Süriyidin qachqanlarning échinishliq weziyiti

Süriyide namayish bashlinip axirqi mezgillerde süriye armiyisi we saqchilirining qanliq basturushi netijiside jénini qutquzush üchün minglarche süriyilikler türkiye chégrasi ichige panahlan'ghan idi.
Ixtiyariy muxbirimiz ömerjan
2011.06.27
suriye-namayish-jeset-305.jpg Süriyidiki namayishchilar hökümet tereptin öltürülgen sepdishining jesitini kötürüp namayish qilmaqta. 2011-Yili 8-may.
AFP
Emdi liwan terepte panahlinish üchün liwan chégrasi etrapigha qéchip barghan süriyiliklerning sani köpeymekte. Yene bir tereptin süriye armiyisi türkiye we liwan chégrasi etrapighiche yéqinliship bérip, süriyidin qachqanlarni bombilimaqta iken.

Liwanda panahlanmaqchi bolghan süriyiliklerning teqdiri

Londonda chiqidighan “Ottura sherq” gézitining 2011-yili27- iyun künidiki sanida,“Süriye armiyisi liwan chégrasighiche bérip yetmekte”dégen témida bir maqale élan qilin'ghan bolup, uningda mundaq déyilgen:“ Süriye armiyisi térroristlarni qoghlaymiz dégen bahane bilen liwan chégrasigha yéqin yézilarghiche yétip barghan. Süriye armiyisi liwan-süriye chégrasidiki “Qesir” dégen rayon'gha bésip kirip rayonni bombardiman qilghan. Süriyilik namayishchilarning wekilliridin birining bildürüshiche, jénini qoghdash üchün liwan chégrasi boyigha qachqan süriyilikler qorqunchidin bashqa yaqlargha qéchishqa mejbur bolghan.
Londonda turushluq süriyilik kishilik hoquq pa'aliyetchisi rami abdurahmanning éytishiche, süriye armiyisi süriyining liwan chégrasidiki “Qesir”rayonigha bésip kirgen. Rayondiki süriyiliklerdin kichik balilar, ayallar we yashan'ghanlardin bir guruppa kishi tünügün kéche liwan terepke qéchip kiriwalghan.
Süriyiliklerning bir böliki türkiye terepke qachqan. Hazirghiche türkiye chégrasidin kirip bolghan süriyiliklerning sani 12 minggha yetken. Liwanning shimalidiki okar dégen jayda panahlan'ghan süriyilikler süriye armiyisidin qorqup, rayondiki chérkargha kiriwalghan.”

Süriyide basturush dawam qilmaqta

Qatarning “El jezire” téléwiziye qanilining 2011-yili 27-iyun künidiki xewirige köre, tünügün süriyining demeshiq yéqinidiki kiswe dégen jayda süriye armiyisi teripidin étilip ölgenlerning jinaza murasimigha qatnashqanlarni süriye armiyisi oqqa tutqan bolup, bir qanche adem hayatidin ayrilghan.

Rami abdurahman “El jezire” téléwiziye qaniligha londondin bergen bayanatida mundaq dédi: “Süriyide namayishchilarni öltürüsh dawam qilmaqta.
Xelqning hökümetke qilche ishenchi qalmidi. 25-Iyun shenbe küni süriyining hems dégen yéride namayishchilardin 4 kishi süriye armiyisi teripidin étip öltürülgen idi. Tünügün yene kiswe dégen jayda jinaza murasimigha qatnashqanlardin bir qanche kishi étip öltürüldi. Süriye re'isi bir tereptin xelqqe chirayliq wedilerni bérip turup, hetta namayishchilarni kechürüwetkenlikini élan qilip turup, yene bir tereptin ularni öltürüp, tutqun qilip turmaqta.”
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.