Firansiyediki ömer abduqahar a'ilisi korona wirusidin yuqumlinip saqayghan

Ixtiyariy muxbirimiz erkin tarim
2020-03-31
Élxet
Pikir
Share
Print
Pütün memliket miqyasida wirusning tarqilishini kontrol qilish jeryanida, tajsiman wirusqa qarshi aldini élish tedbirliri süpitide dézinféksiye dorisi pürkülgen firansiyening jenubidiki obagénda shehirining ademsiz kochisi. 2020-Yili 31-mart.
Pütün memliket miqyasida wirusning tarqilishini kontrol qilish jeryanida, tajsiman wirusqa qarshi aldini élish tedbirliri süpitide dézinféksiye dorisi pürkülgen firansiyening jenubidiki obagénda shehirining ademsiz kochisi. 2020-Yili 31-mart.
AP

Buningdin 4 ay burun xitayning wuxen shehiride otturigha chiqqandin kéyinki 4 ay ichide pütün dunyagha tézla yamrighan korona wirusidin firansiyening paytexti parizh shehiride turushluq Uyghurlardin bir a'ile kishiliriningmu yuqumlinip saqayghanliqi melum boldi.

Uyghur diyarining ghulja shehiridin parizhgha kélip yerliship qalghan u Uyghur muhajirlardin ömer abduqaxar ependi özlirining a'ile boyiche bu wirustin yuqumlinip, saqayghanliqini bildürdi. Ömer abduqaxar ependining éytishiche, u, 17-mart küni 10 yashtiki qizining korona wirusidin yuqumlan'ghanliqini deslepte taza bayqiyalmighanliqi, qizidin kéyinla ayaliningmu yötilip, qizitmisi örlep, nepisi qisilishqa bashlighandin kéyinla ularning korona wirusidin yuqumlan'ghanliqini bilgenlikini bayan qildi.

Ömer abduqahar ependi ayali éghir aghrip yétip qélip 4-künidin bashlap öziningmu qattiq yötilip yétip qalghanliqini, a'ile boyiche korona wirusidin yuqumlan'ghanliqini, bügün, yeni 30-martqa kelgende özlirining yaxshilinip bolghanliqini bayan qildi.

Ömer abduqaxar ependi korona wirusidin yuqumlan'ghanliqini bayqighandin kéyin derhal doxturxanigha téléfon urghanliqini, doxturning tewsiyisi boyiche qizitmini chüshüridighan dora yep, yaxshi ghizalinish arqiliq saqayghanliqini éytti.

Firansiye 14-marttin bashlap chégralarni taqap, bu döletke kirip-chiqquchilarni tekshürüshni omumyüzlük kücheytishke bashlidi. Firansiye mekteplerni, türlük ijtima'iy, medeniy, tenterbiye kulublirini birdek taqidi. 2020-Yili ötküzüsh pilanlan'ghan nurghunlighan xelq'araliq yighinlarni, türlük musabiqilerni birdek emeldin qaldurdi. Arqidin kochigha chiqishnimu cheklidi. Hazir yawropada italiye we ispaniyedin qalsa firansiyede korona wirusidin ölgenlerning sani köp bolup, 29-mart künigiche ölgenlerning sani 2606ge yetken. Ömer abduqahar ependi bu heqte melumat berdi.

Ömer abduqahar ependi korona wirusi alametliri ichide özini eng qiynighinining yötel bolghanliqini bayan qildi.

Türkiye téléwiziyeliride xitayda partlighan korona wirusini xitayning hazir "Tizginligen" liki, yawropa we amérikada bolsa téz köpiyiwatqanliqi, buning türkiye iqtisadigha éghir zerbe béripla qalmay, türkiye xelqinimu jiddiy sarasimige salghanliqi xewer qilinmaqta. Türkiyede korona wirusidin ölgenlerning sani 142 ke, yuqumlan'ghanlarning sani 10827 ge yetti. Ijtima'iy taratqularda tarqitiliwatqan melumatlargha asaslan'ghanda istanbuldiki Uyghurlar arisida türkiye élan qilghan tedbirlerge ri'aye qilmaywatqan Uyghurlarmu köp iken.

Korona wirusining alametliri körülüshke bashlansa némilerni qilish kérek? enqerediki yildirim beyazit uniwérsitéti tébbiy fakultéti ammiwi saghlamliq kafédrasi oqutquchisi doxtur nametjan memet ependi derhal 184-nomurluq merkezge téléfon qilip özini melum qilishi kéreklikini tekitlidi.

Türkiye téléwiziyeliride korona wirusidin yuqumlan'ghanlar arisida 65 yashtin chong bolghanlarning nisbitining köplüki tekitlen'gechke kishiler arisida qérilar we kona késellerning yuqumlinidiken dégen xata chüshenche peyda bolup qalghan. Bu heqte melumat bergen nametjan memet ependi bu heqte toxtaldi.

Biz igiligen melumatlargha asaslan'ghanda her qaysi döletlerde korona wirusidin yuqumlinip dawaliniwatqan Uyghurlar bar bolup, emma ölüm weqesi yüz bermigen.

Uyghurlar firansiyede anche köp emes, emma gollandiye, gérmaniye, bélgiye, norwégiye, shiwétsiye qatarliq yawropa döletliride köprektur. Ularningmu nöwette küchlük tedbir éliwatqanliqi melum bolmaqta.

Toluq bet