Оттура мәктәп тарих оқутқучиси йүсүпҗан ясин 18 йиллиқ кесиветилгән

Мухбиримиз шөһрәт һошур
2021-12-08
Share
turme-uyghur-siyasiy-mehbus.jpg Түрмигә елип кириливатқан уйғур сиясий мәһбуслар.
Social Media

Өткән һәптидики аңлитишимизда җәмийәттә “от йүрәк тарихчи” дәп нам алған үрүмчи 23 ‏-оттура мәктәпниң оқутқучиси йүсүпҗан ясинниң тутқунда икәнлики һәққидә хәвәр бәргәнидуқ. Мухбиримизниң илгириләп елип барған ениқлашлири давамида, униң язған китаб вә сөзлигән лексийәлири сәвәблик 2018 ‏-йилниң ахири бөлгүнчилик билән әйиблинип 18 йиллиқ кесилип кәткәнлики дәлилләнди. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Һөрмәтлик радио аңлиғучилар, җәмийәттә “от йүрәк тарихчи” дәп нам алған оқутқучи йүсүпҗан ясин һәққидә үрүмчидин йолланған бир мәктупта, униң 4 йилдин буян из-дерәксиз ғайиб икәнлики баян қилиниш билән бирликтә, бу әһвалниң йүсүпҗанниң чәтәлдики достлириға билдүрүлүши, җүмлидин австралийәдә яшаватқан тәтқиқатчи вә паалийәтчи мәмтимин әлаға хәвәрләндүрүлүши һавалә қилинған. Мәмтимин әланиң баян қилишичә, йүсүпҗан ясин униң юртдиши вә оттура мәктәптики савақдиши болуп, йүсүпҗан ясин шинҗаң университетини пүттүргәндин кейин бир мәзгил 14 ‏-оттура мәктәптиму оқутқучи болған. Мәмтимин әланиң өзи көргән-аңлиғанлириға асасән баян қилишичә, тәтқиқатида уйғур миллий роһини қезиш, гәвдиләндүрүш вә урғутуш үчүн тәр аққузған йүсүпҗан ясин, бу әмгәклири сәвәблик, хитай даирилириниң көзигә сиғмиған вә даириләр уни оқутқучилиқ хизмитидин елип ташлап, бир мәһәл көзәтчилик вәзиписи билән мәктәп дәрвазисиға қаратқузған. Дейилишичә, йүсүпҗан бу җазалиништин хорлуқ әмәс шәрәп һес қилған вә өз имкани даирисидә илмий тәтқиқат вә тәрғибат ишлири билән шуғулланған.

Өткән һәптидики ениқлашлиримизда үрүмчидики мәктәп вә маарип назарити хадимлири йүсүпҗан ясинниң тутқунда икәнликини ашкарилиған болсиму, әмма униң кесилгән-кесилмигәнлики һәққидә мәлумат бәрмигәниди. Бүгүнки ениқлашлиримиз давамида үрүмчи шәһәрлик бахулияң сақчихана хадими йүсүпҗан ясинниң бөлгүчилик тәшвиқати билән шуғулланди дәп қарилип 18 йиллиқ кесилгәнликини ашкарилиди. Әмма, у йүсүпҗанниң кесилишигә қайси китаб яки лексийәсиниң сәвәб болғанлиқини тилға алмиди.

Радийомизға кәлгән инкаста дейилишичә, йүсүпҗан ясин атушниң азақ йеза теҗән кәнтидә туғулуп өскән. Шуңа биз, атушниң азақ йезилиқ сақчиханиға телефон қилип, йүсүпҗан ясинниң кесим муддити һәққидә өзлириниң вә йүсүпҗанниң уруқ-туғқанлириниң хәвири бар-йоқлуқини соридуқ. Сақчи хадими йүсүпҗан ясинниң 18 йиллиқ кесилгәнликини муәййәнләштүрүш билән бирликтә, өзлириниң бу сот һөкүмидин теҗәндики уруқ-туғқанлирини хәвәрләндүргәнликини баян қилди.

Тордики материяллардин мәлум болушичә, йүсүпҗан ясинниң китаб вә лексийәлири муһаҗирәттики уйғурлар арисидиму күчлүк қизиқиш қозғиған болуп, бәзи һәвәскар дикторлар, униң “уйғур миллий роһиниң асаслири” намлиқ мақалисини оқуп тарқатқан.

Йүсүпҗан ясин иштин сиртқи вақитлирида мәтбуатларда, йәни асаслиқи тор бәтлиридә уйғур тарихи, миллий роһийити мәсилилири бойичә көплигән илмий мақалиләрни йезип елан қилип, җамаәтниң алқишиға еришкәниди.

Һөрмәтлик радио аңлиғучилар, юқирида “от йүрәк тарихчи” йүсүпҗан ясинниң язған китаблири сәвәблик 18 йиллиқ кесилгәнликиниң дәлилләнгәнлики һәққидә аңлитиш бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт