Uyghur qizi dilhayat türkiye boyiche iz qaldurghan 10 muwappeqiyetlik yash bolup tallandi

Türkiyening eng yaxshi üniwérsitétliridin biri bolghan ottura sherq téxnika üniwérsitétida oqush jeryanida nurghun yéngi ish pilanlirini otturigha qoyup mukapatlargha érishken dilhayat barishchi xanim, 2013 - yilliq türkiyening eng muwappeqiyetlik 10 yash qatarigha kirdi.

10 Oxshimaydighan sahede eng muwappeqiyetlik yash bolup saylan'ghanlardin bulut ersawash tijaret we sana'et saheside, jenk sidar ependi siyaset, qanun we igilik bashqurush saheside, yüsüp baran bilim saheside, masis aram gözbek ependi kültür saheside, sewinch atay xanim bolsa muhitni asrash saheside, Uyghur qizi dilhayat barishchi xanim bolsa insan heq we hoquqini, balilar hoquqini qoghdash, dünya tinchliqigha töhpe qoshushta eng muwappeqiyetlik yash bolup bahalandi. Bulardin bashqa yene oxshimaydighan sahelerde jan yildizli, muzepper qocher, murat chokol we özgür alaz ependilermu türkiyede iz qaldurghan eng muwappeqiyetlik yash bolup tallandi. Bu yashlar dunyadiki on muwappeqiyetlik yashni tallash komitéti teripidin tallan'ghan bolup, bular 2014 - yilining béshida gérmaniyede ötküzilidighan dünyadiki eng muwappeqiyetlik 10 yashni tallash pa'aliyitige türkiyege wakaliten qatnishidiken.

Uyghur qizi dilhayat barishchi kim?

Dilhayat barishchi 1987 - yili ürümchide dunyagha kelgen bolup, 7 yash waqtida ata - anisi bilen birlikte türkiyege kelgen. U bashlan'ghuch, ottura we toluq ottura mekteplerni türkiyening enqere we istanbul qatarliq sheherliride oqughandin kéyin 2005 - yili türkiyening dangliq üniwérsitétliridin biri bolghan enqere ottura sherq téxnika üniwérsitétige ötken. Uning üniwérsitétning 1 - yilliqidiki waqtida otturigha qoyghan balilarni terbiyelesh ish pilani mukapatqa ériship, u türkiyediki üniwérsitét oqughuchilirigha wakaliten 2005 - yili yawrupa oqughuchilar birlikide wezipe ötigen. U, ottura sherq téxnika üniwérsitéti jem'iyetshunasliq kespide oquwatqanda amérika hökümiti teripidin yash liderlerni terbiyelesh kursigha qatnishish salahiyitige ériship, nyuyorktiki birleshken döletler teshkilati bilen amérika dölet mejliside kursqa qatniship qisqa muddet praktika qilghan. 2008 - Yili en'giliyede oqush jeryanida chong saylamda wezipe alghan. U, gollandiye bilen türkiye parlaméntida insan heqliri boyiche praktika qilghan. U insan heq - hoquqliri kespide en'giliye, norwégiye, shwétsiye qatarliq döletlerde magistir oqughan. Dilhayat barishchi xanim magistirliq ilmiy maqalisini “Uyghurlar öz yurtida azsanliq milletmu yaki yerlik xelqmu?” témisida teyyarlighan bolup, mezkur maqalini bu heqtiki xelq'ara qanunlardin paydilinip turup yazghan. Téxi emdi 26 yashqa kirgen dilhayatning qolgha keltürgen netijiliri kishilerni heyran qaldurmaqta.

Biz bu heqte téximu tepsiliy melumat élish üchün uning bilen söhbet élip barduq. U bizge insan hoquqining dunyawiy ikenlikini, özining insan hoquqi, bolupmu balilar hoquqigha qiziqip qélishida özining Uyghur a'iliside tughulghanliqining rolining zor bolghanliqini éytti.