Rabiye xanimning yawropa ziyariti gérmaniyide axirlashti

"Bir dunya öyi" de chaqirilghan 6-féwraldiki murasimgha köpligen Uyghurlar qatnashqan bolup, bu murasim Uyghurlarning istiqlal marshi bilen bashlandi.

Murasimgha d u q bash katipi dolqun eysa ependi yétekchilik qildi we rabiye xanimning yawropada élip barghan ziyaritining asasi mezmunidin melumat berdi.

Uyghur milliy herikitining rehbiri rabiye qadir xanim Uyghur jama'itige nutuq sözlep, aldi bilen gérmaniye Uyghurlirining özini qizghin kütüwalghanliqigha minnetdarliq bildürdi.

Rabiye xanim öz nutqida d u q ning yillardin béri élip barghan pa'aliyetlirining netijisini sözlesh bilen birge, 5-ayda chaqirilidighan Uyghur aliy kéngishi yighini heqqide chüshenche bérip ötti.

Bu qétimqi yighinda yene, gérmaniye Uyghur ayalliri komitétining rehberlik apparatida élip bérilghan islahat heqqide, ayallar komitétining re'isi gülnar xanim melumat berdi.

Bu qétimqi murasimda köpligen témilar heqqide muzakire bolup ötti. Rabiye qadir xanim yighin xatimiside ziyaritimizni qobul qilip, özining yette dölette élip barghan ziyaritining netijilik bolghanliqini tilgha aldi.