Қәшқәр тәнтәрбийә мәктипиниң аз дегәндә 8 нәпәр оқутқучисиниң тутқунда икәнлики ашкариланди

Мухбиримиз шөһрәт һошур
2022.06.08
Share on WhatsApp
Share on WhatsApp
Қәшқәр тәнтәрбийә мәктипиниң аз дегәндә 8 нәпәр оқутқучисиниң тутқунда икәнлики ашкариланди Җаза лагеридики тутқунлар сақчиларниң назарити астида телевизорда сөзләватқан или област башлиқи нурлан абдумалинниң сөзини аңлимақта. 2022-Йил 24-май.
AFP

Мухбиримизниң қәшқәргә қарита елип барған телефон зиярәтлиридә, қәшқәр тәнтәрбийә мәктипиниң 8 нәпәр оқутқучиси, йәни мәктәптики уйғур ишчи-хизмәтчиләр саниниң %20 и тутқунда икәнлики ашкариланди. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Қәшқәр “конашәһәр сақчи архиплири” дики тутқунлар тоғрисида елип бериватқан ениқлашлиримиз давамида, телефонимиз қәшқәр шәһәр ичидә вәзипә өтәватқан бир сақчи хадимиға уланди. Бу хадим өзи вәзипә өтәватқан сақчиханиниң башқуруш тәвәсидә болған қәшқәр тәнтәрбийә мәктипидики тутқунлар һәққидә мәлумат бәрди. Униң дейишичә, мәктәпниң йеник атлетика оқутқучилиридин адил турсун, амир, османҗан вә қәйсәрҗанлар, 2017-йилиниң бешидила тутқун қилинған. Дейилишичә, уларниң арқидин, тәквандо маһири вә тренер абдушүкүр тутуп кетилгән. Андин нөвәт математика оқутқучиси әсқәрҗанғанға кәлгән; ахирида, мәктәп хоҗилиқ бөлүминиң ишчиси нурмәмәт ясинму чәттә қалмиған.

Қәшқәр кона шәһәр районида чарлаватқан сақчилар. 2019-Йили 3-июн.
Қәшқәр кона шәһәр районида чарлаватқан сақчилар. 2019-Йили 3-июн.
AFP

Илгирики ениқлашлиримизда, мәзкур мәктәпниң валибол оқутқучиси, сабиқ мәшәл йәткүзгүчи алимҗан маһмутниң тутқунда икәнлики дәлилләнгән.

Вәзийәттин хәвәрдар кишиләрниң билдүрүшичә, қәшқәр тәнтәрбийә мәктипиниң 60 чә ишчи-хизмәтчиси бар болуп, буниң тәңдин толисини хитайлар игиләйдикән. Шундақ болғанда, тутқунлар, мәзкур мәктәптики уйғур ишчи-хизмәтчиләрниң %20 чә қисмини тәшкил қилған.

Уйғуряр фондиниң тутқундики зиялийлар тизимликидә, қәшқәр вилайәтлик су ишлири идарисидин мәмтили ваһап қатарлиқ 6 кишиниң исми тилға елинған вә ениқлашлиримиз давамида, мәзкур идаридики уйғур ишчи-хизмәтчиләрниңму %15 ниң тутқунда икәнлики дәлилләнгән.

Әҗәблинәрлики, қәшқәр тәнтәрбийә мәктипидики оқутқучиларниң тутулуш сәвәби һәққидә мәктәп рәһбәрлири вә ишчи-хизмәтчилирила әмәс, сақчи хадимлириму мәлуматқа игә әмәс икән. “конашәһәр сақчи архиплири” да, көп санда тутқунларниң тутулуш сәвәблири бәзидә термин, бәзидә номур билән категорийәгә айрилған; йәнә бәзи тутқунлар үчүн “тутулуш сәвәби ениқсиз” дәп қәйт қилинған. Мәзкур сақчи хадими, қәшқәр тәнтәрбийә мәктипи оқутқучилириниң тутулуш сәвәби һәққидә хәвири йоқлуқини тәкитләш билән бирликтә, уларниң “яман гәп-сөзләр болған җайда туруп қилғанлиқи” һәққидә җәмийәт учурлири барлиқини әскәртти.

Қәшқәр “кона шәһәр сақчи архиплири” да, “гуманлиқ кишиләр билән биллә туруп қелиш” дегән бир категорийәму алаһидә көзгә челиқиду. Бу нуқтидин қаралғанда, мәзкур мәктәптики тутқунларниң тутқундики аилә тавабиати, уруқ-туғқанлири, дост-бурадәрлири вә яки көңүл йеқинлири сәвәблик тутқун қилинғанлиқ еһтималлиқи ишарәтләнмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.