Gu'entanamodiki 17 neper Uyghur türk metbu'atida

Süret, guentanamodiki 17 uyghurni tinch okyandiki 21 ming nopusqa ige palaw dölitining qobul qilghanliqi toghrisidiki xewerlerdin biri.

Bu xewer türkiyidiki chong kichik gézitlerning köpining  bügünki sanida, palawning menzirilirining resimliri bilen bésildi. Türkiyidiki eng chong gézitlerdin biri bolghan radikal gézitining xelq'ara xewer bétige resimlik qilip bérilgen bu heqtiki xewerning témisi Uyghur esirler aral döletke ewetilmekchi, türkiyining eng chong gézitliridin biri bolghan "milliyet" gézitide amérika 200 milyon dollarni bérishigila kichik aral döliti gu'entanamodiki Uyghur esirlerni  aldi témisida yer aldi.

Bulardin bashqa téléwizyilerde esir Uyghurlarni qobul qilidighan dölet chiqti, esir Uyghur türkliri azadliqqa érishti, tinch okyandiki kichik bir dölet Uyghurlargha ige chiqti, amérika 200 milyon dollar bérip Uyghurlarni kichik aral döliti palawgha yerleshtürmekchi, dégen'ge oxshash témilarda tarqitildi.
 
Xewerde mundaq déyilgen:  amérika 2001  - yilining axirida esir alghan 4 yil burun gunahsiz dep élan qilin'ghan 17 Uyghur xitaygha qayturulsa ölüm jazasi bérilidighanliqi üchün bularni amérika we yawropagha yerleshtürüshke tirishqan bolsimu emelge ashuralmidi. Axirida bu 17 Uyghurni  dunyada nahayiti az insan teripidin bilinidighan palaw döliti alidighan bolghan.

Xewerde yene palaw dölitining prézidéntining  dunya metbu'atlirigha bergen bayanatida amérikining bundaq bir muhim qararda bizdin yardem telep qilghanliqi üchün  pexirlenduq dégenlikini yézilghan. Xewerde  tinch okyan'gha jaylashqan palaw döliti heqqidimu qisqiche melumat bergen.
 
Bu xewerlerdin kéyin yeni, 6 - ayning 11 - küni türk téléwiziyiliri dawamliq  halda gu'entanamo türmisidiki 17 neper Uyghurning 4 nepirining erkinlikke érishkenliki heqqidiki xewerlerge yer bérishke bashlidi. Bu 4 neper Uyghurning shimaliy atlantik okyandiki en'giliye hamiliqidiki  bérmuda taqim arallirigha yétip barghanliqi xewer qilindi. Bezi türk téléwiziyiliri bérmuda taqim aralliri heqqidimu melumat bermekte.

Burun gu'entanamodiki bu Uyghurlarni türkiyiningmu qobul qilishi teklip qilin'ghan idi. Türk hökümiti hazirghiche bir jawab bermigen yaki pozitsiyemu bildürmigen idi. Emma türkiye parlaméntidiki öktichi partiyiler türkiyining gu'entanamodiki bu Uyghurlarni élishi kéreklikini chünki türklerninng Uyghurlar bilen qandash we dindash ikenlikini tekitligen idi. Emma 4 Uyghurning erkinlikke érishkenliki heqqide türk hökümiti yaki öktichi partiyiler héchqandaq pozitsiye bildürmidi.    

Bu xewerni anglighan türkiyidiki Uyghurlar xushalliqqa chömdi. Biz türkiyidiki Uyghurlar bilen bu heqte söhbet élip barduq.

Yuqiridiki awaz ulinishidin, bu heqtiki melumatimizning tepsilatini anglaysiler.