'Asam birleshme azadliq fronti' ning qomandani teslim boldi we xitayda herbiy telim élip kéliwatqanliqini iqrar qildi

Süret, hindistanning eng chong shehiri, pul - muamile merkizi bolghan bombay shehiride, 11 ‏ - ayning 26‏ - küni kech saet 11 din 23 minut ötkende tosattin étilghan oq bilen bashlanghan térror hujumidin bir körünüsh.

Hinidstan da'iriliri hazir, mumbayda yüz bergen térrorluq délosidiki jinayet gumandarlirini sotlashqa teyyarliq körüwatidu. Mushundaq peytte, hinidistanda chiqidighan 'yéngi déhli xewerliri' bügün, 'asam birleshme azadliq fronti' dégen teshkilatning qomandani we yardemchisi qatarliq yette kishining teslim bolghanliqini xewer qildi. Hindistanning asam shitatigha chégridash bashqa shitatlar we etraptiki döletlerdiki uchur wastiliri we 'asiya waqti' géziti bu sezgür weqeni derhal köchürüp basti we tepsilatini téximu éniq xewer qilishqa térishti. Bu xewerning xitayche terjimisi aldi bilen xitaydiki munazire munberliride tarqaldi.

'Asam birleshme azadliq fronti' ning re'isi we qomandani arabida rajkowa teslim boldi

Birleshme agéntliqining bayan qilishiche, hinidstan chégra bixeterlik qisimlirining bayanatchisi rawi gendi bügün, hinidstanning asam shitatidiki 'asam birleshme azadliq fronti' dégen bu teshkilatning re'isi we qomandani arabida rajkowa, uning yardemchisi we a'ile teweliri bolup 7 adem 12‏ - ayning 4 ‏ - küni teslim boldi, dep jakarlighan.

Xewerde éytilishiche, 'asam birleshme azadliq fronti' dégen teshkilat 1979‏ - yili qurulghandin kéyin, asam shitatini hindistandin bölüp chiqish üchün qoralliq heriket qilishqa bashlighan. 1990‏ - Yillarda, hinidstan chégra qisimlirining 8 iskadironi we 4 déwiziyisi 'asam birleshme azadliq fronti' gha qarita qorshap yoqitish herikiti élip barghan. Shuningdin kéyin, bu teshkilat hindistanning asam shitatining melum jaylirida we asam shitatigha chégridash bolghan arunachalning nagalanda, manirur, mizoram, mégalaya rayonlirida shundaqla etraptiki bén'gal, sékkim, botan, népal, bérma we xitay qatarliq döletlerde yushurunup yürüp mexpiy qoralliq heriket bilen shughullinip kelgen.

'Asam birleshme azadliq fronti' ning qomandani arabida rajkowani bén'gal saqchiliri tutuwélip hinidstan'gha ötküzüp bergen

'Yéngi déhli xewerliri' de bayan qilishiche, 'asam birleshme azadliq fronti' ning qomandani arabida rajkowani bén'gal saqchiliri tutuwélip hinidstan'gha ötküzüp bergendin kéyin, u, asamdiki téléwiziye isitansiliri arqiliq özining teslim bolghanliqini jakarlighan. Shundaqla 'asam birleshme azadliq fronti' ning ezaliri nede herbiy telim alghanliqini ashkarilighan. Asam shitatining bashliqi tarun gogoy 'asam birleshme azadliq fronti' teslim bolup, bu shitatta tinchliq eslige kelgenlikini alqishlighan.

'Asam birleshme azadliq fronti' ning ezaliri 30 yildin buyan xitaydin herbiy telim élip we qoral bilen teminlinip kéliwatqanliqining neq delil -pakitliri dunyagha ashkara boldi

Bügün hinidistan gézitliride élan qilin'ghan bu xewer, 'asam birleshme azadliq fronti' ning qomandani teslim bolghanliqi bilenla emes, belki 30 yildin buyan mexpiy qoralliq heriket qilip, bu jeryanda 10 nechche ming biguna xelqni hayatidin ayrighan bu teshkilatning ezaliri xitaydin herbiy telim élip we qoral bilen teminlinip kéliwatqanliqining neq delil - pakitliri dunyagha ashkara bolghanliqi bilen hindistanning asam shitatini we bu shitatqa chégridash bashqa shitatlarni we etraptiki chégridash döletlerni zilzilige keltürdi.