Германийидики уйғурлар хитай җасуслириниң һуҗум нишаниға айланмақта

Германийә асасий қанунни қоғдаш идариси йеқинда доклат елан қилип, хитай җасуслириниң германийидики паалийәтлиридә җанлиниш болуватқанлиқини, уйғур вә тибәт сиясий паалийәтчилириниң көзитиливатқанлиқини һәм тәһдиткә учраватқанлиқини илгири сүрди.
Ихтиярий мухбиримиз әкрәм
2012.07.23
Uyghur-jasus-Rishat-305.jpg Германийидә нәшрдин чиқидиған “билд” намлиқ гезиткә берилгән уйғур җасус ришатниң сүрити. 2011-Йили 7-өктәбир.
RFA/Ekrem

Германийә асасий қанунни қоғдаш идариси хитай җасуслириниң германийидики паалийәтлири тоғрисидики доклатни елан қилғандин кейин, германийидики гезит-журналларда бу һәқтә мулаһизә вә муназириләр қанат яйди. Франкфурт мәҗмуә гезитиниң 18-июлдики мулаһизисидә доклаттин нәқил елинип, әйнән һалда “өктичи диний еқим болған фалүңгуңчилардин сирт, өз вәтининиң мустәқиллиқини қолға елиш үчүн һәрикәт қиливатқан уйғур вә тибәт тәшкилатлири хитай җасуслириниң ахбарат игиләш нишаниға айланған, һәтта улар хитай җасуслириниң тәһдитлиригиму дуч кәлгән” дейилгән иди.

Германийә долқунлири радиосиниң бу хусустики йеңи хәвәрлиридә, германийә асасий қанунни қоғдаш идарисиниң доклатта оттуриға қойғанлири әскәртилиш билән биргә, 2011-йили мюнхен шәһиридә уйғурларға қарши хитай үчүн хизмәт қилған үч нәпәр уйғур, бир нәпәр хитай җасусиниң сотқа тартилғанлиқи, уйғур сиясий паалийәтчилири вә тәшкилатлириниң һазир хитай җасуслири тәрипидин техиму қаттиқ тәқиб астиға елинғанлиқи тәкитләнгән.

Д у қ муавин рәиси үмид агаһи вә иҗраийә комитети рәиси долқун әйса әпәндиләр мәзкур доклат мунасивити билән зияритимизни қобул қилип, доклатта оттуриға қоюлған мәсилиләр һәм д у қ ниң хитай җасуслириниң паалийәтлиригә қарши тәдбирлири тоғрисидики соаллиримизға җаваб бәрди.

Германийә асасий қанунни қоғдаш идариси елан қилған доклатта йәнә, германийидә яшаватқан хитай дөләт тәвәликигә игә 79 миң кишиниң хитай җасуслириниң учур игиләш нишаниға айланғанлиқи, хитай җасуслириниң германийиниң иқтисадий учурлири, сиясий пиланлири, һәрбий һазирлиқлиридин тартип турмуш буюмлириғичә болған ахбаратларни егиливатқанлиқи көрситилгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.