Osama bin ladénni amérikining alahide heriket guruppisi pakistanda étip öltürdi

El-qa'idichilerning rehbiri osama bin ladén, 2011-yili 5‏-ayning 1‏-küni kéchide pakistanda étip öltürüldi.

Amérika prézidénti barek obama bügün etigende bayanat élan qilip, amérikining alahide heriket guruppisining el-qa'idichilerning rehbiri osama bin ladénni, 5‏-ayning 1‏-küni kéchide pakistanda étip öltürgenlikini jakarlidi.

Birleshme agéntliqining bayan qilishiche, amérikining alahide heriket guruppisi osama bin ladénni étip öltürgen jay, pakistanning paytexti islam'abadtin 60 kilométir yiraqliqtiki tagh arisigha jaylashqan afghanistan bilen chégrilinidighan qebililer rayonidiki abbot'abad. Bu jayda pakistan hawa, déngiz we quruqluq qisimlirining aliy derijilik herbiy telim lagéri bar.

Osama bin ladén del mushu herbiy telim lagérining ichidiki bir alahide sélin'ghan üch qewetlik binada yoshurunup turghan. Buningdin 10 yillar burun bina qilin'ghan 2400 kwadrat métirliq bu üch qewetlik binaning etrapida égiz tam we sim tosuq bar, emma bu binada héchqandaq téléfon yaki intérnét alaqe tori yoq.

Xewerde éytilishiche, pakistanning mushu herbiy telim lagéridiki kishiler, amérika alahide heriket guruppisi tik ucharlar bilen bu qoruning ichige chüshkende yüz bergen 45 minutluq étishishning is-tüteklirini sirttin körgen.

Washin'gton waqit gézitining bayan qilishiche, afghanistan prézidénti xemit karzay, osama bin ladénning pakistanda öltürülgenlikini anglighandin kéyin, bu, bizning buningdin burun “Térrorchilar afghanistandin chiqmidi” dep jakarlighinimizning rastliqini ispatlidi, dédi, shundaqla, talibanlarni buningdin kéyin qolidiki qoralni tashlashqa chaqirdi.

B b s ning bayan qilishiche, fransiye prézidénti sarkozi amérikining bin ladénni qoghlap tutush herikitini medhiyilidi. Osama bin ladénning étip öltürülgenlikini, “Pütün yer sharining térrorchiliqqa qarshi körüshidiki bir muhim weqe” dédi.

En'gliye bash weziri kaméron, osama bin ladénning étip öltürülgenliki “Térrorchiliqqa qarshi turushtiki bir chong ilgirilesh, emma buning bilen térrorchilarning tehditi ayaghlishidu dégili bolmaydu” , dédi.

Rusiye uchur wasitiliri osama bin ladénning öltürülgenlikini, “Bu térrorchiliqqa qarshi urushning bir muhim yol belgisi” dep teswirlidi.

Amérika awazning bayan qilishiche, amérika bixeterlik qisimlirining tik ucharlar bilen heriket qilidighan alahide heriket guruppisi, osama bin ladénni pakistanning paytexti islam'abadqa yéqin bir jayda ushtumtut qozghighan hujumda étip öltürgenlikini ashkarilan'ghandin kéyin, amérika da'iriliri, qandaq qilip osama bin ladénning pakistanda yoshurunup turghanliqini heqqide, pakistan hökümitidin mes'uliyet sürüshte qilidighanliqini bildürdi.

Bezi uchur wasitiliri, osama bin ladéning pakistan'gha yoshurun'ghanliqidin ibaret bundaq bir mesile tüpeylidin, emdi amérika bilen pakistan otturisidiki munasiwetke tesir yétishi mumkin, dep mölcherlimekte.

Roytérs agéntliqining dubeydin bayan qilishiche, bügün ereb tilida qozghalghan munazirilerdin melum bolushiche, gerche osma bin ladén ölgen bolsimu, emma islamchilar buningdin kéyin yene jihad qilishni toxtatmaydiken.

Xitayning “Xelq géziti” bügün bu heqte élan qilghan maqaliside, “Amérika gerche daghdughiliq heriket arqiliq el-qa'idichilerni tarqitiwetkendek körünsimu, emeliyette ottura sherqtiki térrorchiliqqa qarshi urushta ghelibe qazinalmidi, belki térrorchiliq hazir téximu zoraydi, buningdin kéyin amérikining térrorchiliqqa qarshi urushi téximu müshkül bolidu”, dep bayan qildi.

Amérikida turushluq musteqil tetqiqatchi saw changching “Xitaygha nezer” tor gézitide bayan qilishiche, xitayning merkizi téléwiziye istansisining herbiy ishlar programmisi riyasetchisi jang shin bügün, osama bin ladén milyardlighan pulning rahitini körüp jim yatmay, amérikigha qarshi turup ölüshke razi bolghan ulugh milliy qehriman, dep maxtighan.

Saw changchingning yézishiche, bu, osama bin ladén ölgendin kéyin, emdi pütün yer sharida térrorchilarning baziri kasatlashqanliqtin, amérika térrorchiliqqa qarshi urushning muhim nuqtisini asiya-tinch okyan rayonigha yötkeydighanliqidin, burun bin ladén'gha kelgen bésim emdi, jem'iyettiki qara guruhlardin paydilinip xelqqe térrorchiliq qiliwatqan xitay kommunist partiyisige chüshidighanliqidin dérek béridu.