78 Yashliq xelchem pazilning 17 yilliq késilgenliki we sanji ayallar türmiside jaza mudditini ötewatqanliqi delillendi

Muxbirimiz shöhret hoshur
2022-01-24
Share
78 Yashliq xelchem pazilning 17 yilliq késilgenliki we sanji ayallar türmiside jaza mudditini ötewatqanliqi delillendi “Topliship jem'iyet tertipini buzush” we “Milliy kemsitishke qutratquluq qilish” bilen eyiblinip 17 yilliq késilgen we sanji ayallar türmisining 4-etritide jaza mudditini ötewatqan 78 yashliq xelchem pazil.
Oqurmen teminligen

Korladiki bir a'ilidin 5 ayal kishige éghir jaza késilgen hökümnamide xelchem pazilning késiwétilgenliki qeyt qilin'ghan bolsimu, emma jaza mudditi tilgha élinmighan we uning qeyerde jaza mudditini ötewatqanliqi melum emes idi. Muxbirimizning korladiki alaqidar organlar we sanji ayallar türmisige qarita élip barghan téléfon ziyaretliri dawamida, uning “Jama'et tertipini qalaymiqan qilish” jinayiti bilen eyiblinip, 17 yilliq késiwétilgenliki we sanji ayallar türmisining 4‏-etritide jaza mudditini ötewatqanliqi delillendi.

Korla sheherlik xelq sot mehkimisining korladiki bir a'ilidiki 5 ayal üstidin éghir jaza kesken hökümnamiside, 1944-yili tughulghan 78 yashliq xelchem pazil isimlik ayalmu mehkumlar qataridin orun alghan. Hökümnamide déyilishiche, xelchem pazil “Milliy kemsitishke qutratquluq qilish” we “Topliship jama'et tertipini buzush” jinayiti bilen eyiblen'gen. Uning atalmish “Qanunsiz bir tebligh” qe qétilghanliqi we bu “Teblighqe sorun hazirlap bergen” liki, uning yuqiriqi atalmish “Jinayiti” ge pakit qilin'ghan. Hökümnamide xelchem pazilning bashlan'ghuch medeniyet seweyisige ige ikenliki, korla sheher ichidiki chilanbagh kocha bashqarmisida olturushluq ikenliki, uning mezkur atalmish “Jinayet” ni korla kona bazardiki qérindashlar méhmanxanisining 2-qewettiki öyide sadir qilghanliqi qeyt qilin'ghan.

Biz bu uchurlargha asasen, korlagha téléfon qilduq. Alaqidar xadimlar xelchem pazilning éniq kimliki we adrisi heqqide melumat bergen bolsimu, emma uning aqiwiti heqqide uchur bérelmidi.

Hökümnamide “Qanunsiz tebligh sözligüchi” dep ismi tilgha élin'ghan we chet elge chiqip ketkenliki bildürülgen, nöwette türkiyede yashawatqan xelchigül memet xanimning bildürishiche, xelchem pazil 7 perzentini yaxshi terbiyelep jem'iyetke qatqan, 10 yilning aldida yoldishi tügep ketken we shuningdin kéyin asasen newrilirini terbiyelesh bilen kün kechüriwatqan bir xanim iken.

Xelchigül memet xanim yene mehkum xelchem pazilda siyasiy ishlargha qiziqidighan we köngül bölidighan bir alametlernimimu bayqimighanliqini otturigha qoydi.

Ejeplinerliki shuki, hökümnamide bashqa mehkumlarning jaza mudditining qachan bashlinip qachan tügeydighanliqi we yil mudditi éniq bayan qilin'ghan bolsimu, emma xelchem pazil heqqide “Uning jaza mudditi höküm ijra qilin'ghan kündin bashlap hésaplinidu” déyilgen, yeni jaza mudditi éniq bayan qilinmighan. Biz aldinqi küni éniqlighan bu a'ilidiki besh mehkumdin ikkisining jaza mudditini ötewatqanliqini delilillen'gen sanji ayallar türmisige qayta téléfon qilip, xelchem pazilning ehwali heqqidimu melumat soriduq.

Alaqidar türme xadimliridin biri, biz teminligen kimlik nomurigha asasen xelchem pazilning mezkur türmidiki 4‏-etrette jaza mudditini ötewatqanliqini ashkarilidi. U yene xelchem pazilning bu yil 78 yash ikenlikini bildürüsh bilen birlikte, uning 17 yilliq késilgenlikinimu delillidi.

Türkiyediki korlaliq muhajir, yeni mezkur déloda “Qachqun jinayetchi” süpitide tilgha élin'ghan xelchigül xanimning bayan qilishiche, xelchem pazil 2015 yaki 2016-yilliri türkiyege kelgen we mekkide hej qilip qaytqan iken.

Korla sheherlik sot mehkimisining hökümide, uning “Teblighqa qatnashqanliqi” we “Sorun hazirlap bergenliki” atalmish “Jinayi pakit” qatarida tilgha élin'ghan bolsimu, emma hökümnanide uning türkiye ziyariti we hej sepiri tilgha élinmighan. Ilgiriki éniqlashlirimizdin melum bolushiche, köp sanda kishiler peqet chet el ziyariti we hej sepiri üchünla késilip ketken. Shunga 78 yashliq xelchem pazilning 17 yilliq késilishide, uning chet el sepirining tesiri bar-yoqluqi hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet