u 2007 ‏ - yili 12 ‏ - ayning 25 ‏ - küni döletni parchilashqa urunush we dölet mexpiyetlikini ashkarilash jinayiti bilen qolgha élin'ghan؛ 2008 ‏ - yili 2 ‏ - ayning 28 ‏ - küni sotlinip, 10yilliq késilgen. U hazir ürümchidiki 4 ‏ - türmide jaza mudditini ötimekte.

Ekberjan 2007 ‏ - yili 10 ‏ - ayda turpanda yüz bergen tijaretchiler namayishining awaz xatirisini chet'eldiki dostlirigha yollap bergen. Chet'eldiki dostliri mezkur awaz xatirisini xongkongdiki sumrugh téléwiziyisi we amérikidiki erkin asiya radiyosigha yeni bölümimizge yollap bergen. Sotta dölet mexpiyetliki dep qaralghan uchur töwendikilerdin ibaret.

Özini ashkarilashni xalimighan melum bir inkaschining bildürüshiche, ekberjan erkin asiya radi'osi we sumrugh téléwiziyiside élan qilin'ghan turpandiki namayish heqqidiki xewerni özining shexsiy tor bétide élan qilighan؛ mezkur xewerni 5400 din artuq kishi körgen.

Ekberjanning anisining éytishichimu,ekberjan qilghini üchün döletni parchilashqa urunush jinayiti bilen eyiblen'gen.

Ekberjan toluq ottura mektepni püttürgen, uningdin kéyin kurslarda oqup in'gilizche ögen'gen we chet'elge chiqip oqushni pilanlighan ghayilik bir yash bolup, uning 10yilliq késilishi a'ilisi bilen birlikte qolum - qoshna - mehelle jama'itiningmu küchlük naraziliqini qozghighan.

Ekberjan délosini bizge melum qilghan inkaschining bildürüshiche, ekberjan meyli soraq jeryanida yaki meyli sotta bolsun, qilghan ishidin pushman qilmaydighanliqini, chünki héchqandaq xataliq ötküzmigelikini eksiche, uchur élish we uchur yetküzüshtin ibaret eqelliy bir insaniy hoquqini qollan'ghanliqini we ziyankeshlikke uchrighuchilarning derdini dunyagha yetküzüshtek insaniy burchini ada qilghanliqini bildürgen.

Ekberjanning anisi ibadetxanim öz oghlidin pexirlinidighanliqini bildürüsh bilen bille alaqidar orunlarning oghlining délosigha qayta qarap chiqishini ümid qilidighanliqini bildürdi.

Ibadetxanim sözide, oghligha qilin'ghan heqsizliq tüpeyli hökümettin narazi emeslikini, buni peqet hökümettiki ayrim orun we ayrim shexislerning xizmet xataliqi dep qaraydighanliqini, we hökümet terepning oghli üstidin chiqarghan xata hökümini haman bir küni tüzütidighanliqinigha ishinidighanliqini bildürdi. We özining bu telipining alaqidar orunlarning diqqitige baldurraq yétip bérishi üchün axbarat sahesini yardemge chaqirdi.

Ibadet xanim bu telipini otturigha qoyghan kün del xitayning kishilik hoquq herket pilanini élan qilghan künige toghra keldi. Ekberjan jamalning uchur - alaqe hoquqini qollan'ghini üchün 10 yil késilgenlik weqesi, késilip bir yil 4 aydin kéyin yeni bügün axbarat dunyasigha ashkarilandi.

Nöwette amérika Uyghur jem'iyiti mezkur déloni xelq'ara sehnige élip chiqip, xitayni bügün élan qilghan kishilik hoquq herket pilani boyiche ekberjan jamal qatarliq wijdan mehbuslirini qoyup bérishke chaqirmaqchi.

Toluq bet