Хитай даирилири қәйсәр ана патигүл ғуламға әмди алдаш тәдбирини қолланмақта

Хитай даирилири қәйсәр ана патигүл ғуламни ғайиб оғли имаммәмәт елини издәштин ваз кәчтүрүш үчүн, 2010-йили униңға 10 күнлүк қамақ җазаси бәргән.
Мухбиримиз шөһрәт һошур
2013-01-09
Share
patigul-ghulam-305.jpg Ғайиблардин имаммәмәт елиниң аниси патигүл ғулам.
RFA/Shohret Hoshur

Патигүл ғолам үрүмчи аяллар түрмисидә җаза муддитини түгәткән күни өйигә қайтиштин аввал удул сақчи оргиниға берип өзини қамаққа буйруған сақчи хадимиға тил яғдурған иди. Бултур йәрмәнкә мәзгилидә хитай сақчилири уни кочида тартип-сөрәп йәнә бир қетим еғир тәһдит салған. Зораванлиқ тәдбирлири билән патигүл ғуламни йолидин яндуралмиған вә пәйлини юмшиталмиған хитай даирилири әмдиликтә униңға алдаш тәдбирини қолланмақта.

5-Июлдин кейин из-дерәксиз ғайиб болған яш имаммәмәт ели вә униң қиз дости.
5-Июлдин кейин из-дерәксиз ғайиб болған яш имаммәмәт ели вә униң қиз дости.
RFA/Shohret

Мәлум болушичә, үрүмчи шәһириниң дөңкөврүк әтрапидики бир аһалиләр комитетиниң рәһбәр вә хадимлиридин тәшкилләнгән 5 кишилик бир гуруппа, түнүгүн патигүл ғоламниң өйигә келип уни "йоқлиған" вә "һал сориған". Техи бирқанчә айниң алдида өзини кочида дүшкәләп тартип-сөрәп йүргән хитай секретарниң бу һал соришидин әҗәбләнгән патигүл уларниң бу иштики мәқсәт-муддиасини сориған. Даириләр, өзлириниң пәқәт һал сорап кәлгәнликини вә буниңдин кейинму ярдәмгә тәйяр икәнликини билдүргән һәм өзлири елип кәлгән бир халта гүрүч, 4 кило май вә бирқанчә он тухумни оттуриға қойған. Патигүл өзигә һечқандақ ярдәмниң керәк әмәсликини, пәқәт ғайиб оғлиниң учурини елиштин башқа дәрд вә еһтияҗиниң йоқлуқини ейтқан. Даириләр ғайиб оғулниң из-дерики мәсилисидә өзлириниң чарисиз икәнликини, бу мәсилини юқири органларниң аста-аста һәл қилип беридиғанлиқини ейтқан. Патигүл буниңға "мән маңа җай селип бериңлар демидим, ишқа орунлаштуруп қоюңлар демидим, пәқәт силәр тутуп әкәткән баламниң учурини бериңлар, өлүк яки тирикликини дәп бериңлар дәватимән, бу йәрдә аста-аста һәл қилидиған бир мәсилә йоқ" дәп қақшиған. Даириләр бу соалға җаваб бериштин өзини қачуруп патигүлниң қәлбини чүшинидиғанлиқини ейтқан һәм өзлириниң ярдәм беришкә тәйяр икәнликини билдүргән. Буниңға патигүл мундақ җаваб қайтурған:
-Силәрниң күчүңлар мени қамап қоюшқа, нәзәрбәнд қилип өйдин талаға чиқармаслиққа йәтти. Бир балини қарақчи тутуп кәтсиму, пуқра дегән һөкүмәтниң алдиға бариду, мән һөкүмәт тутуп кәткән баламни сүрүштә қилип баламниң алдиға бардим, әмма маңа җинайәтчигә охшаш муамилә қилдиңлар, мени харлидиңлар, бозәк қилдиңлар, мән сән хәқниң ярдимини қобул қилмаймән, совғисиниму алмаймән, өйүмдин йоқилиңлар, көзүмдин йоқилиңлар....

5-Июлдин кейин из-дерәксиз ғайиб болған яш имаммәмәт елиниң унван кинишкиси.
5-Июлдин кейин из-дерәксиз ғайиб болған яш имаммәмәт елиниң унван кинишкиси.
RFA/Shohret

Бу арида әйни чағда патигүлни кочида дүшкәләп тартип сөригән хитай партком секретари, шу чағдики зораванлиқи үчүн патигүлдин кәчүрүм сориған. Униң алдамчилиқини билип турған патигүл, балисини издәш давамида йолуққан һәқсизликләрниң һечбирини унтумайдиғанлиқини билдүрүп уларни өйидин һәйдигән.

Патигүлниң баян қилишичә, уни йоқлиған бу 5 кишиниң икки нәпири хитай вә әмәлдар, қалған икки нәпири өзигә нәзәрбәнд үчүн қоюлған уйғур хизмәтчи болуп, бу "һал сораш" зиярити давамида икки уйғур хизмәтчи оңушсизлиқ вә биарамчилиқ кәйпиятида олтурған, һәтта бири патигүл билән тәң көз йеши қилған; әмма икки хитай әмәлдар болса, бирдәм ечинған қияпәттә гәп қилса, бирдәм өзара кусурлишип күлүшкиму пурсәт тапқан.

Патигүл ғоламниң билдүрүшичә даириләр ахири елип кәлгән совғатлирини көтүрүшүп патигүлниң өйидин хапа һалда айрилған. Патигүл ғолам муәллип билән сөһбитиниң ахирида мундақ деди:
-15 Күн болди, сиздин телефон кәлмиди, телефониңиз бәш күнгичә кәлмисә җиддийлишимән, таң атқичә-таң атқичә сизгә дәйдиған сөз тәйярлаймән. Бу гәплиримни сизгә дәвалмисам йүриким сесип кетиду.

Юқирида хитай даирилириниң қәйсәр ана патигүл ғуламға әмди алдаш тәдбири қоллиниватқанлиқи һәққидә мәлумат бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт