Abdulhekimxan mexsumning hayati we küresh yoli (7)

Muxbirimiz qutlan
2018-05-29
Élxet
Pikir
Share
Print
Merhum diniy alim abdulhekimxan mexsum teklimakan wapatidin 5 ay ilgiri istanbulda chüshken süriti. 2016-Yili iyul, istanbul.
Merhum diniy alim abdulhekimxan mexsum teklimakan wapatidin 5 ay ilgiri istanbulda chüshken süriti. 2016-Yili iyul, istanbul.
RFA/Arslan

7-Bölüm: qaghiliqqa kömülgen baliliq chüshler

Merhum abdulhekimxan mexsum hayat waqtida özining shexsiy kechürmishliri we béshidin ötkenliri heqqide köp toxtalmighan idi.

1980-We 1990-yillarda öz wetinide, andin kéyin muhajirette shunche yil ilim tehsil qilghan hemde shunche köp oqughuchi yétishtürgen bu diniy alim özining shexsiy hayati heqqide sözleshni anche anche rawa körmigen idi. 2016-Yili 12-ayda merhum 53 yéshida tuyuqsiz wapat bolghandin kéyin köpligen kishiler, shu jümlidin uningdin ilim alghan shagirtliri "Ustaz abdulhekimxan mexsum qandaq bir hayatta yashidi, uning ömür yoli qandaq kechmishlerdin mezmun tapti?" dégen so'allarni öz-özidin sorashti.

Abdulhekimxan mexsum alemdin kétip, aridin bir yérim ötkende merhumning ayali meryemgül teklimakan xanim radiyomiz ziyaritini qobul qilip, yoldishining hayat kechmishliri heqqide éghiz achti.

U yoldishi abdulhekimxan mexsumning 1963-yili qaghiliqning besh'ériq yézisida bir diniy ölima a'iliside tughulghanliqini, bu a'ilining baghwenchilik we qoshumche tijaret bilen shughullinip kelgen meripetsöyer a'ile ikenlikini ilgiri sürdi.

Merhum abdulhekimxan mexsumning hayat yoli heqqidiki izdinishlirimiz we uning istanbuldiki a'ile-tawabi'atliri bilen élip barghan söhbetlirimiz jeryanida merhumning 2016-yili 3-ayda, yeni wapat bolushtin 9 ay ilgiri öz hayati heqqide qaldurghan öz bayanidiki awaz matériyali qolimizgha chüshti. Uningda merhum özining tughulghan yurti, a'ile nesebi we baliliq dewri heqqide qisqiche melumatlar qaldurghan idi.

Merhum abdulhekimxan mexsumning bayanlirigha qarighanda, u qedimiy yurt qaghiliqta meripetperwer bir diniy ölima a'iliside tughulghan we kichikidin bashlapla nahayiti qoyuq bolghan milliy we diniy medeniyet muhitida ösüp chong bolghan. U toluq ottura mektepni öz yurtida ela netije bilen tamamlighandin kéyin 1982-yili guma nahiyesige bérip u yerdiki dangliq diniy alimlarning qolida ilim alidu. Andin qaghiliqqa qaytip kélip, öz dewridiki yétük diniy alim we jama'et erbabi ablikimxan mexsumning qolida islam ilmiy boyiche aliy melumat alidu.

Merhum abdulhekimxan mexsum 2016-yilining mart aylirida qaldurghan awazliq eslimiside ilim élish we üzlüksiz izdinish ichide ötken 1980-yillardiki yashliq hayati heqqide toxtilip, shu yillarda özining barliq zéhnini oqushqa serp qilghanliqini tekitleydu.

U özining baliliq we yashliq hayati heqqide toxtalghinida hayatining deslepki 10 yilida toluq ottura mektepkiche bolghan asasiy ma'arip terbiyesini alghanliqini, kéyinki 10 yilda diniy ilim boyiche mexsus oqush we ustazliq qilish bilen shughullan'ghanliqini tilgha alidu.

Merhum abdulhekimxan mexsumning hazir istanbulda yashawatqan qizi menzure teklimakan radiyomiz ziyaritini qobul qilip, dadisigha bolghan cheksiz hörmiti we séghinishlirini ipadilidi. U "Men abdulhekimxan mexsumning qizi bolush süpitim bilen dadamdin cheksiz pexirlinimen. Mushundaq bir kishining méning dadam bolghanliqidin, özümning mushundaq bir kishining qizi bolghanliqimdin pexirlinimen!. . . " deydu. U özining baliliq eslimiliride uyup qalghan dadisining obrazi heqqide toxtalghinida, "Dadam a'ilimizdiki chong-kichik hemmimiz üchün yaxshiliqning, güzel exlaqning, insaniy peziletning yarqin ölchimi idi, " deydu.

(Dawami bar)

Toluq bet