Ghulja sheher 8-ottura mekteptin az dégende 7 oqutquchining türmide ikenliki ashkarilandi

Muxbirimiz shöhret hoshur
2022-04-25
Share
turme-siyasiy-mehbus.jpg Jinayetchilerni tutup turush merkizining derwazisi. Yerlik kishiler éytishiche, bu orun siyasiy jinayetchiler üchün ishlitilidiken. 2017-Yili 2-noyabir, korla.
AP

Biz aldinqi küni ghulja sheher 9-ottura mektepning iqtidarliq mudiri dilmurat abduréhimning ghulja sheherlik qamaqxanida bir yildin buyan tutup turuluwatqanliqi heqqide xewer bergendin kéyin, anglighuchilirimizdin biri radiyomizgha uchur yollap, dilmurat ilgiri xizmet qilghan 8-ottura mekteptin on nechche oqutquchining tutqunda ikenlikini we bulardin ikki nepirining isimlirini melum qildi. Muxbirimizning téléfon ziyaretliri dawamida mezkur mekteptin az dégende 7 oqutquchining nöwette türmide ikenliki aydinglashti.

Beydu uchur ambirida tonushturulushiche, ghulja sheher 8-ottura mektepning 4000 etrapida oqughuchisi we 200 ishchi-xizmetchisi bar iken. Bu mektepte 2010-yildin bashlap qosh tilliq oqutushmu yolgha qoyulghan bolup, shuningdin bashlap her yili 10 qosh tilliq sinip, 10 xitayche sinip qobul qilghan. Mektepte Uyghur we xitay oqughuchilarning nisbiti tengge-teng toghra kelgen.

Ghulja weziyitidin xewerdar kishilerdin biri aldinqi küni radiyomizgha uchur yollap, ene shu 8-ottura mekteptin nöwette 10 nechche oqutquchining tutqunda ikenlikidin xewiri barliqini we bulardin abduréhim, nighmet, shöhret qatarliq oqutquchilarning ismini melum qildi. Biz bu ehwal heqqide melumat élish üchün, ghulja shehiridiki ma'arip tarmaqlirigha téléfon qilduq. Ghulja sheherlik 8-ottura mektepning nöwetchi xadimi, bu mekteptin bir qisim oqutquchilarning tutqunda ikenlikini inkar qilmidi. U peqet bu heqtiki tepsiliy melumatlarning mektep kadirlar bölümide bar ikenlikini, emma özining melumatining yétersiz ikenlikini ashkarilidi. Biz uningdin tutqundiki oqutquchilar arisida nighmet we shöhret isimlik oqutquchilarning bar-yoqluqini sorighinimizda, u bu heqtimu sheherlik ma'arip idarisidin melumat sorishimizni tewsiye qildi. Mezkur mektepning kadirlar bölümi xadimi, özining bu mektepke yéngi ikenlikini bildürüp, tutqundiki oqutquchilar heqqide melumat bérelmidi. Emma umu bu mekteptin birtürküm oqutquchilarning tutqunda ikenlikini inkar qilmidi. Mektepning bayiqi nöwetchi xadimi, bu mekteptin tutulghan oqutquchilarning qanche yildin qanche yilgha qeder késilgenlikini sorighinimizda, u deslepte bularning yashta chong oqutquchilar ikenlikini, shunga tonumaydighanliqini bildürgen bolsa, arqidin buning dölet mexpiyetlikige yatidighanliqini eskertip, jawab bérishni qopalliq bilen ret qildi.

Melum bolushiche, mezkur mektepte belgilik sanda qazaq oqughuchi we oqutquchilarmu bar bolup, mektepning qoghdash xadimi, bu mekteptin tutulghanlar arisida qemer, nurjan we ewzel qatarliq qazaq oqutquchilarning tutup kétilip, bir mezgil terbiyelen'gendin kéyin qoyup bérilgenliki we nöwette xizmitini dawam qiliwatqanliqini tilgha aldi.

Biz yene mezkur mektep jaylashqan teweliktiki saqchixanilarghimu téléfon qilip, bu mekteptin qanchilik oqutquchining “Terbiyelesh” ke apirilghanliqini soriduq. Saqchi xadimi, 20-30 che oqutquchini terbiyeleshke aparghanliqi we bulardin 7-8 che kishining késilip bolghanliqini ashkarilidi. U yene késilip bolghanlardin birining ilshat, yene birsining ismi nighmet ikenlikini ashkarilidi. Tordiki matériyallarda xatirilinishiche, 8-ottura mektep, 1934-yili qurulghan tarixiy bir mektep bolup, u eyni yillarda, Uyghur rayonida qurulghan ikki ottura mektepning biri iken. 1940-Yillarda bu mektep “Gimnaziye” dep atalghan, 1949-yilidin kéyin “Exmetjan qasimi namidiki ili bilim yurti” dégendek namlarda atalghan. 1966-Yili 8-ottura mektepke özgertilgeniken.

Yuqirida ghulja 8-ottura mekteptin az dégende 7 oqutquchining türmide ikenliki heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet