ياۋروپا شەرقىي تۈركىستان مائارىپ جەمئىيىتىنىڭ خىزمەتلىرى داۋام قىلماقتا

گوللاندىيىدە قۇرۇلغان «ياۋروپا شەرقىي تۈركىستان مائارىپ جەمئىيىتى» 2011-يىلى 1-ئاينىڭ 1-كۈنى گوللاندىيىنىڭ ھارلىم شەھىرىدە، يىللاردىن بىرى داۋام قىلىۋاتقان ئايلىق سۆھبىتىنى ئېلىپ باردى.

بۇ قېتىمقى سۆھبەت ئادەتتىن تاشقىرى بىر قىزغىنلىق ئىچىدە ئۆتكۈزۈلگەن بولۇپ، تۈركىيىدىكى « شەرقىي تۈركىستان مائارىپ ۋە ھەمكارلىق جەمئىيىتى» رەھبىرى ئابدۇلھەكىمخان مەخسۇمنىڭ تەسىرلىك نۇتقى ئىشتىراكچىلارنى ھاياجانغا سالدى. ئابدۇلھەكىمخان مەخسۇمھاجىمنىڭ ئىتتىپاقلىق، ھەمكارلىق، پىداكارلىق، تەقۋالىق، مەسئۇلىيەتچانلىق، ھوشيارلىق، تەدبىرلىك بولۇش ھەققىدىكى كەڭ دائىرىلىك پىكىرلىرى ھەممەيلەننى قايىل قىلدى. گەرچە ئىككى سائەتتىن ئارتۇق داۋام قىلغان بولسىمۇ ناھايىتى قىسقا بىلىنگەن بۇ سۆھبەت، ئاڭلىغۇچىلارغا نىسبەتەن قىممەتلىك پۇرسەت بولۇپ قالدى.

RFA/Arslan

سۆھبەت ئىشتىراكچىسىدىن بىرى بۇ ھەقتە ئىنكاسىنى بىلدۈرۈپ: "ئۇستازىمىز ئابدۇلھەكىم مەخسۇمھاجىمنىڭ مۇھىم تەۋسىيىلىرىنى ئاڭلاپ ناھايىتى ھاياجانلاندىم. ۋەتەن دەۋاسىنى قىلىش ئۈچۈن شەرقىي تۈركىستانلىق ھەرقايسى تەشكىلات ۋە شەخسلەرنىڭ بىرلىك-باراۋەرلىك ۋە ھەمكارلىق ئاساسىدا بىرلەشسەك، بۇ ئىشنى بىر باشقا ئېلىپ چىققىلى بولىدىغانلىقىدىن ئىبارەت بىر ھەقىقەتنى تونۇپ يەتتىم." دېدى.

« شەرقىي تۈركىستان مائارىپ ۋە ھەمكارلىق جەمئىيىتى» نىڭ ئىككى ئەزىز مېھمىنى شۋېتسىيىدە ئېچىلغان «شىمالىي ياۋروپا ئىسلام بىرلىكى» نىڭ يىللىق مۇھاكىمە  يىغىنىغا تەكلىپ قىلىنغان بولۇپ، دۇنيانىڭ ھەرقايسى جايلىرىدىن كەلگەن مۇسۇلمان قېرىنداشلارغا شەرقىي تۈركىستان ۋە ئۇيغۇرلارغا ئالاقىدار كۆپ تەرەپلىمە مەلۇمات بەرگەن ۋە ناھايىتى ياخشى تەسىر قالدۇرغان. ئۇلار قايتىش پۇرسىتىدە ياۋروپادىكى قېرىنداشلىرىنى زىيارەت قىلىش نىيىتى بىلەن گوللاندىيىگىمۇ كەلگەن ھەم «ياۋروپا شەرقىي تۈركىستان مائارىپ جەمئىيىتى» بۇ قېتىمقى ئايلىق سۆھبىتىگە مېھمان سۈپىتىدە قاتناشقان.