Xitay da'iriliri xubéydiki 2 Uyghurning öltürülüsh weqesini axbarattin yoshurmaqta

Süret, xitayning sichüen ölkisi suyning shehiride xitay puqraliri " bashqilargha yingne sanjidi" dégen guman bilen urup öltürüwetken 5 ademdin birining yerde yatqan we kishilerning ölishiwalghan körünüshi.

Melumatlardin qarighanda, ölgüchilerning a'ile‏ tawabatliri, yéqinliri we etraptiki Uyghurlar hökümetke naraziliq bildürmekte. Emma xitay hökümiti, tejribe - sawaqlirigha asasen weqening ürümchige we dunyagha ashkarilinishining aldini almaqta. Bügün radi'omizning xitayche bolümi alaqidar organlargha téléfon qilip, weqe heqqide melumat sorighan؛ da'iriler weqening yüz bergenlikini étirap qilghan, biraq tepsilati heqqide jawab bermigen.

Muxbirimiz melum bir saqchi xadimini ziyaret qilghanda, saqchi weqe gumandarini tutqanliqini, déloning tekshürülüwatqanliqini ashkarilighan.

Sheher ahalilirining muxbirimizgha bildürüshiche, sheherdiki Uyghurlar topliship sheherlik hökümet aldida naraziliq bildürgen. Saqchilar naraziliq bildürgüchi Uyghurlarni bir méhmanxanigha qamap kochigha chiqishini chekligen. Hökümet xadimliri ölgüchilerning a'ile ‏tawabatlirigha idiyiwi xizmet ishlep, weqeni shaw - shuw qilmasliqqa, we ishni chongaytmasliqqa ündigen.

Tordiki inkaslardin melum bolushiche, ikki Uyghurning ölümi sheherlik hökümet da'iriliri we sheher xelqini xélila ensizchilikke salghan. Xitay bir tereptin ölgüchiler a'ile tawabatigha xizmet ishlise, yene bir tereptin saqchilar kochilarda keng - kölemlik charlash élip bérip, Uyghurlarning kochilarda intiqam xaraktérlik ish chiqirip qoyushining aldini almaqta. Bir saqchi xadimining muxbirimizgha bildürüshiche, nöwette saqchilar bir neper weqe gumandarini tutqun qilghan. Bu saqchi Uyghurlarning weqedin kéyin naraziliq bildürgenlikini étirap qilghan we weqeni ténjitip bolghanliqini, sheher xelqidiki ensizchilikningmu tügigenlikini bildürgen.

Weqe yüz berginige bügün 5 kün bolghan bolsimu, hazirgha qeder xitaydiki héchqandaq bir metbu'at bu weqe heqqide xewer bermigen. Tor bashqurghuchilar hökümet tereptin mezkur weqeni xewer qilmasliq heqqide uqturush tapshuruwalghan. Bu sewebtin intérnéttiki bu heqtiki uchur we inkaslar udulluq öchürülgen.

Muxbirimiz sung pamililik bir kishini ziyaret qilghan. Sung Uyghurlarning sheherde asasen qanunsiz ishlar bilen shughullinidighanliqini, shunga kishilerning Uyghurlargha soghuq köz bilen qaraydighanliqini bildürgen. Sheher ahaliliridin yene biri, Uyghurlarning bu yerde asasliqi yémek - ichmek tijariti bilen shughullinidighanliqini, bu qétimqi weqening pewqul'adde bir weqe ikenlikini bildürgen. Bir nepiri, Uyghurlarning bu sheherde ish térip turidighanliqini, saqchilarningmu ulargha köngül bolup qattiq jazalimaydighanliqini, shunga bir qisim ahalilerning Uyghurlardin nepretlinidighanliqini bildürgen.

Emma xitay ölkiliride yashawatqan Uyghurlar, özlirining xitay ölkilirige amalsizliqtin kelgenlikini, öz yurtlirida ish orunlirini xitay köchmenliri igiliwalghachqa, yurtidin ayrilishqa mejbur bolghanliqini bildürmekte. Xitaydiki Uyghur tijaretchiliri bolsa özlirining dawamliq türde, xitay saqchiliri bilen xitay qara jem'iyet ezalirining hujumigha uchrawatqanliqini bildürmekte.

Bir qsim Uyghur ziyaliyliri xitay puqralirining Uyghurlargha hujum qilishini, xitay hökümitining Uyghurlargha tutuwatqan ashkara düshmenlik pozitsiyisining netijisi dep qarimaqta.

Bezi Uyghur ziyaliyliri, Uyghurlargha qanunluq yol bilen tijaret qilishning yolliri pütünley étiwétilgechke, bezi Uyghur yashlirining qanunsiz yollargha mejburlinip qéliwatqanliqini, bu yerde mes'uliyetning xitay hökümitide ikenlikini bildürmekte.

Yuqiridiki awaz ulinishidin, bu heqtiki melumatimizning tepsilatini anglaysiler.