Xitay hökümiti azsanliq millet qelemkeshliridin siyasiy meqsette paydilanmaqta

2001-Yili xitayning Uyghur aptonom rayonluq xelq hökümiti we partkomi “Shinjang millet ijadiyiti we milliyche-xenzuche terjime eserler qurulushi” ni yolgha qoyghan idi.

Xitay da'iriliri bu arqiliq Uyghur élidiki “Az sanliq millet yazghuchilirini yölep, ularni her millet ammisining meniwi medeniyet éhtiyajigha asasen milletler ittipaqliqini eks ettüridighan, güzel yurt makan qurup chiqishni meqset qilghan edebiy eserlerni ijad qilishqa ilhamlandurush” we eserlerning terjime hem almashturushini kücheytishni meqset qilidighanliqini bildürgen.

Bu nöwet tunji türkümde mushu xildiki edebiy eserlerdin neshrdin chiqqan 28 yürüsh eser tarqitilghan. Buninggha da'ir xewerlerde qaysi Uyghur yazghuchilirining qandaq eserliri kirgüzülgenliki heqqide melumat bérilmigen.

Biz xitay da'irilirining “Shinjang milletler ijadiyiti we milliyche-xenzuche terjime eserler qurulushi” gha Uyghur yazghuchiliridin kimlerning qaysi eserliri kirgüzülgenliki, yazghuchilar we ularning eserlirini qandaq shertler asasida tallan'ghanliqi heqqide melumat élish üchün Uyghur aptonom rayoni yazghuchilar jem'iyitining ezasi, Uyghurlardin közge körün'gen edebiy obzorchi memet polat ependini ziyaret qilduq, emma u kishi Uyghur élining edebiyat sen'et saheside yüz bergen bu ishlardin xewiri yoqluqini bildürdi.

Buning aldida Uyghur aptonom rayonluq partkomning orunlashturushi bilen Uyghur aptonom rayonluq yazghuchilar birleshmisi bu yil ichide yazghuchi sen'etchilerdin 1000 kishini terbiyilesh pilanini élan qilghan idi.

Tunji qarar terbiyilesh kursi7-apréldin 9-aprélghiche échilghan. Kursta ürümchi, shixenze, sawen, qaramay qatarliq jaylardin kelgen nesir yazghuchiliri terbiyilen'gen. Mezkur kursta ulargha asasen xitay kommunistik partiye-hökümitining Uyghur éli we az sanliq milletlerge qaratqan siyasiti, nöwettiki siyasiy-ijtima'iy weziyet, milletler munasiwiti we shinjang tarixi dégen témilarda siyasiy terbiyilesh élip bérilghan.

Da'iriler yene her qaysi millet yazghuchilirining “Inaq ötüp bir yaqidin bash chiqirip mas tereqqiy qilip birlikte güzel makan qurup chiqishni meqset qilghan eserlerni köplep ijad qilishi kérek” liki buninggha xitay partiye-hökümitining meblegh we shara'it jehettin yardem hem ilham béridighanliqini tekitligen.

Xelq'ara qelemkeshler teshkilati Uyghur qelem merkizining re'isi qeyser özhon ependi, xitay hökümitining heqiqiy ré'alliqni, xelqning arzusini eks ettürgen edebiy eser we yazghuchilarni qamal qilip, ularning erkinlikini türlük bésim bilen dexlige uchritiwatqan bir peytte, Uyghur élide sün'iy halda “Inaq jem'iyet berpa qilish” tek siyasiy teshwiqat muddi'asini tenqid qilip: xitay hökümiti heqiqiy qelemkeshlerni türmige élip yoqitip, özining orda yazarlirini bazargha sélishqa teyyarlimaqta, dédi.