“Yawropa sherqiy türkistan ma'arip jem'iyiti” xizmet merkizi achti

2013-Yili 1-yanwar seyshenbe gollandiyidiki “Yawropa sherqiy türkistan ma'arip jem'iyiti” ning yéngi échilghan xizmet zalida échilish murasim pa'aliyiti élip bérildi.

“Yawropa sherqiy türkistan ma'arip jem'iyiti” gollandiyide yashawatqan Uyghurlar sanining köpiyishige egiship, bu yerde élip bérilidighan pa'aliyetlerdiki orun mesilisi we ösüp yétiliwatqan ösmür balilarning telim-terbiye ishlirining sistémiliq élip bérilish teqezzasigha asasen, iqtisadning kem bolushi we Uyghurlarning tarqaq halette olturaqlishishi qatarliq türlük yétersiz amillargha bash egmey, bir yildin biri köp izdinish netijiside teyyarlighan bu merkezdiki tunji pa'aliyitini échilish murasim pa'aliyiti qilip orunlashturdi.

RFA/Pidaiy

Pa'aliyetke gollandiyide yashawatqan Uyghurlardin bashqa, türk we ereb qérindashlarmu qatnashti. Péshin namizidin yénip bashlan'ghan pa'aliyet, shu yer waqti chüshtin kéyin 5 yérimde axirlashqan bolsimu, öz yérining shadliqidin huzurlan'ghan Uyghurlar taki kech sa'et 8 gha qeder söhbetlirini dawam qildi.

“Yawropa sherqiy türkistan ma'arip jem'iyiti” omumiy ishlar mes'uli obulqasim ependi, qur'an kerim tilawitidin kéyin söz qilip, mezkur jem'iyetning bu merkezni échishtiki meqset-muddi'aliri heqqide toxtaldi.

Andin, mezkur jem'iyetning ma'arip ishliri mes'uli abduraxman qarim kichik ösmürlerning telim terbiye ishliridiki deslepki pilan-layihilirini anglitip, ata-anilarning birdek maslishishini telep qildi.

Uningdin kéyin, “Gollandiye islam fédératsiyi”, “Gollandiye diyanet ishliri wexpiy”, we “Zeyst jamesi”, “Tewhid jamesi” qatarliq gollandiyidiki herqaysi teshkilat we jamelerning wekilliri tebrik sözi qilip hésdashliqini bildürdi.

“Gollandiye islam fédératsiyi” re'isi mehmed yarmish ependi bu merkezning güzel we azade bir muhitini maxtap, Uyghur qérindashlarni bu pursetning qedrini bilishke chaqirdi.

Türkiyidiki “Sherqiy türkistan ma'arip we hemkarliq jem'iyiti” ning naziri abdulhekimxan mexsum we bash katip abdul'ehet hajimlar, shwétsiyidiki “Uyghur ma'arip uyushmisi” ning mes'uli nijat ependi we ömer qarim qatarliqlarmu yiraqlardin ziyaretke kélip, “Yawropa sherqiy türkistan ma'arip jem'iyiti” ning bu ghelibilirini tebriklidi we qimmetlik tejribe-sawaqliri bilen medet berdi.

“Yawropa sherqiy türkistan ma'arip jem'iyiti” 2006-yili teshkillen'gen we 2010-yili resmiy élan qilin'ghan. Ular gollandiyidiki Uyghurlarning dini éhtiyajlirini asas qilghan xizmetlerni ishlep kelmekte.