Se'udi erebistanida hedis musabiqiside Uyghur qizi xeyrunnisa mukapatlan

Musabiqide, mekke mukerreme shehiride torushluq Uyghur qizi xeyrunnisa abdulla ikkinchi derijilik mukapatqa irishken idi.

Musabiqining ghayisi we barliqqa kélishi

Emir nayif ibni abdul'eziz namidiki" hedis we hazirqi zaman ilimliri" namliq xelq'araliq musabiqining asasliq ghayisi peyghember eleyhissalamning hedislirini musulman perzentlirige yadqa aldurush we ularni peyghemberning körsetmisi boyiche terbiyilep chiqishtin ibaret bolup, yash ösmürlerning we her qaysi mektep we medrisilerdiki oqughuchlarning hediske bolghan qizghinliqini ashurush rolini oynap kelmekte. Mezkur musabiqe 7 yildin béri dawam qilip kelgen bolup, 2002 - yili se'udi erebistani hökümiti teripidin resmiy tizimgha élin'ghan we her yili bir qétim ötküzülüshi qararlashturulghan idi. Musabiqe nayif ibni abdul'ezizning shexsiy xirajiti bilen élip bérilidiken. Musabiqige dunyaning her qaysi jayliridin her millet musulmanliri erkin qatnishalaydu. Hazirghiche köpligen döletlerdin, hetta otti'ura asiya jumhuriyetliridinmu kélip qatnashqanlarmu bar iken.

Mukapatqa érishken Uyghur qizi

Se'udi erebistanining mekke mukerreme shehiridiki misfele mehelliside olturushluq oyghur qizi xeyrunnisa abdulla ereb tili we islamiy ilimler saheside elachi oqughuchilarning biri bolup, ötken yilidin bashlap, nayif ibni abdul'eziz namidiki " hedis we hazirqi zaman ilimliri" musabiqisige qatniship kelgen idi. Xeyrunnisa ötken yilqi musabiqide üchinchi derijilik mukapatqa érishken bolup, bu yil 15 - april küni medine munewwere shehiride ötküzülgen musabiqide, ikkinchi derijilik bolup tallinip, 35 ming se'udi erebistan riyali( yeni 9 ming 300 amérika dolliri) neq pul mukapatigha érishish bilen Uyghurlar ning tirishchanliqini, chet memliketlerde az sanliq süpitide hayat kechürsimu, ilim - meripet izdesh we oqup bilim élishqa bolghan heweskarliqi jehette bashqa milletlerdin qélishmaydighan, belki aldigha ötüp kétidighan jenggiwar rohini pütün dunyagha namayan qilghan boldi.

Se'udi erebistanining her qaysi sheherliridiki Uyghurlar Uyghur qizi xeyrunnisa abdullani tebriklidi we uninggha zor utuqlar tilidi. Uning mundin kéyinki musabiqilerde birinchi orunni élishigha tilekdashliq bildürüshti. Ularning éytishiche, xeyrunnisa abdullaning bu qétiqmi musabiqide mukapatqa érishkenliki Uyghurlar üchün shan - sherep keltüridighan ish iken.