Türk dunyasi féstiwaligha Uyghurlarmu qatnashti

Türk dunyasi féstiwalida her qaysi türkiy milletlerning örp we adetliri, tarixi, edebiyat-sen'iti we hazirqi weziyiti tonushturulidu. Bulardin biri ötken hepte axirida türkiyining afyon wilayitining bolwadin nahiyiside ötküzüldi. Bu féstiwalgha Uyghurlargha wakaliten sherqiy türkistan medeniyet we hemkarliq jem'iyiti bash katipi ablékim selchuq bilen yawuz yildirim ependi qatnashti.

Bir kün dawamlashqan bu féstiwalgha tonulghan tarixchi proféssor mustafa kafali, proféssor sewgi chöktü kafali xanim, dr. Hüseyin yénicheri ependilerdin bashqa yén afghanistan türk jem'iyetliri fédératsiyisi, qirim tatarliri teshkilatlar birliki, gherbiy tirakya türkliri teshkilatliri fédératsiyisi, kerkük türkmenliri teshkilatliri birliki, aghiska türkliri teshkilati, anatoliye sha'ir, yazghuchi we bilim ademliri teshkilati, ezerbeyjanliqlar teshkilati we edirne qirim tatarliri jem'iyiti qatarliq 20 etrapida ammiwi teshkilat qatnashti. Bu féstiwalgha dangliq naxshichilardin érol büyükburch, zarema xanum esma, séwil memedowa we güler aqsoy xanim qatarliqlar alahide teklip boyiche qatnashqan we naxsha oqughan.

Kéyin barliq teshkilat mes'ulliri söz qilghan. Féstiwalda sherqiy türkistan medeniyet we hemkarliq jem'iyiti bash katipi ablikim selchuq ependi söz qilip, Uyghurlarning bügünki échinishliq weziyiti heqqide toxtalghan. U qilghan sözide pütün qérindash türkiy milletlerni Uyghurlargha yardem qilishqa chaqirghan.