Пакистан талибанлири осама бин ладен үчүн өч елиш һәрикитини башлиди

Бүгүн пакистан талибанлири кәйни-кәйнидин икки қетим чоң партлитиш вәқәси пәйда қилип, осама бин ладенниң өлтүрүлгәнликигә қарита тунҗи қетимлиқ өч елиш һәрикити, дәп җакарлиди.
Мухбиримиз вәли
2011.05.13
shapqadar-shehiri-taliban-partlash-305.jpg Талибанлар пакистанниң шапқадар шәһиридә партлаш вәқәси пайда қилди. 2011-Йили 13-май.
AFP

Пакистанда бүгүн кәйни-кәйнидин икки қетим чоң партлитиш вәқәси йүз бәрди. Вәқәдә бигунаһ хәлқтин 80 адәм өлди, 120 дин артуқ адәм яриланди. Ню-йорк почтиси гезитиниң баян қилишичә, пакистанда бүгүн партлаш вәқәси йүз бәргән шапқадар шәһәрчиси, америка алаһидә қисимлири осама бин ладенни етип өлтүргән абботабад мәһәллисидин 200 километир йирақлиқтики бир шәһәрчә. Бу шәһәрчә пакистанниң шималидики муһим чоң шәһәрләрниң бири болған пишавар шәһиригә йеқин.

 Бирләшмә агентлиқиниң баян қилишичә, бу вәқәләрдин кейин, пакистан талибанлириниң баянатчиси әһсанулла еһсан, бу, америка осама бин ладенни пакистанға кирип өлтүргән вәқәдин өч елиш үчүн елип берилған тунҗи қетимлиқ партлитиш болуп һесаблиниду, дәп җакарлиди.

Б б с ниң баян қилишичә, бүгүн пакистанниң шималидики муһим мәдәнийәт мәркәзлириниң бири болған пишавар шәһиригә йеқин бир шәһәрчидә йүз бәргән бу партлитиш вәқәси, йиллардин буян пакистанда йүз бәргән өзини өлтүрүвелиш характерлик партлитишларниң ичидә әң көп адәм өлгән вәқә болуп һесаблиниду.

Һиндистан тез хәвәр гезитиниң баян қилишичә, буниңдин үч күн бурун, йәни 5‏-айниң 10-күнидиму, пакистанниң қайбәр пақтунқава вилайитиниң новшира шәһиридә аптомобил партлаш вәқәси йүз берип, вәқәдә 3 сақчи өлгән (буниң бири аял сақчи), йәнә икки сақчи яриланған иди. Вәқә йүз бәргән бу җайму пишавар шәһиридин 40 километир йирақлиқта.

Пакистан пити хәвәрлиридә баян қилинишичә, 5‏-айниң 2‏-күнидиму, кәшмерниң җамбул шәһиридики удхампур районида икки қетим аптомобил партлаш вәқәси йүз бәргән иди. Буни ләшкәрий таибә йирақтин контрол қилиш техникисини қоллинип партлатқан.

Әнглийидә чиқидиған көзәткүчи гезити, америкида чиқидиған бүгүнки америка гезити қатарлиқ учур васитилири бүгүн, пакистан талибанлириниң осама бин ладен үчүн интиқам алимиз дегән баһанә билән, америка вә пакистан һөкүмәтлиригә қарши һәрикәт қозғап, йәнә қолида қорал йоқ бигунаһ хәлқни қиришқа башлиғанлиқини тәнқидләп мақалиләр елан қилди.

Афғанистанда болса әһвал башқичә, америка авазиниң баян қилишичә, бүгүн афғанистан парламентида, сиртниң тәсири болмиған һалда өз тәқдирини өзи бәлгиләш вә талибанлар билән мурәссә қилиш дегән бир чоң пилан музакирә қилинишқа башлиди.

Хәвәрдә баян қилинишичә йәнә, һиндистан баш министири манмохан афғанистан парламентида қилған сөзидә, афғанистанниң сиртниң тәсири болмиған һалда өз тәқдирини өзи бәлгиләш вә талибанлар билән мурәссә қилиш пиланини қизғин қоллайдиғанлиқини, шундақла, афғанистанни қайтидин қуруш үчүн 5 йүз милйон америка доллири ярдәм беридиғанлиқини җакарлиди вә бу ярдәмни тәдриҗий һалда 15 милярд америка доллириға йәткүзүшкә вәдә бәрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.