Обулқасим өмәр йәкәндә бир хитайни өлтүрүп, икки хитайни яриландурған

Өткән чаршәнбә күни уйғур елиниң йәкән наһийисидә адәм өлтүрүш вә яриландуруш вәқәси йүз бәргән. Вәқәдә обулқасим өмәр исимлик бир уйғур, бир нәпәр хитайни пичақ тиқип өлтүргән вә икки нәпирини яриландурған. Наһийидики сақчиларниң мәлум қилишичә, вәқәниң келип чиқишиға һечқандақ шәхсий зиддийәт яки талаш - тартиш сәвәб болмиған.
Мухбиримиз шоһрәт һошур
2010-03-03
Share
Qeshqer-xitay-saqchi-matem-305 4 - Авғуст күнидики һуҗумда өлтүрүлгән 16 хитай қораллиқ сақчи хадимлириниң матәм мурасимға қатнишиватқан уйғурларниң йиғилип турушқан вә бир хитай сақчисиниң кишиләр топини назарәт қилип турған көрүнүши. 2000 Ға йеқин уйғурларму матәм мурасимиға қатнашқан болуп, бир нәччә кишиләр AFP мухбириға өзлириниң матәмгә буйруқ билән қатнишиватқанлиқини ейтқан.
AFP Photo

Вәқәниң, районда уйғурлар билән хитайлар арисида давамлишиватқан миллий сүркилиш вә миллий тоқунуш вәзийитиниң бир инкаси икәнлики мәлум.

Өткән чаршәнбә йәни 2 ‏ - айниң 24 ‏ - күни уйғур елиниң йәкән наһийисидә адәм өлтүрүш вә адәм яриландуруш вәқәси йүз бәргән. Вәқәдә обулқасим өмәр исимлик бир уйғур бир нәпәр хитайни пичақ тиқип өлтүргән, икки нәпирини яриландурған. Вәқәдин кейин обулқасим өмәр тутқун қилинған вә униң аилә тавабати сораққа тартилған.

Вәқә шу күни наһийә базиридики хитайлар топлишип олтурақлашқан, ечиветилгән район йәни "кәйфачү" дегән йәрдә йүз бәргән. Гулбағ сақчи понкитиниң муавин башлиқи су биңгониң билдүрүшичә, обулқасим өмәр бу йил 39 яш болуп, һазирға қәдәр униң һәр қандақ бир гуруппа яки тәшкилат билән алақиси барлиқи байқалмиған; вәқәни өз алдиға йәккә елип барған.

Гулбағ сақчи понкитиниң башлиқи ваң пуниң билдүрүшичә, вәқәдә яриланғанлардин бириниң әһвали еғир болғанлиқи үчүн қәшқәр шәһәрлик дохтурханиға йөткәлгән. Йәнә бир нәпири йәкән наһийилик дохтурханида даваланмақта. Вәқәдә өлгүчиниң аилә тавабати алдинқи күни хитайдин йәкәнгә йетип кәлгән. Нөвәттә өлгүчи аилә - тавабатлириниң қаттиқ нарази болуватқанлиқи, сақчиларниң уларға идийиви хизмәт ишләватқанлиқи мәлум.

Обулқасим өмәр йәкән наһийисиниң яқа ериқ йезисидин болуп, у вәқә йүз беришниң алдида йәкән базирида қол телефон тиҗарити билән шуғулланған; тиҗарәт сәвәби билән давамлиқ түрдә хитай өлкилиригә берип - келип турған.

Сақчиларниң билдүрүшичә, вәқәниң келип чиқишиға һечқандақ бир шәхсий зиддийәт яки талаш - тартиш сәвәб болмиған. Зияритимиз давамида, понкит башлиқи ваң пу, 5 ‏- июл вәқәсидин кейин йәкәндә 10 ‏- июл вәқәси йүз бәргәнликини ашкарилиди. Әмма 10 - июл вәқәсиниң тәпсилатини һәққидә мәлумат беришни рәт қилди.
 
Игилишимизчә, 5 ‏ - июл вәқәсидин кейин, йәкәндә бир түркүм яшлар намайиш өткүзүшни пиланлиған. Намайишни пиланлиғучилар йиғин өткүзүватқан пәйттә, сақчилар нәқ мәйданға бастуруп кирип тутқун қилған. Тутқунға қаршилиқ көрсәткән икки нәпәр яштин бири нәқ мәйданда етип өлтүрүлгән, йәнә бир нәпири яриландурулған.

Понкит башлиқи ваң пу, обулқасимниң өткән йили йәкәндә йүз бәргән 10 - июл вәқәси билән четишлиқ икәнликини билдүрди.

Нөвәттә, сақчилар вәқәниң характери һәққидә техи йәкүн чиқармиған. Әмма хитай өлкилиридә тиҗарәт қиливатқан уйғур яшлириниң шавгуән вәқәси һәққидики хәвәр ‏ - учурларни толуқ көргәнлики, қол телефон тиҗарити қиливатқан уйғур яшлириниң шявгүән вәқәсидики ечинишлиқ көрүнүшләрни толуқ көргәнлики мәлум. Шуңа обулқасим өмәрниң шавгуән вәқәси, 5 - июл вәқәси вә йәкәндә йүз бәргән 10 - июл вәқәсиниң тәсиригә учриғанлиқи, вәқәдә өлгән уйғур қериндашлириға һесдашлиқи сәвәблик, интиқам туйғуси билән һәрикәт қилғанлиқи еһтималға йеқин көрүлмәктә.

Юқиридики аваз улинишидин, бу һәқтики мәлуматимизниң тәпсилатини аңлайсиләр.
 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт