Xitay, yerlik da'irilerning jem'iyet muqimliqigha kapaletlik qilishini telep qildi

Xitaydiki ishsizliq mesilisining kündin - kün'ge küchiyip kétishi tüpeyli kélip chiqidighan naraziliqlarning aldini élish üchün, xitay merkizi hökümiti, her qaysi yerlik hökümetlerning jem'iyet muqimliqigha kapaletlik qilishini alahide agahlandurdi.
Muxbirimiz eqide
2008.11.24
Gansu-saqchi-305.jpg Sürette, gensu longnendiki naraziliq namayishida, xitay saqchiliri bir namayishchini tepmekte.
RFA Oqurmenliri teminligen

Bu arida xitayning paytextidiki béyjing da'iriliri yéngi bir istratégiye tüzüp, ishsizlarni qayta ishqa orunlashturush üchün mexsus xirajet ajritishni pilanlighan. Töwende muxbirimiz eqide silerge bu heqte élan qilin'ghan maqalilerning qisqiche mezmunini anglitidu.

Chet'el axbarat wastilirining " xitay hökümiti yerlik da'irilerning jem'iyet muqimliqigha kapaletlik qilishini telep qildi", " béyjing iqtisad ajritip karxanilarni ishsizlarni ishqa orunlashturushqa righbetlendürmekte " dégen témilarda élan qilghan maqaliliride, xitayning aliy derijilik hökümet xadimlirining, her qaysi yerlik hökümetlerni agahlandurup, ularning jem'iyet muqimliqigha kapaletlik qilish üchün chare ‏ - tedbir qollinishi kéreklikini otturigha qoyghanliqini bildürgen. Maqalide buninggha derhal awaz qoshqan béyjing sheherlik hökümitining yéngi bir istratégiye tüzüp chiqip, ishsizlarni qayta karxanilargha orunlashturushni qarar qilghanliqi élan qilin'ghan.

Xitayning ékisport sahesining éghir krizisqa uchrishi bilen teng, nöwette ishsizlarning sani kündin ‏ - kün'ge köpiyip jem'iyet muqimliqi tehdit astida qéliwatqanliqini tekitlewatqan közetküchiler, "xitayda ishsizlar sanining shiddet bilen köpiyishi, hökümet eng endishe qiliwatqan bir mesile" déyishmekte.

Béyjing sheherlik emgek we ijtima'iy kapalet idarisining bildürüshiche, buningdin kéyinki 3 yildin 5 yilghiche bolghan ariliqta, hökümet ishsizlarni qayta ishqa qobul qilghan idarini, qobul qilin'ghan kishi béshi hésabigha her yili 10 ming yüen xelq puli bilen teminleydiken.

Xitay jama'et xewpsizlik ministirliqining ministiri chang méngju'ang yekshenbe küni":yerlik hökümet xizmet istilini özgertip, jem'iyet muqimliqigha paydiliq muhit berpa qilishi kérek " dégen, u yene, hazirqi shara'itta, mewjüt boluwatqan jem'iyet mesililiri muqimliqqa tesir körsitidighan amillar hésablinidighanliqini, muqimliqni saqlashta yerlik hökümet choqum segek bolushi, bolupmu jem'iyet muqimliqining hazirqi eng muhim we eng jiddiy mesile ikenlikini tonup yétip, asasliq küchni chare ‏ - tedbir ishlitishke merkezleshtürüshi kéreklikini tekitligen.

Gerche xitay axbarat wastiliri, xitayda yüz bériwatqan ishsizliqni, dunya miqyasida yüz bériwatqan iqtisadi krizisqa baghlap, xitay ékisport sahesining xitay tashqi sodisigha éghir ziyan élip kelgenlikini, buning bilen nurghun zawut - karxanilarning taqilishqa mejbur boluwatqanliqini we buning eslide hökümet bash qaturuwatqan " ishsizliq "mesilisini yenimu bir baldaq yuqiri kötürüwetkenlikini otturigha qoyup kelgen bolsimu, emma chet'ellerdiki iqtisadshunaslar xitaydiki ishsizliqning tüp sewebining xitayda ishlepchiqirilghan saxta we süpetsiz mehsulatlar tüpeyli meydan'gha kelgenlikini ilgiri sürmekte.

Xitay hökümet da'iriliri, muqimliq bilen ishqa orunlashturush mesilisini halqiliq mesile qatarigha kirgüzüp, her qaysi yerlik hökümetlerni, béyjing sheherlik hökümetke oxshash chare - tedbir yolgha qoyushqa chaqirghan. Xewerlerdin melum bolushiche, yalghuz béyjingdila emes, xitayning bir qanche yerlik hökümetliri ishsizlarni qayta ishqa orunlashturush ishlirini yolgha qoyushqa bashlighan.

Xitay döletlik tereqqiyat we islahat komitétining yéqinda élan qilghan sitatistikiliq melumatlirigha qarighanda, bu yilning aldinqi yérim peslide xitayda 7 mingghiche bolghan ottura we kichik tiptiki karxanilar halak bolghan.

Ishsizliqtin kélip chiqidighan muqimsizliqtin endishe qilghan shendung bilen xubéy ölkilik hökümet, karxanilarning xizmetchilerni qisqartishini qattiq kontrol qilghan bolup, chet'el metbu'atlirining bildürüshiche, xu béy ölkisi 40 tin artuq ishchini xizmettin boshutushtin ilgiri yuqirigha doklat sunush, shendung chingdaw da'iriliri bolsa hökümetning testiqisiz 20 din artuq ishchini we yaki karxanining yüzde 10 ishchisini qisqartishqa yol qoyulmaydighanliqini qarar qilghan.

Lékin, xitay axbarat wastiliri ishsizliq hemmidin éghir bolghan Uyghur élining, xitay ölkilirige oxshash hökümetning yardem we righbet bérishi astida chare - tedbirlerni ishqa sélip, ishsizliq mesilisini hel qilishi heqqide héchqandaq bir uchur bermigen.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.