Уйғур анилири өз таамлири биләнму уйғур кимликини тонутмақта

Мухбиримиз гүлчеһрә
2022-02-14
Share
Уйғур анилири өз таамлири биләнму уйғур кимликини тонутмақта Американиң масачуситес штатиниң бостон шәһиридә ечилған йипәк йоли уйғур рестораниниң хоҗайини марийә муһәммәт ханим вә униң қизи адилә.
Photo: RFA

Йеқинда америкадики даңлиқ хәвәр агентлиқиниң бири болған ваиз агентлиқида американиң масачуситес штатида тунҗи ечилған йипәк йоли уйғур ресторани тонуштурулди. Әпчиллик билән ләғмән созуватқан бир уйғур аялниң көрүнүши билән башланған бу хәвәрдә, уйғур аилиси тәрипидин бостон шәһиридә ечилған йипәк йоли рестораниниң хоҗайини вә ашпизи марийә муһәммәт ханим аддийғинә ләғмәндин ибарәт бир тамаққа қанчилик арзуларниң юғурулғанлиқини чин қәлбидин ипадә қилған.

У рестораниға кәлгән ваиз мухбириға өзиниң қазан бешида мәшғул вақтидиму, давамлиқ өзиниң хитайниң түрмә вә лагерлириға ташланған ери вә уруқ-туғқанлирини ойлап туридиғанлиқини, бигунаһ ериниң 2018-йили 20 йиллиқ кесилгәнликини аңлатқан.

Лондон шәһиридә 2016-йили ечилған “әтләс” уйғур рестораниниң қурғучилири муқәддәс ядикар ханим билән йолдиши абликим рахман вә уларниң пәрзәнтлири.
Лондон шәһиридә 2016-йили ечилған “әтләс” уйғур рестораниниң қурғучилири муқәддәс ядикар ханим билән йолдиши абликим рахман вә уларниң пәрзәнтлири.
Social Media

Уйғурларниң немә үчүн бу бейҗиң қишлиқ олимпикини көрмәйдиғанлиқи йорутуш мәқсәт қилинған мәзкур хәвәрдә йәнә, униң билән ресторанни ечиватқан қизи адиләму мухбирниң зияритини қобул қилип, уйғурларниң омумйүзлүк бастурушқа учраватқанлиқини, дадисиниң тутқундин бурун, үндидарға әвәткән авазидин башқа авазини аңлап бақмиғанлиқини, гәрчә күндә өзи йипәк йоли уйғур ресторанида херидарларға һәр хил мәззилик тамақларни өз қоли билән суниватқинида, әҗәба дадам немә йәватқанду? дегәнни ойлимай туралмайдиғанлиқини һәсрәт ичидә баян қилған.

Уйғурларда “аниларниң он бармиқи 10 гүл” дәйдиған гәп бар. Мана бу ресторандики барлиқ тамақлар мушу чевәр аниниң өзиниң аилә ретсиплиридин пүтиду. Һазир хәлқаралиқ ахбаратларда тонуштурулған бу ресторани хоҗайини вә уста ашпизи болған марийә ханим әсли ашпәз әмәс, бәлки атушта бир дохтур икән. Рамзанда өз өйидә йеқинлириға иптарлиқ бәргини үчүн 20 йил кесиветилгән атуштики ери, йәни бу йил 51 яшқа киргән садир ели болса әсли банка хизмәтчиси иди.

Массачустес штатида тунҗи қурулған бу уйғур ресторани ечилғиниға 5 йил болған. Ресторан ечилған бу район харвард университети вә массачустес техника институтидәк дуняда алдинқи қатарда туридиған икки алий мәктәпни өз ичигә алған 70 дин артуқ али мәктәп вә институтлар җайлашқан бир җай. Дуняниң һәр қайси җайлиридин нурғун оқуғучилар бу даңлиқ билим юртлириға келип оқуйду.

Лондон шәһиридә 2016-йили ечилған “әтләс” уйғур рестораниниң безилиши.
Лондон шәһиридә 2016-йили ечилған “әтләс” уйғур рестораниниң безилиши.

Марийә ханимниң тонуштурушичә, һазир бостон шәһирини өз ичигә алған массачусттеста 200 гә йеқин уйғур бар болуп, улар үчүн йипәк йоли ресторани аилигә охшаш бир җай, чәтәллик оқуғучилар, йәрликләр үчүн уйғурларни чүшинидиған бир җайға айланмақтикән.

Хитай бейҗиңда қишлиқ олимпикқа саһибханилиқ қиливатқан бир вақитта, йипәк йоли ресторанида йәрлик херидарларниң сани көпәйгән, қәдими үзүлмәй келиватқан бу меһманлар ялғуз уйғур тамақлирини тетип беқиш үчүнла әмәс бәлки уйғурларни қоллаш үчүн кәлгәнлики марийә ханимни толиму сөйүндүрмәктикән.

Чәтәлләрдики уйғурлар өйидин айрилип башқа җайға барғанда алди билән уйғур барму арқидин уйғур ашханиси барму? дәп издәйду. Лондон шәһиридә 2016-йили ечилған “әтләс” уйғур ресторани болса, әнглийәдә ечилған тунҗи уйғур ресторани һесаблиниду. Бу ресторан әнглийә дипломатлири, уйғур мәсилисигә көңүл бөлидиған әнглийә сиясийон, тәтқиқатчилириниң давамлиқ баридиған бир даңлиқ ресторанға айлинип қалди. Әнглийәгә кәлгән уйғурлар үчүнму чоқум тохтап өтидиған бир сөйүмлүк җай.

Муқәддәс ядикар ханим билән йолдиши абликим рахман әсли оқуш үчүн чәтәлгә чиққан уйғурлардин. “әтләс” ресторани уларниң иккинчи өйигә айланған, өзлири болса бу ресторанниң хоҗайин һәм ашпәзлири.

Муқәддәс вә униң “әтләс” ресторани илгири б б с агентлиқлири тәрипидинму тонуштурулғаниди. У мухбирға ресторан ечиштики мәқситиниң, уйғурларниң җәм болушиға сорун һазирлап бериш вә уларниң хитай тәрипидин йоқитиливатқан уйғур тили вә мәдәнийитини сақлап қелиши үчүн хизмәт қилиш икәнликини билдүргәниди.

3 Пәрзәнтиниң меһрибан аниси, муқәддәс ханим мана әмди өмүрлүк һәмраһи билән тәң “әтләс” ресторани арқилиқуйғурларниң меһмандостлуқи, чечән вә чивәрликила әмәс, бәлки йәнә уйғурларниң худди әтләстәк рәңдар вә бай мәдәнийитини җулалатмақта.

Нөвәттә, явропа мәмликәтлиридин уйғурлар көпрәк җайлашқан германийә, фирансийә, голландийә вә башқа мәмликәтләрдиму уйғур ресторанлири арқа-арқидин ечилип, барғансери алқишқа еришмәктә. Бу ресторанлардиму охшашлар анилар, ханим-қизлар өзлириниң мәззилик тамақлири билән уйғур мәдәнийитини, уйғур миллий кимликини намаян қилмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт