Uyghur dewasining qollighuchisi proféssor tunjer gülensoy alemdin ötti

Ixtiyariy muxbirimiz erkin tarim
2022.06.13
Share on WhatsApp
Share on WhatsApp
Uyghur dewasining qollighuchisi proféssor tunjer gülensoy alemdin ötti Türkiyede tonulghan türkolog, yazghuchi we Uyghur dewasining sadiq qollighuchisi, pénsiyege chiqqan proféssor tunjer gülensoy ependi.
RFA/Erkin Tarim

Türkiyede tonulghan türkolog, yazghuchi we Uyghur dewasining sadiq qollighuchisi, pénsiyege chiqqan proféssor tunjer gülensoy ependi 6-ayning 11-küni etigende enqerede alemdin ötti.

Bu munasiwet bilen dunya Uyghur qurultiyi, türkiyediki sherqiy türkistan ammiwi teshkilatliri we Uyghur ziyaliyliri ijtima'iy taratqular arqiliq bayanat élan qilip, öz teziyelirini bildürdi.

D u q re'isi dolqun eysa ependi merhum tunjer gülensoy ependining ottura mektepte oquwatqan waqtidin tartip Uyghurlarni qollap kelgen kishi ikenlikini, uning wapatining Uyghurlar üchün chong yoqitish ikenlikini bildürdi

83 Yashta alemdin ötken proféssor doktor tunjer gülensoy ependi uzun yil enqere, firat we manas uniwérsitétlirida oqutquchiliq qilghandin sirt qeyseridiki erjiyes uniwérsitétida mu'awin mudirliq wezipisimu ötigen. U, uniwérsitétta oquwatqan yilliridin tartip Uyghur dewasigha qiziqip kelgen we izchil köngül bölgen. U, türkiyening ichi-sirtida ötküzülgen her xil ilmiy muhakime yighinlirigha qatniship, Uyghur tili we tarixi mesililiri heqqide doklatlarni bergen, türkiyediki sherqiy türkistan ammiwi teshkilatlirining pa'aliyetlirige aktip qatnishipla qalmay türkiyediki gézit we zhurnallarda Uyghurlar toghrisida köpligen maqalilerni élan qilghan.

6-Ayning 12-küni enqerediki qarshiyaqa meschitide merhumning méyit namizi chüshürülgendin kéyin qarshiyaqa mazarliqida depine qilindi. Merhumning depine murasimigha köp sandiki oqutquchilar, u yétishtürgen türkologlar we awam xelqtin bolup köp sanda kishi qatnashti. Uyghurlargha wakaliten dunya Uyghur qurultiyining meslihetchisi, ege uniwérsitétining proféssori alimjan inayet ependi ishtirak qildi.

Méyit namizini chüshürüshke qatnashqan alimjan inayet ependi, merhum tunjer gülensoy ependining dangliq bir türkolog ikenlikini, hazirghiche 36 kitab, 293 ilmiy maqale yézip neshr qildurghanliqini, bulardin sirt köp sanda doktorluq dissértatsiyesige yétekchilik qilghanliqini tekitlidi.

Alimjan inayet ependi tunjer gülensoyning Uyghur dewasigha qoshqan töhpisining zor ikenlikini, wapatigha qeder Uyghur tetqiqati üchünmu zor töhpilerni qoshqanliqini bayan qildi.

Uyghur ziyaliysi hamutxan köktürk ependi özining tunjer gülensoy ependi bilen 1994-yilidin tartip tonushqanliqini, merhumning hayat waqtida Uyghurlargha köp yardem qilghan kishi ikenlikini tilgha aldi.

Tunjer gulensoy 1939-yili türkiyening ushshaq wilayitide dunyagha kelgen. Enqere uniwérsitétining til we tarix-jughrapiye fakultétini püttürgendin kéyin, oqutquchi bolup ishligen, 1972-yilidin2006-yili pénsiyege chiqquche uniwérsitétlarda oqutquchiliq qilghan. U, hayatida 36 kitab yazghan bolup, buning ichide “Türk tilining étimologiyelik lughiti”, “Türklogiye qollanmisi”, “Türk tili diyaléktliri” namliq kitabliri muhim orunda turidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.