Американиң мюнхендики консулханиси өткүзгән "уйғур һәптилики" паалийити бүгүн нәтиҗилик ахирлашти

Ихтиярий мухбиримиз әкрәм
2020-10-30
Share
Zumretay-Erkin.jpg Американиң мюнхен шәһиридики консулханиси д у қ билән һәмкарлишип өткүзгән "уйғур һәптилики" паалийитидә американиң мюнхен шәһиридики баш консули меған грегорс ханим д у қ ниң программа йетәкчиси зумрәтай әркин ханим билән сөһбәт елип барди. 2020-Йили 30-өктәбир.
RFA/Ekrem

Американиң берлиндики әлчиханиси вә мюнхендики консулханиси д у қ рәһбәрлири билән һәмкарлишип "уйғур һәптилики" паалийити өткүзди.

Американиң мюнхен шәһиридики консулханиси 22-өктәбир д у қ билән һәмкарлишип, 10-айниң ахирқи бир һәптисидә мәхсус уйғурларға беғишланған "уйғур һәптилики" паалийити өткүзидиғанлиқи тоғрисида учур тарқатқан иди. Бу паалийәтниң тунҗи қетимлиқини 26-өктәбир д у қ рәиси долқун әйса билән, иккинчи қетимлиқини 28-өктәбир д у қ ниң явропаға мәсул вәкили әсқәрҗан билән, бүгүн, йәни 30-өктәбир ахирқи қетимлиқини д у қ ниң программа йетәкчиси зумрәтай әркин билән өткүзди.

Тор зиярити арқилиқ өткүзүлгән бу программиға американиң мюнхен шәһиридики баш консули меған грегорс риясәтчилик қилди. Бүгүн америка баш консулиниң зияритини қобул қилған д у қ ниң программа йетәкчиси зумрәтай әркин бу һәқтә тохталғанда, бир һәптә давам қилған бу "уйғур һәптилики" паалийитиниң наһайити нәтиҗилик елип берилғанлиқини тилға алди.

Американиң берлиндики әлчиханиси "уйғур һәптилики" паалийитигә җиддий көңүл бөлгән иди. Әлчихана тор сәһиписи бир һәптидин буян өткүзүлгән "уйғур һәптилики" паалийитиниң барлиқ син көрүнүшини толуқ елан қилди. Буниң биләнла қалмай, америка әлчиханиси мюнхендики америка консулханисиға маслишип, һәр күни бирдин германийәниң һәрқайси шәһәрлиридә яшаватқан яш уйғур қиз-оғуллирилирини зиярәт қилип, уларниң син көрүнүши арқилиқ ипадә қилған йүрәк сөзлирини әлчиханиниң тор сәһиписи арқилиқ кәң тарқатти.

Мюнхен шәһиридә яшаватқан иляр сидиқму америка әлчиханисиниң зияритини қобул қилған яшлардин бири иди. У бүгүн бизниң зияритимизни қобул қилғанда, өзиниң бу әлчихана торида йүрәк сөзлирини қандақ баян қилғанлиқи тоғрисида мәлумат берип өтти.

Германийәниң стутгарт шәһиридә яшайдиған яш қизлардин адилә әнвәрму америка әлчиханисиниң тор сәһиписидә син көрүнүши арқилиқ өз қарашлирини, тиләклирини баян қилип өткән, дуня җамаитини уйғурларға игә чиқишқа дәвәт қилған иди. У бүгүн зияритимизни қобул қилип, өзиниң йүрәк сөзлирини йәнә бир қетим ипадә қилди.

Игилишимизчә, американиң берлиндики әлчиханиси вә мюнхендики консулханиси 2019-йилдин буян д у қ билән һәмкарлишип һәр түрлүк сиясий, иҗтимаий паалийәтләрни уюштуруп келиватқан болуп, алдимиздики ай-күнләрдә йәнә бирликтә һәрхил программиларни елип баридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт