ياۋروپادىكى موڭغۇل ئاكتىپلىرى ئامىستېردامدا نامايىش قىلدى

مەرگەن ئىسىملىك موڭغۇل چارۋىچىنىڭ خىتاي تەرىپىدىن ئۆلتۈرۈلگەنلىكىگە قارىتا شىلىنغول ناھىيىسىدە قوزغالغان نارازىلىق نامايىشى، خىتاي ساقچى-ئارمىيەلىرى تەرىپىدىن قانلىق باستۇرۇش خەۋپىگە دۇچ كېلىۋاتقان بۈگۈنكى كۈندە، ياۋروپادا ياشاۋاتقان موڭغۇل ئاكتىپلىرى گوللاندىيىنىڭ ئامىستېردام شەھىرىدىكى دام مەيدانىدا توپلاندى.

30-ماي سائەت 12 دە قوللىرىدا بايراق ۋە لوزۇنكىلارنى كۆتۈرۈۋالغان موڭغۇل نامايىشچىلار تۈرلۈك مەزمۇنلاردا شوئارلارنى توۋلاپ، خەلقئارالىق تەشكىلاتلار ۋە ئورگانلارغا خىتاب قىلىپ، ئۇلارنى بىگۇناھ موڭغۇل خەلقىنىڭ قىرغىن قىلىنىشىغا يول قويماسلىققا چاقىردى.

RFA/Pidaiy

بۇ مۇناسىۋەت بىلەن زىيارىتىمىزنى قوبۇل قىلغان موڭغۇل پائالىيەتچىلىرى يېتەكچىسى تىڭچىڭچۇ ئەپەندى مەقسىتىنى ئىپادىلەپ: موڭغۇل يايلاقلىرىنى قوغداش يولىدا قۇربان بولغان قەھرىمانىمىزنىڭ خۇن دەۋاسى بىلەن قوزغالغان شىلىنغول نامايىشى خەتەرلىك پەيتتە تۇرماقتا. شۇ سەۋەبتىن ياۋروپادىكى موڭغۇل خەلق پارتىيىسىنىڭ باشلىقى بولۇش سۈپىتىم بىلەن، ياۋروپادىكى دوستانە تەشكىلاتلىرىمىزنىڭ ھەمراھلىقىدا پائالىيىتىمىزنى ئامىستېردامغا مەركەزلەشتۈردۇق. بىزگە مەدەت بېرىپ يېقىندىن قوللاپ كەلگەن ئۇيغۇر ۋە تىبەت قاتارلىق تەقدىرداشلىرىمىزغا چىن كۆڭلۈمدىن رەھمەت ئېيتىمەن، دېدى.

بۇ قېتىمقى پائالىيەتكە خىتاي، تىبەت ۋە ئۇيغۇر قاتارلىق مىللەتلەرنىڭ ئاكتىپلىرىمۇ قاتناشقان بولۇپ، بۇ مىللەتلەرنىڭ بىرلەشمە نامايىشى زۇلۇم ئاستىدا ئىڭراۋاتقان مەزلۇملارنىڭ خىتاي مۇستەملىكىسىگە ۋە دىكتاتورلىقىغا قارشى ئاتلانغان ئورتاق مەقسىتىنى ئىپادىلىگەن.

پائالىيەت ئىشتىراكچىلىرىدىن ئۇزۇندىن بىرى ئاكتىپ پائالىيەت قىلىپ كېلىۋاتقان غەيرەتچان روزى ۋە بەختىيار ناسىر قاتارلىق ئەپەندىلەرمۇ ئۆز چۈشەنچىلىرىنى بايان قىلدى.