Явропадики моңғул актиплири амистердамда намайиш қилди

Мәргән исимлик моңғул чарвичиниң хитай тәрипидин өлтүрүлгәнликигә қарита шилинғол наһийисидә қозғалған наразилиқ намайиши, хитай сақчи-армийәлири тәрипидин қанлиқ бастуруш хәвпигә дуч келиватқан бүгүнки күндә, явропада яшаватқан моңғул актиплири голландийиниң амистердам шәһиридики дам мәйданида топланди.

30-Май саәт 12 дә қоллирида байрақ вә лозункиларни көтүрүвалған моңғул намайишчилар түрлүк мәзмунларда шоарларни товлап, хәлқаралиқ тәшкилатлар вә органларға хитаб қилип, уларни бигунаһ моңғул хәлқиниң қирғин қилинишиға йол қоймаслиққа чақирди.

RFA/Pidaiy

Бу мунасивәт билән зияритимизни қобул қилған моңғул паалийәтчилири йетәкчиси тиңчиңчу әпәнди мәқситини ипадиләп: моңғул яйлақлирини қоғдаш йолида қурбан болған қәһриманимизниң хун дәваси билән қозғалған шилинғол намайиши хәтәрлик пәйттә турмақта. Шу сәвәбтин явропадики моңғул хәлқ партийисиниң башлиқи болуш сүпитим билән, явропадики достанә тәшкилатлиримизниң һәмраһлиқида паалийитимизни амистердамға мәркәзләштүрдуқ. Бизгә мәдәт берип йеқиндин қоллап кәлгән уйғур вә тибәт қатарлиқ тәқдирдашлиримизға чин көңлүмдин рәһмәт ейтимән, деди.

Бу қетимқи паалийәткә хитай, тибәт вә уйғур қатарлиқ милләтләрниң актиплириму қатнашқан болуп, бу милләтләрниң бирләшмә намайиши зулум астида иңраватқан мәзлумларниң хитай мустәмликисигә вә диктаторлиқиға қарши атланған ортақ мәқситини ипадилигән.

Паалийәт иштиракчилиридин узундин бири актип паалийәт қилип келиватқан ғәйрәтчан рози вә бәхтияр насир қатарлиқ әпәндиләрму өз чүшәнчилирини баян қилди.