Amérika prézidénti donald tramp "Xongkong aptonomiye siyasiy qanuni" gha imza qoydi

Muxbirimiz méhriban
2020-07-16
Share
trump-qanun-imza-1.jpg Amérika prézidént donald tramp qanun layihesige imza qoyuwatqan körünüsh. 2020-Yili 16-iyun, washin'gton
AP

14-Iyul küni amérika prézidénti donald tramp "Xongkong aptonomiye siyasiy qanuni" we uninggha qoshumche qilin'ghan bir memuriy buyruqigha imza qoydi. Shu küni donald tramp bu qanun heqqide bayanat berdi.

Donald tramp sözide xongkonggha qaritilghan ilgiriki barliq iqtisadiy imtiyazlarning bikar qilin'ghanliqini bildürüp, mundaq dégen: "Bügün men xongkonggha munasiwetlik qanun layihesige we uninggha qoshumche qilin'ghan bir memuriy buyruqqa imza qoydum. Buning bilen amérikaning xongkonggha qaratqan barliq imtiyazliri bikar qilindi. Xongkunggha bundin kéyin xitay chong quruqluqigha oxshash mu'amile qilinidu, alahide imtiyazliri bolmaydu, sezgür téxnikilar xongkonggha éksport qilinmaydu."

Prézidént donald tramp sözini dawamlashturup, nöwettiki xongkong weziyiti heqqide toxtilip, mundaq dégen: "Hemmeylen néme ishlar boluwatqinini körüp turuwatidu, bu yaxshi weziyet emes. Xongkungluqlarning erkinliki tartiwélindi, kishilik heq-hoquqliri tartiwélindi. Xongkung weziyitining tereqqiyatigha egiship, men xongkongni erkin soda riqabitige berdashliq bérelmeydu, dep qaraymen. Méningche, köpligen kishiler xongkongdin kétidu."

Prézidént danold tramp amérikaning "Xongkong aptonomiye siyasiti qanuni" we qoshumche bir memuriy buyruqigha imza qoyghandin kéyin, bu xewer xelq'ara taratqularda xewer qilinip, küchlük inkas qozghidi.

Xitay tashqi ishlar ministirliqining bayanatchisi xu'a chünying 15-iyul charshenbe küni naraziliq bayanati bérip, eger amérika bu qanunni emeliyleshtürse, xitayning buningdin öch alidighanliqini bildürgen.

Xu'a chünying mundaq dégen: "Amérika terepning xongkongda 'dölet xewpsizlik qanuni' ning ijra qilinishigha tosqunluq qilish muddi'asi hergiz emelge ashmaydu. Öz menpe'etini qoghdash üchün xitay hökümiti zörür bolghan inkaslarni qayturidu. Amérikaning munasiwetlik hökümet emeldarliri we tarmaqlirigha tedbir qollinidu. Biz amérikani xataliqlirini tüzitip, atalmish 'xongkong aptonomiye siyasiti qanuni' ni ijra qilmasliqqa dewet qilimiz. Biz yene amérikani herqandaq bir wasite qollinip xongkongni öz ichige alghan xitayning ichki ishlirigha arilashmasliqqa dewet qilimiz. Eger amérika öz aldigha yol tutidiken, xitay terepmu buninggha keskin inkas qayturidu."

Xitay weziyet analizchiliridin tor sözchisi ma jü ependi xitay weziyet analizchilirining amérika prézidénti donald tramp imzalighan "Xongkong aptonomiye siyasiti qanuni" heqqidiki qarashlirini sherhlep ötti.

Majü ependi sözide amérikaning bu qanunni yolgha qoyushi, amérikaning ilgiri xongkonggha qaratqan barliq alahide imtiyazlirining bikarqilin'ghanlidin bésharet béridighanliqini bildürdi. U bu qanun xongkongda yolgha qoyulghandin kéyin, xongkongning iqtisadiy jehette xitay sheherlirige oxshash mu'amilige uchraydighanliqi, bu ehwalning xitayning dölet iqtisadigha, bolupmu xitay emeldarlirining xongkongdiki menpe'itige qattiq zerbe bolidighanliqini tekitlidi.

Dunya Uyghur qurultiyi xitay ishliri komitétining mudiri ilshat hesen ependimu ziyaritimizni qobul qilip, amérika prézidénti donald tramp imza qoyghandin kéyin qanun'gha aylan'ghan "Xongkong aptonomiye siyasiti qanuni" ning xongkongluqlarning erkinliki we démokratiyesini depsende qilghan xitay hökümitige qarshi qollan'ghan bir tedbiri ikenlikini bildürdi.

Ilshat hesen ependi yene "Xongkong aptonomiye siyasiti qanuni" ning mezmuni we uning xitay hökümitining iqtisadiy menpe'etige körsitidighan tesiri heqqidimu öz qarashlirini bayan qilip ötti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet