Iran-ereb munasiwitidiki sürkilishler
2012.04.19

Hazirqi weziyette erebler iranni ereb döletlirining ishigha arilishiwaldi dep eyiblep kelmekte. Xususen, iran re'isi ehmedi nijadning bir qanche kün ilgiri iran bilen ereb birleshme xelipiliki otturisida talash-tartish mawzusi bolup qalghan we iranning bashqurushida turuwatqan kichik bir aralni ziyaret qilghanliqi ereblerning ghezipini ashuruwetken. Bu heqte her qaysi ereb döletliri bayanat élan qilghan.
Londonda chiqidighan ottura sherq gézitining 2012-yili 17-aprél sanida, misirliq yazghuchi abdusattar hetite dégen kishining qelimi bilen “Iran-ereb munasiwiti qaysi terepke qarap kétiwatidu?” dégen témida bir maqale élan qilin'ghan bolup, maqalide mundaq dep yézilghan:
“Iran erebler bilen bolghan munasiwitini yaxshilashni xalaydighanliqini pat-pat sözlep qoyidu. Emma turmastin ereb döletlirining ishlirigha ariliship kéliwatidu. Bu ehwal ereblerge nisbeten eks tesir bermekte. Mesilen: misir bilen iranning diplomatik alaqisining üzülüp qalghinigha 30 yildin ashti. Yéqindin biri iranliqlar misirliq muxbirlarni téhran'gha dewet qilip özining süritini yaxshi qilip körsitishke urunup baqti. Emma köp netije qazan'ghandek emes. Misirliqlar iran bilen munasiwetni yaxshilashning shertlirini iran terepke yetküzgen bolup, bu shertlerning béshida iran ereb döletlirining ishlirigha arilashmasliqi kérek idi. Emma iran bu shertlerning birigimu emel qilghan emes. Buni az dégendek, misirda pat-pat iranning jasusliri pash bolup turidu.”
Iran misirgha yéqinlashmaqta
Maqalide yene mundaq dep yézilghan:
“Misirda mubarek hakimiyiti örülgendin kéyin, islam döletliridin misirgha eng köp köngül bölüwatqan döletlerning biri irandur. Emma iranning sadaqitidin shekliniwatqan misir xelqi iran'gha qizghin mu'amile qilishni anche xalap ketmeydu. Misirdiki islami we xristi'an jama'etlirimu qizghin emes. Chünki iran xelq'aradiki chong döletler teripidin iqtisadiy jazagha uchrighan we qoshna döletliri bilenmu munasiwiti yaxshi bolalmighan bir dölet bolghanliqtin, iran'gha yéqinlashmaqchi bolghandimu éhtiyat bilen yéqinlishiwatidu. Iran re'isi ehmedi nijadning 1971-yili iran'gha qoshuwalghan ereb birleshme xelipilikining ebu musa arilini ziyaret qilishi ereblerning nepritini qozghap qoydi. Hetta bügün qatarda toplashqan ereb döletliri tashqi ishlar ministirlirimu bu ishni eyibleshti.”