Uyghur élining bezi jaylirida hijap keygen ayallarning aptobus we taksigha chiqishi cheklimige uchrimaqta

Süret, uyghur élining melum shehridiki kochilarning biride kétip barghan uyghur ayalliri kiyinishliridin bir körünüsh.

Uyghur ayallirining diniy we milliy yosunda kiyinish hoquqining cheklimige uchrighanliqi, hetta depsende qilin'ghanliqi, aqsuning sayram bazirida ötküzülgen “Ikki xil modél” körgezmiside yalingach halda ashkarilan'ghan idi. Bügün igilen'gen bir qisim uchurlardin qarighanda, mezkur weziyet, Uyghur élining bashqa jayliridimu dawam qilmaqta. Bügün ashkarilan'ghini hijapliq ayallarni teshwiqat arqiliq qamchilash emes, belki aptobus we taksigha almasliqtur.

5 - Iyul weqesidin kéyin, ürümchide xitay taksichilar Uyghurlarni, Uyghur taksichilarmu xitaylarni taksisigha almasliq ehwalliri körülgen؛ bu hetta xéli bir mezgilgiche omumliship qalghan idi. Yéqinda radi'omizgha kelgen inkaslardin melum bolushiche, nöwette, Uyghur élining bezi jaylirida hijap keygen ayallarning aptobus we taksigha chiqishi cheklimige uchrimaqta: yéqinda melum bir nahiye bazirida, hijap keygen bir a'ile kishiliri aptobusgha chiqirilmighan.

Islam dini Uyghurlar üchün öz milliy kimliklirini qoghdashta qoral we qorghanliq rol oynimaqta. Shunga xitay da'irilirining rayonning atalmish muqimliqini qoghdashta, diniy zatlargha, diniy pa'aliyetlerge we diniy étiqadi mustehkem kishilerge alahide diqqet qiliwatqanliqi, ularning ish - herketlirini nazaret qilishtin bashqa, ularning peyda qilghusi weqeliridin qoghdinish üchün bir qatar bixeterlik tedbirlirini yolgha qoyuwatqanliqi melum. Uyghur közetküchilerning qarishiche, hijapliq ayallarni aptobusgha almasliq ene shu bixeterlik tedbirlidin biri bolushi we bu, bezi jaylarda sinaq teriqiside yolgha qoyuluwatqan bolushi mumkin. Ötken ayda yene shu nahiye bazirida, 4 neper hijap keygen Uyghur ayal, 3 sa'et saqlighan bolsimu taksigha chiqalmighan. Beziler toxtighan bolsimu, ularning kiyimlirige diqqet qilghandin kéyin, ularni almastin yürüp ketken.

Nöwette, xitay hökümitining hijap keygen ayallarni aptobusgha chiqarmasliq heqqide mexsus uqturush tarqatqan - tarqatmighanliqi éniq emes؛ emma xitay köchmenlirini öz bixeterlikini qoghdash, bolupmu Uyghurlarning hujumidin qoghdinish heqqide agahlanduruwatqanliqi, bu toghrida mexsus teshwiqat xewerliri ishleshtin bashqa, bezi chaghlarda uqturush we höjjet tarqitiwatqanliqi melum. Bu yil 7 - ayning 18 - küni xotende bir guruppa pida'iylar nawagh saqchixanisigha hujum qilghan mezgilde, xitay hökümiti xotendiki xitay kadirlirini yalghuz yol mangmasliq, kechqurunliri sirtqa chiqmasliq qatarliq mezmunlarda telim bérip uqturush tarqatqan. Melum xitay taksichining ashkarilishiche, hijapliq ayallarning aptobus we takisigha élinmasliqigha xitayning teshwiqat xewerliri seweb bolghan.

Hörmetlik radi'o anglighuchilar, muhajirettiki Uyghur pa'aliyetchiliri yillardin béri dunya jama'itige Uyghur élida milletler munasiwitining xeterlik bir basquchta turuwatqanliqini, ikki millet arisida öz - ara ishinishning pütünley yoqalghanliqini, xitay we Uyghurdin ibaret ikki milletning birlikte yashash muminchiliki qalmighanliqini izchil bayan qilip kelgen. Yuqiriqi weqeler, ene bayanlarning toghriliqini ispatlimaqta.