Yigirme dölet guruhining aliy derijilik uchrishishi fransiyide bashlandi

Yigirme dölet guruhi dölet bashliqlirining aliy derijilik uchrishishi 11‏-ayning 3‏-küni fransiyining déngiz boylirigha jaylashqan kannés seyligahida bashlandi.
Muxbirimiz weli
2011-11-03
Share
g20-20-dolet-yighini-305.jpg Yigirme dölet guruhi (g20) diki dölet bashliqlirining aliy derijilik uchrishishigha qatnashquchilarning xatire süriti. 2011-Yili 3-noyabir, fransiye.
AFP

Yigirme dölet guruhi (G20) diki dölet bashliqlirining aliy derijilik uchrishishi, 11‏-ayning 3‏-küni fransiyining jenubidiki déngiz boyigha jaylashqan kannés seyligahida bashlandi. Roytrs agéntliqining bayan qilishiche, bu aliy derijilik uchrishishning muzakire qilidighan bash témisi yawropa döletlirini qerzdin xalas qilish, buning ichide géritsiyige yardem bérish mesilisi bir konkrét mesile idi. Bu qétimqi aliy derijilik uchrishishning sahipxani bolghan fransiye prézidénti sarkozi kün tertip boyiche, yighin'gha kelgen dölet bashliqlirini bügün etigende bir-birlep heshemetlik murasim bilen kütüwaldi. Etigen sa'et 11 de, amérika prézidénti obama bilen körüshti. Sa'et 12 de méhmanlargha ziyapet berdi. Kech sa'et 4 te, hindistan bash minisitri sinxa bilen körüshti. Kech sa'et 6 de axbarat yighini échip bu aliy derijilik uchrishishning ongushluq bashlan'ghanliqini we dawamlishiwatqanliqini jakarlidi.

Uchur arxiplirigha qarighanda, yigirme dölet guruhi dégen eslidiki amérika, en'gliye, fransiye qatarliq sana'etleshken chong hem bay sekkiz dölet guruhi asasida, 1999-yili bérlinda qurulghan iqtisadiy guruh. Bu guruhqa eza 20 döletning iqtisadi we soda miqdari pütün dunya iqtisadi we soda miqdarining 80% ni teshkil qilidu. Dunyada keng kölemlik wekillik xaraktérige ige bolghan bu yigirme dölet guruhi, zörür tépilghanda aliy derijilik uchrishish shekli arqiliq pütün dunya iqtisadidiki mesililerni hel qilish üchün herxil tedbirlerni belgilep kéliwatidu.

Fransiye agéntliqining bayan qilishiche, yigirme dölet guruhidiki dölet bashliqli'irining aliy derijilik uchrishishi bashlinishtin bir kün burun-‏ tünügün kech sa'et üchte, géritsiye bash ministiri papandéri'o afinada turup, yigirme dölet guruhining yardem bérish pilani géritsiyide omum xelq awaz qoyup testiqlinidu dep jakarlighachqa, bashlinish aldida turghan bu aliy derijilik uchrishishning muhitini tuman basqan idi. Fransiye prézidénti sarkozi xelq'ara pul-mu'amile fond jem'iyitining bashliqi kristin lagardé xanim bilen birlikte, yawropa birlikidiki yene bir chong iqtisadiy gewde bolghan gérmaniyining bash ministiri an'gila markél xanim bilen géritsiye krizisi toghrisida bash qoshqandin kéyin, géritsiye bash ministiri papandéri'ogha, géritsiye ötken heptide kélishken iqtisadiy yardem (qutquzush) pilanidiki maddilargha hörmet qilmighuche, yawropa birlikidin we xelq'ara pul-mu'amile fond jem'iyitidin héchqandaq yardem (qerz pul) ge érishelmeydu, dep uqturghan idi.

Amérika awazining bayan qilishiche, yigirme dölet guruhidiki dölet bashliqli'irining aliy derijilik uchrishishi bashlinishtin bir kün burun-‏ tünügünla amérika prézidénti obama sarkozigha, yawropadiki qerz krizisini hel qilish charilirining iqtisadni ashurush bilen ishsizliq mesilisini hel qilishnimu nishanlishi kéreklikini otturigha qoyghan. Xitay re'isi xu jintaw sarkozigha, xitay haman yawropa bazirining meblegh salghuchisi, emma yawropa döletliri yillardin buyan dawamlishiwatqan qerz krizisini hel qilish ümidini béyjinggha baghlimasliqi kérek, dégen. Yaponiye bash ministiri yoshiko noda bolsa sarkozigha, yaponiye yawropa birlikining qerz krizisini hel qilish pilanini qollaydu we yawropa zayumlirini téximu köp sétiwélishni oylishidu dep jakarlighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet