Истиқлал гезити 5 яшта

Тәтқиқатчи журналист мәмәт имин батур тәрипидин 5 йилдин бери нәшир қилиниватқан истиқлал гезитиниң сентәбир ейилиқ 50 - саниниң баш бәт көрүнүши.

Чәтәлдики уйғурлар дуняниң һәрқайси җайлирида көп  санда гезит вә журнал чиқарған болсиму, бу гезит вә жорналларниң өмри узун болмиған. Әмма түркийиниң қәйсәри шәһридә чиқиватқан истиқлал гезити һазир бәш яшқа кирди.

Тәтқиқатчи җурналист мәмәт имин батур тәрипидин 5 йилдин бери нәшир қилиниватқан гезитниң сентәбир ейилиқ 50 - сани нәширдин чиқти. Гезит җәми 16 бәттин тәркип тапқан болуп, гезитниң биринчи бетидә баш мақалә, муһим хәвәрләр вә шәрқий түркистанниң хәритисигә йәр берилгән. Гезитниң 2 - бетидә дуня хәвәрлири, 3 - бетидә күн тәртиптики вәқәләр, 4 -  вә 5 -  бәтлиридә болса түрк дуняси һәққидики хәвәрләргә йәр берилгән.

Гезиттики пүтүн хәвәрләр рәңлик рәсимләр билән берилгән болуп, 7 - 8 -  бәтлиридә мәдәнийәт һәққидики мақалә вә хәвәрләргә, 9 - 10  - бәтлиридә болса йәнә дуняниң күн тәртипидики муһим хәвәрләргә, гезитниң  11 -  бетидә обзорларға йәр берилгән. Истиқлал гезити түрк тилида нәшир қилиниватқан болуп, гезитниң 14 - бетидә уйғур тилида йезилған  хәвәрләргә йәр берилгән. Истиқлал гезитидә йәнә әркин асия радиосида берилгән  муһим хәвәрләр түрк тилиға тәрҗимә қилинип елан қилинған. 

Истиқлал гезитиниң сентәбир ейилиқ саниниң биринчи  бетидә `шәрқий түркистанда кишиләр җениға тойди` мавзулуқ баш мақалиға йәр берилгән болуп, бу мақалидә нуқтилиқ һалда 8 - ай ичидә  қәшқәрдә,  кучада мәйданға кәлгән вәқәләр тәһлил  қилинип берилгән. Гезитниң түрк дунясиға айрилған бәтлиридә германийә, косова, булғарийидики түркләр  вә ирақтики түркмәнләр һәққидики хәвәрләргә йәр берилгән.

Гезиттә әркин асия радиоси мухбирлиридин өмәр қанатниң `яманярдики вәқә хәлқара җамаәтниң диққитини қайтидин уйғурларға буриди` мавзулуқ хәвири, шөһрәт һошурниң `қәшқәр яманяр йезисида  хитайниң 3 аманлиқ хадими өлтүрүлди` мавзулуқ мақалиси вә гүлчеһрәниң `шәрқий түркистанда олимпик мусабиқисидин кейин қаттиқ бастуруш һәрикити давамлишиду` мавзулуқ мақалиси елан қилинған.

Истиқлал гезити түрк тилида чиқириливатқан болуп, дунядики оттузға йеқин  дөләт вә районда гезитни тарқитиш вәкиллири бар икән. Биз истиқлал гезитиниң 5 яшқа киргәнлики мунасивити билән бу гезит һәққидә техиму тәпсили мәлумат елиш үчүн гезитниң баш тәһрири мәмәт әмин батур әпәнди билән сөһбәт елип бардуқ.