Тйәнҗин сода университетиниң тутқундики икки оқуғучисиниң қаримайдики «тәрбийәләш мәркизи» дә икәнлики айдиңлашти

Мухбиримиз шөһрәт һошур
2020-10-23
Share
lager-Karamay-city-prison.jpg Қарамай шәһиригә селинған йиғивелиш лагери. 2018-Йили 20-авғуст.
bitterwinter.org

Мухбиримизниң өткән һәптиләрдики ениқлашлири давамида тйәнҗин сода университетиниң ғайип икки уйғур оқуғучисиниң қаримай сақчилири тәрипидин тутқунда икәнлики дәлилләнгәниди. Мухбиримизниң илгириләп елип барған ениқлашлири давамида уларниң қол телефонидин аталмиш мәсилә чиққанлиқи үчүн тутулғанлиқи вә нөвәттә қаримайдики бир «тәрбийәләш мәркизи» дә тутуп туриливатқанлиқи айдиңлашти. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Һөрмәтлик радио аңлиғучилар, тйәнҗин сода университетида ғайип болуп кәткән икки уйғур оқуғучиниң тәтилдә юрти қаримайға барғандин кейин тутқун қилинғанлиқи дәлилләнгәндин кейин, биз бу икки оқуғучиниң немә үчүн тутулғанлиқи вә нәдә тутуп туриливатқанлиқи һәққидә илгириләп ениқлаш елип бардуқ. Тйәнҗин университетиниң бир мәсул хадими зикрулла вә қәдирдин исимлик икки оқуғучисиниң мәктәптин сақ-саламәт юртиға қайтқанлиқи, әмма тәтил тошуп икки айчә вақит өткән болсиму, бу икки оқуғучиниң техичә мәктәпкә қайтип кәлмигәнлики вә буларниң тәқдиридин өзлириниң әндишә қиливатқанлиқини билдүрди. Бу икки ғайип оқуғучи һәққидә радийомизға кәлгән инкаста, уларниң қол телефонлиридин мәсилә чиққанлиқи, йәни қаримай сақчилири уларниң қол телефонлирини тәкшүрүш давамида, аталмиш қанунсиз диний материялларни учратқанлиқи вә мушу сәвәблик тутқун қилинғанлиқини мәлум қилғаниди. Инкаста дейилишичә бу икки оқуғучи тутуп кетилгәндин кейин уларниң нәдә тутуп туриливатқанлиқидин аилә-тавиабатлириму учур алалмиған. Инкаста йәнә уларниң диний әсәбийлик гумани билән тутулғанлиқи вә шуңа аталмиш тәрбийәләш мәркәзлиригә әкетилгәнлик еһтималлиқи әскәртилгәниди. Шуңа биз қаримай сақчилириға телефон қилип, бу икки оқуғучиниң тутулуш сәвәби һәққидә мәлумат соридуқ. Сақчилар бу һәқтә мәлумат беришни изчил һалда рәт қилди. 

Тйәнҗин университети хадимлири, өзлириниң тйәнҗин сақчилири арқилиқ, мәзкур икки оқуғучиниң тутқунда икәнлики һәққидә ениқ мәлумат алғанлиқи, әмма немә үчүн тутулғанлиқи һәққидә учур алалмиғанлиқини ейтти. Мәзкур хадим, тутқундики оқуғучилири зикрулла вә қәдирдинниң савақдашлиридин аңлиғанлириға асасән, уларниң қол телефонидин чиққан бәлгилимигә хилап бир материяллар сәвәблик тутулғанлиқини тилға алди; әмма у бу оқуғучилириниң нәдә тутуп туриливатқанлиқи һәққидә учур алалмайватқанлиқини тәкитлиди. Биз бу һәқтә учур елиш үчүн қаримай шәһәрлик маарип идарисиға телефон қилдуқ вә қолимиздики йип учлириға асасән, тйәнҗин университетидин тәтилгә кәлгән вә тәрбийәләшкә әикитилгән икки оқуғучиниң ким икәнликини соридуқ; бу хадим, буларниң исиминиң зикрулла вә қәдирдин икәнликини билдүрди вә уларниң тәрбийәләштә икәнликини рәт қилмиди. Бу хадим йәнә мәзкур икки оқуғучиниң телефонидин бәлгилимигә хилап материяллар чиққанлиқи үчүн бу йил 7 ‏-айниң биринчи һәптиси тутулғанлиқини дәлиллиди. Биз арқидин тйәнҗин университетиға қайта телефон қилип, мәзкур икки оқуғучиниң нөвәттә қәйәрдә тутуп туриливатқанлиқини тәкрар соридуқ. Алақидар хадим, буларниң қаримай шәһиридики бир «тәрбийәләш мәркизи» дә икәнлики вә бу учурни сақчи органлиридин уққанлиқини ашкарилиди. 

Бизгә кәлгән инкаста, мәзкур икки оқуғучиниң оқуватқан кәспи һәққидә мәлумат берилмигәниди. Биз мәктәпниң йәнә бир хадимидин қаримайдики тәрбийәләш мәркизидә тутуп туриливатқан мәзкур икки оқуғучисиниң тйәнҗин университетида оқуватқан кәспий һәққидә мәлумат соридуқ; мәзкур хадим, буниң оқуғучиларниң шәхсий учуриға ятидиғанлиқини әскәртип мәлумат беришни рәт қилди. Бу икки оқуғучиниң университетниң қанчинчи йиллиқ оқуғучиси икәнликиниму дәп бәрмиди. 

Йәнә ениқлашлиримиз давамида, тйәнҗин университетидин юртиға қайтип ғайип болуп кәткән оқуғучиларниң ялғуз зикрулла билән қәдирдинла әмәслики, мәсилән қаримайниң өзидила, бу икки оқуғучиға четилип йәнә бирнәччә оқуғучиниңму тутқун қилинғанлиқи мәлум болди; әмма уларниң кимлики вә ақивити һазирчә мәлум әмәс. 

Һөрмәтлик радио аңлиғучилар, юқирида тйәнҗин университетидин ғайип болуп кәткән икки уйғур оқуғучиниң қариғандики бир «тәрбийәләш мәркизи» дә икәнлики һәққидә аңлитиш бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.