Uyghur déhqan: kirim örlimidi biraq mal bahasi örlep toxtimidi

Uyghur élining bazar analizigha da'ir uchurlardin melum bolushiche, iyul kirishidin bashlap, her xil istémal buyumliri, bolupmu kala we qoy göshige oxshash Uyghurlar asasliq istémal qilidighan yémekliklerning bahasi birdek yuqiri örlimekte.
Muxbirimiz gülchéhre
2011.08.04
Uyghur-boway-bazar-305 Bu, uyghur élining melum shehirining kochilirining biridiki uyghurlarning hayatidin bir körünüsh bolup, süret, yolda kétip barghan bir saqalliq uyghur boway we bazardin bir körünüsh.
RFA Photo

Ramzan kirishi bilen gösh we kündilik turmush buyumlirining toxtimay örlishi Uyghur musulmanlirining turmushigha biwasite tesir körsetmekte.

Uyghur élide chiqidighan “Shinjang géziti” 3-awghust “Istémal buyumlirining parche sétilish omumiy sommisi muqim ashti” dep xewer berdi, xewerde: Uyghur élide bu yilning aldinqi yérimida istémal buyumlirining sétilish omumiy sommisida éshish körülgenliki körsitilgendin bashqa, kirimning éshishi istémalning éshishigha tesir körsitip, yémek-ichmek, kiyim-kéchek buyumlirining sétilishi muqim ashti, yuqiri baha istémal buyumliri bolghan öy mülük, altun kümüsh we aptomobillarning sétilishimu 20% artuq ashti, dep körsitilgen.

Emma istémal sewiyisi oxshimaydighan sheher yézilarning perqi, déhqanlar bilen ishchi-xizmetchilerning istémal perqi ayrilmighan.

Emma yene shu künde shinjang mal bahasi uchurliri torida, Uyghur élining 8-ay kirishidiki yémeklik we tawar bahaliri analiz qilin'ghan. Xewerde, Uyghur éli déhqanlirining asasliq ishlepchiqirish iqtisadiy zira'et we méwilirining sétilish bazar bahasining 7-ayning axiridin bashlap shiddet bilen töwenlewatqanliqi, bolupmu paxtining sétilish bahasining töwenlishi, déhqanlarni“ Qish üstige judun bolghandek” yaman ehwalgha qoyuwatqanliqi körsitilgen.

Xewerdin melum bolushiche, 7-ayning axiri Uyghur élidin chiqidighan méwe-chéwilerning elwek waqti bashlinishi bilen tawuz, üzüm, shaptul qatarliq méwilerning sétilish bahasi birdek töwenlimekte iken. Biraq, bu yil kirgendin buyan teyyar yémek-ichmek türidiki istémal buyumlirining bahasi 15% tin 20% kéche örligenliki körsitilgen.

Bolupmu Uyghur élining her qaysi jaylirida kala we qoy göshi bahasining 7-ay kirgendin buyan téz örlep, bir kiloluq qoy göshining parche sétish bahasining 48 yüendin 55 yüen etrapida boluwatqanliqi körsitilgen.

Buning aldida “Ürümchi uchur tori” 26-iyul xewer élan qilip, qoy göshi bahasining shiddet bilen örlep, parche sétilish bahasining kilosi 50 yüendin éship ketkenliki, bir qoyning ming yüendin artuq kélidighanliqi, buning sheher ammisining kündilik turmushigha éghir tesir körsetkenliki, köp sandiki ammining istémal sewiyisining qoy göshining bahasi kilosi 35 yüendin ashqandin kéyin kötürelmeydighanliqi tilgha élin'ghan idi.

Biz mal bahalirining bolupmu, musulmanlar istémal qilidighan qoy göshi bahasining ramzan mezgilide téz örlishining Uyghur musulmanlirining ramzandiki kündilik istémal hayatigha qandaq tesirler élip kéliwatqanliqini bilish téléfon ziyariti élip barduq.

Qeshqer yopurgha nahiyisidiki bir Uyghur déhqan qoy göshining mushu bir qanche kün ichidila téz örlep kilosi 55 yüen'ge chiqqanliqi, buni köp sandiki déhqanlarning qobul qilip bolalmaydighanliqini bildürdi.

Oxshash nahiyidiki bir ma'ashliq kadir bolsa mal bahasining ölgenlikini inkar qilip, iqtisadning barghanche yaxshiliniwatqanliqini iqtisadiy kirimi bilen istémal sewiyisidin raziliqini ipadilidi.

Qoy göshi bahasining örlep ketkenlikini inkas qilghan yash déhqan bolsa, ma'ashliq ishchi- xizmetchilerning ma'ashimu mal bahasigha mas halda örligechke, mal bahalirining örlishi ulargha anche tesir körsetmigini bilen özige oxshash déhqanlargha éghir kélidighanliqini tekitlidi.

Uyghur élining iqtisadiy uchurliri mal baha uchurlirida kündilik yémek ichmek mal bahasining bolupmu qoy we kala göshi bahasining qachan muqimlishidighanliqini heqqide hazirgha qeder téxi éniq melumat yoq. Halbuki, buning Uyghur musulmanlirining kündilik turmushigha bolupmu, ramzan mezgilidiki kündilik istémal hayatigha éghir tesir élip kélidighanliqi melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.