Xelq'ara qelemkeshler merkizining 9-nöwetlik türmidiki qelemkeshlerning heq-hoquqini qoghdash yighini axirlashti
2011.03.29

Yighin'gha qatnashqan xelq'ara qelemkeshler Uyghur merkizining re'isi qeyser özhun ependi 3-ayning 26-küni ötküzülgen, xitaydiki qelemkeshler we Uyghur, tibet qelemkeshliri mesilisi muhakime yighinida sözge chiqip, “ Yawa kepter” namliq esiri tüpeyli 10 yilliq qamaq jazasigha uchrighan nurmuhemmet yasin qatarliq Uyghur qelemkeshlirining paji'elik teqdiri toghrisida doklat berdi.
Qeyser özhun ependi, xelq'ara qelemkeshler merkizining her qétimliq yighinida nurmuhemmet yasin mesilisi arqiliq bir pütün Uyghur mesilisini dunya yazghuchilirigha tonutup kéliwatqanliqini, bu qétimqi xelq'araliq yighindimu yüzligen dangliq yazghuchilargha Uyghurlarning azabliq hayat kechmishlirini anglitish pursitige érishkenlikini, “Yawa kepter” namliq eserning jem'iy 40 xil tilgha terjime qilin'ghanliqini éytti.
Xelq'ara qelemkeshler merkizining b d t we yawropa parlaméntidimu mexsus wekilliri xizmet qiliwatqan bolup, 3-ayning 26-küni ular xelq'ara qelemkeshlerge wakaliten b d t we yawropa parlaméntida élip barghan pa'aliyetliri toghriliq doklat bérip ötken idi. Qeyser özhun ependi Uyghurlar mesilisini ularning tirishchanliqi arqiliq b d t hem yawropa parlaméntigha anglitish imkanlirining barliqini, 2010-yili nurmuhemmet yasin mesilisini anglitip ötkenlikini tilgha aldi.